JEREMIYA 29 - Sumi Naga CL (Re-edited) Bible (BSI)

Akughumi Lau Jeremiah Yesü

¹ Tungkupu Jeremiah no yesü tsa hipaqo pesü akughumi aküxü aghi kemi layemi, achinemi, tungkupmi, eno timi khunoqo Nebuchadnezzar no Jerusalem lono kughu sasü Babylon lo wuve keno tipaqo lau tsüpuwu.

² Hi ye Akükau Jeconiah eno kükaliu paza, shokomi, Judah eno Jerusalem lo hiyampemi, atshamgha kishimi, eno ayi kümlami Jerusalem lo sawuve kethiu noke.

³ Yesü ye Judah kükau Zedekiah no Babylon lo Nebuchadnezzar lau puwu keu Shaphan nu Elasah eno Hilkiah nu Gemariah u lono tsüpuwue.

⁴ Ishi yepüa: “Aqokitikhi MPEU, Israel Lhou no ishi piani: I no Jerusalem lono khunoqo Babylon kughu lo puwuve akeno kümtsü lau:

⁵ Aki shino tile xülo; aghutu shino tipau lo pekighi chulo.

⁶ Anipu luno atianuli shilo, nopu noqo ghenguno anipu lutsülo, eno nongaqo pelo külau pelo, tishianguno atianuli shilu nani, kughukoni thono kümghüve kevilo.

⁷ I no nongu akughu lo puwuve keu mishighüna khile nongu no ani keno tipau lo külakishi eno thukuupu phulo, Ampeu lau aphughi züqhushi inikhu lo, kughengu tipau kivipu phu aye nongu kivipu phulu nani.

⁸ Aqokitikhi MPEU, Israel Lhou no ishi piani: Nongu gholo tungkupmi ngo atumumi pelo nongu pishiqhive pekevilo, eno panongu no pumo keu samo ini kevilo,

⁹ kughengu panongu no I je lono tungkuptsa pi akeu ye akimki; Ni ye panongu puwu püamoe, ipi Ampeu no sheshu.

¹⁰ “Kughengu Ampeu no ishi piani: Kughou Babylon lo ampe lhotsüni kupuveni keno I no nongu xuju nani, I shoqhi shikupu nani eno hipa-a lo nongu sachile saghi nani.

¹¹ I no nongu ghenguno kughu akeu I no ithi ani, Ampeu no sheshu, akivipu ghenguno thono alhoksapu kumoe, lajupu eno hithiu kivipu nongu tsüniye ke.

¹² Tileno nongu no I ku ighi nani eno I vilo inikhu nani, eno I no nongu sütsa initsü nani.

¹³ Nongu no I phuighi nani eno I phulu nani. Kughou nongu no amlo kuchopu no I phuighini keno,

¹⁴ nongu no I phulu nani, Ampeu no sheshu, eno I no nongu kinigha tsüchile nani eno I no khile nongu hapuwuve keno shiye kümtsü eno a-a kümtsü lono nongu sawo kumqo nani, ipi Ampeu no sheshu, I no a-a khipau lono nongu akughu lo puwuve keno tipa-a lo sachile saghi nani.

¹⁵ “Kughengu nongu no, ‘Ampeu no ni ghenguno Babylon lo tungkupmi saputhu tsü,’ ipi kehu,

¹⁶ Ampeu no akükau khuu David kükalakhü lo iqa ani keno pa ghenguno, eno mishighüna hipau lo no laghami nongu gholo akughu lo wumo keqo ghenguno ishi piani:

¹⁷ ‘Aqokitikhi MPEU no ishi piani, julo, I no panoqo shou azütakikihi, akhüava, eno püsa puwu ani, eno panongu pesü mubuthi lhoksa, tsüve no chumlave keu toi shitsü nani.

¹⁸ I no azütakikihi, akhüava, eno püsa pelo panongu pape peni, eno ayeghi lo kükaqha kümtsü zülo akümsapu shitsüni, I no panongu hapuwuve keu shiyeqo gholo panoqo pesü angusüpu, akümsapu, aküighüpu, atichepu, eno thoküghapu shitsüni,

¹⁹ kughengu panongu no I tsa lo amlo tsümoke, Ampeu no sheshu, I no tamono I qemi tungkupmi puwue, ikeghi nongu no initsü moe, ipi Ampeu no sheshu.’

²⁰ Nongu khunoqo I no Jerusalem lono Babylon lo akughumi shi puwuve keno, Ampeu tsa inilo.

²¹ ‘Aqokitikhi MPEU, Israel Lhou no I je lono tungkuptsa pi akeu Kolaiah nu Ahab eno Maaseiah nu Zedekiah pama ghenguno ishi piani: Jualo, I no pama pesü Babylon kükau Nebuchadnezzar u lo süvetsü nani, eno pama ye nongu nhethe lono ghiqhive nani.

²² Pama ghenguno Judah lono Babylon lo akughu shi akemi kümtsü no ghusho keu tsa hipau pi nani: “Babylon kükau no ami lono Ahab ngo Zedekiah pitive ketoi Ampeu no nongu lau tishi tsü peni,”

²³ kughengu panongu no Israel lo kixikila thime mlae, panongu no pano kisüghümi nipuqo sazüe, tishino I no azah tsümo keghi I je lono akimki tsa piani. I no ithi ani, eno I no thopi ke, ipi Ampeu no sheshu.’”

Shemaiahw Kichile Tungkuptsa

²⁴ Nehelammi Shemaiah vilo pilo:

²⁵ “Aqokitikhi MPEU, Israel Lhou no ishi piani: Nono o je lono yesü yepe Jerusalem lo timiqo lau eno Maaseiah nu, achineu Zephaniah ngo achinemi kümtsü lau puwu no pike,

²⁶ ‘Ampeu no o pelo Pa ki jukütsü tsü penike achineu Jehoiada theli lo o pesü achineu shivae, no ye tungkuptsa piche keu aghüzüu pesü kuokhayi pipe no khakütha bolo sülo.

²⁷ Ikehu no ye kushiye Anathothmi Jeremiah khuu o vilo tungkuptsa piani keno pa lomipi mokea?

²⁸ Kughengu pa no ningu pesü Babylon lo puwuve no pi, “Nongu kughukishi ye ado kushuo wonani, aki shiqhelo eno tipaqo lo xülo, aghutu shilo, eno tipau lo pekighi chulo.”’”

²⁹ Achineu Zephaniah no tungkupu Jeremiah no chikulupu shi yesü phisü.

³⁰ Tileno Ampeu tsa Jeremiah lau ighi:

³¹ “Akughu lo akemi kümtsü lau pi puwu lo, ‘Nehelammi Shemaiah ghenguno Ampeu no ishi piani: I no puwumo mu Shemaiah no nongu lau tungkuptsa pi eno nongu pelo akimki tsa pülü ani peke ghenguno,

³² Ampeu no ishi piani: Julo, I no Nehelammi Shemaiah eno pa pishe amzü ghime nani. Timi hipaqo gholo pa kughukomi lakhimu küha nani, eno pa ye I no Iw timi lau akivi mlani keu ithulumo nani, ipi Ampeu no sheshu, kughengu pa no Ampeu hekibide tsa pike.’”