JEREMIYA 30 - Sumi Naga CL (Re-edited) Bible (BSI)

Israel ngo Judah Athoputho tsü

¹ Ampeu tsa Jeremiah lau ighi:

² “Ampeu, Israel Lhou no ishi piani: I no o vilo pive keu tsa kümtsü kaku lakhi lo yelo.

³ Kughengu julo, Ampeu no sheshu, I no Iw timi Israel ngo Judah kinigha athoputho tsüni keu tsala cheni, Ampeu no pi, eno pano puasüqo tsükeu yeghi lo panongu sachile saghi no panongu no tipau pighi luve nani.”

⁴ Ampeu no Israel ngo Judah ghenguno pikeu tsaqo:

⁵ “Ampeu no ishi piani: Ningu no shithüghüi keu ghügha chilue, akümsapu kethono aloino keu kumoe.

⁶ Itehi ighiju no julo, kiptimi ye anga punulu nani keshea? Imaye kushiye totimi no punu niye akeshi kiptimi kümtsü pa u no apo thape akeu ni ye ithulu ani kea? Kushiye kümtsü no agi phalai ani kea?

⁷ Oishe! Tipa tsala ye ighono kije, titoi keu tsala küha nani; ti ye Jacob ghenguno aveküsa do; ikemu tipau lono pa xaluve nani.

⁸ “Tipa ghuloki lo hitoi shinani, aqokitikhi MPEU no sheshu, I no kuokhasü panongu kuo lono hephove tsü nani, pano kütsüghaqo pitive tsü nani, eno panongu ye inaghami qeu shimove nani.

⁹ Ikemu panongu ye Ampeu pano Lhou, eno pano kükau David, I no pano ghenguno saputhu niye akeu huthu nani.

¹⁰ “Ikehu msa kevilo, I qeu Jacob, Ampeu no sheshu, aghüthisü kevilo, O Israel; kughengu julo, I no aghacheu no o xalu nani, eno o tikughuko akughushi akeu yeghi lono xalu nani. Jacob ye iqüghai alokughuno shi ideighi nani, khumu pa shikümsa mo nani

¹¹ Kughengu o xalu nike Ni ye o gholo ani, ipi Ampeu no sheshu; I no khuno lau nongu hapuwuve keno shiye tipaqo ye qhoi kishekhave nani, ikemu Ni ye nongu kishekhave tsümo nani. I no achipi lono nongu sakiyi nani, ikemu Ni ye nongu ghime mono puwuve monani.

¹² “Kughengu Ampeu no ishi piani: O ghüza ye shipivi kümlapue, o ghüzaku ye zaghi shivae.

¹³ O she petsüni kemi kühae, o ghüzaku sala küsüvi kühae, o ghenguno shikipivi kühae.

¹⁴ O ngulami kümtsü no o kümsümavae; panongu ye kiumu o tucho movae; I no aghümi toi o ghüzavae, kimiyemo keu ghümi no ghimeqhi keu toivae, kughengu o kipimi ye kije, eno o xine ye kutomo ke.

¹⁵ O ghüza ghenguno no ye kushiye igha ani kea? O küsü ye shipivimlae. O kipimi no kije kehu, o xine no kutomo kehu, I no thime hipaqo o lau shivae.

¹⁶ Ikehu o kütsave kemi kümtsü kütsave nani, eno o ghümi kümtsü akughu lo wuve nani; khunono o pükaqhi keno pano pükaqhi nani, o tsüchu kemi I no tsüchuve nani.

¹⁷ I no o shiaji puthotsü nani, eno o ghüzaku shipivi tsünani, ipi Ampeu no sheshu, kughengu panongu no no ye hapheve kemi ipi ku: ‘Hi ye khunomu tucho chemo keu Zion ke!’

¹⁸ “Ampeu no ishi piani: Jualo, I no Jacob phiki kinigha athoputho tsü nani eno pa kungo-a lo kimiyeqhiyi keu anani; mishighüna ye xaleqhive keu shou shiqhe puku nani, eno kükaki ye thosü-a lo puthugho nani.

¹⁹ Tipaqo lono shikimthikütsü le phe ipeghi nani, alovi akemi sütsa chilu nani. Panongu ye aghulo shimono I no kughuko tsü nani, I no pano gigihupu shitsü nani, panongu ye tülalo monani.

²⁰ Pano tianuli ye khaghi lo acheke toi nani, eno pano qoaho ye I zülo mtotoi kithe nani, pano qhasü keqo I no ghime nani.

²¹ Pano sakipheu ye pano dolo timi no shinani; pano yepeu ye pano gholono ipeghi nani; I no pa sasü aphivilo ighi eno pa no I kupunu ighi nani, kughengu khuu no I kupunu ighi luni kea? ipi Ampeu no asheshu.

²² “Nongu no Iw timi shinani eno I no nongu Lhou shinani.”

²³ Julo, AMPEUw pasapagha! Aloghu ye miyitsü pasapagha toi cheni; tino kixikilami kütsü shou no mpale nani.

²⁴ Ampeu mlokighide ye Pa no kughu akeu shikhave moke kutolo süchilemo nani. Athiu tsala lono nono mtsümishei vethalu nani.