JEREMIYA 3 - Sumi Naga CL (Re-edited) Bible (BSI)

¹ “Milakhi no pa nipu pheve no li no kütami nipu shive aye pa ye li lau idewulu nani keshea? Ayeghi tipau ye kümzapu shi shipuqove nanike kumo? No ye alojipumi kutomo sasü kütüqhave eno I lau ideighini keshea? Ampeu no asheshu.

² Atoghi kütsüqa lo jupuku julo! Nono shipüthamo ke-a khileala ani keshea? Asayeqha lo Arabmi toi alaphe lo nono o lojipumi ngokhe ke. O salha kümla lhoksa no nono ayeghi shipixivae.

³ Ikehu tsütsüghu no süchileve, tuqu tsütsüghu no ighi move, ikeghi no ye kujomo mithe küsalhami gi xapu ani.

⁴ No ye itehi I vilo, ‘I Pu, No ye I lhothe lo küsaue, ipike kumo?

⁵ Pa ye alhokuthu amloide eno alholo axuide anani keshea?’ Nono pive akemu no ye shiluke thaqhü alhoksa kümtsü shivae.”

Aküpülü Küküha Israel Ku

⁶ Akükau Josiah no ayepe akelo Ampeu no I vilo pi: “Israel aküpülü kükühau no kiu mlave akeno, li no kishi ato kiqhe kümtsü lo ikuno asüminipho qholono kütüqha keno no ye ithulu kema?

⁷ ‘Li no hipaqo shive kethiu I lau ideighi nani pi I no kümsüe,’ ikemu li ye ideighi moe, liw pishikiqhi kümla ye li tsünipu Judah no ithuluvae.

⁸ Israel aküpülü kükühau no salha keu kümtsü ithuluvae, I no pheve keu shepe tsüve no li puwuvae. Ikeghi pishikiqhiu li tsünipu Judah no msamoe, ikemu li ghi wuno kütüqha thuve.

⁹ Kughengu kütüqha keu ye mthüthei ikhilue, li no ayeghi shipixive, asüatu sasü salhauve.

¹⁰ Ikeghi li tsünipu Judah no pishikiqhi kümla shi anamu li mlo kuchopu pesü I lau ideighi mono ighike ye shike, ipi Ampeu no asheshu.”

¹¹ Ampeu no I vilo pi, “Aküpülü kükühau Israel ye li pesü pishikiqhiu Judah nguno amikuchou shi piyeke.

¹² Wuno atsa hipaqo pesü ahuu küdau kütüghü no pilo, “‘Aküpülü kükühau Israel, ideighilo, ipi Ampeu no asheshu. Ni ye amloide ghi o jumo nani, kughengu Ni ye kimiyekini ke, ipi Ampeu no asheshu; Ni ye alholo amloide monani.

¹³ Nono Ampeu o Lhou hebideve o pulou pesü asüminipho qholo inaghami lau tsüve no I tsa gholu move keu kipimi kepi ikhilu lo, ipi Ampeu no asheshu.

¹⁴ Ideighilo, O aküpülü küküha tianuliqo, ipi Ampeu no asheshu; kughengu Niye o MPEU ke; I no aphughi lono nongu lakhi luni eno akibo lono kini luni, eno Zion lo nongu saghini.

¹⁵ “‘I no I mlokuchuu ambekhemi nongu tsüni, panongu no akighithi eno vethakulu pesü nongu loji nani.

¹⁶ Tipa ghuloki lo kughou nongu no ayeghi lo kughuko eno ishewoni keno, Ampeu no asheshu ani, timiqo ye, “AMPEUw Puloshoqhi bohu,” ipi move nani. Ti ye akükümsü lo ighi move eno kümsülu move momu vezümo nani; eno mla kithemo nani.

¹⁷ Tipau ghuloki lo Jerusalem ye Ampeu kükalakhü ipi kunani, Jerusalem lo Ampeu nhethe lo shiye kümtsü tile kumqo nani, panongu ye kuthovi ghi pano mlo lhoksa papemo nani.

¹⁸ Tipau tsala lo Judah kibo ye Israel kibo gholo küqha luve nani, eno küqhano ahuu yeghi lono I no nongu puasüqo tsükeu yeghi pesü amheghi shiluve nani.

¹⁹ “‘I no pi, Ni ye kishi o pesü I nuli gholo qhino ayeghi kivi o tsü, shiye kümtsü nguno jukivi mheghi shitsü nishi chekelae. No ye I vilo, I Pu, ipi no I launo idewove monanie pi kümsü ake.

²⁰ Kuchou no pishikiqhi nipu no li kimi pheveke toi, O Israel kibo, no ye I pishiqhivae Ampeu no asheshu.’”

²¹ Asa itsümo keu toghi lono asütsa lakhi chilue, Israel tianuli no mloqa qhüiniju ani kughengu panongu ye pano laghi pheve, pano Lhou Ampeu kümsümave ke.

²² “Xaidelo, aküpülü küküha nuli, I no nongu küpülü küküha shipivi tsüni.” “Iyei, nino O lau cheni, kughengu No ye Ampeu ni Lhou ke.

²³ Kuchou no atoghi eno naghuto lo kümlaqo ye pishikiqhi eno aküighüpue. Kuchou no Ampeu ni Lhou lau Israel xakulupu ani.”

²⁴ “Ikemu ni lhothe lono ni puasüqo no mlape qhikeu, pano tsüaqu, ambeloji, apu-anga kümtsü akukujopu thime no tsüchuvae.

²⁵ Ningu akukujo lono ihozüni, eno niw küthaküghapu no ni küzüluve peni nolo, kughengu ningu no Ampeu ni Lhou mjochile axine shivae, ningu eno ni puasüqo ghi, ni lhothe lono ishi kutolo ningu ye Ampeu ni Lhou tsa gholu move.”