JEREMIYA 28 - Sumi Naga CL (Re-edited) Bible (BSI)

Kichile Tungkupu Hananiah

¹ Judah kükau Zedekiah yepe mpe abidiu aqhi apunguu lo Azzur nu Hananiah, Gibeon ghami no Ampeu ki lono achinemi eno timi kutomo nhethe lono I vilo pi,

² “Israel Lhou, aqokitikhi MPEU no ishi piani: I no Babylon kükau kuokhasü hephove tsüae.

³ Ampe kini dolono Babylon kükau Nebuchadnezzar no Ampeu ki lono akhu ajukhu xapusü Babylon lo wuve keu I no süchile süwo a-a hile qhive nani.

⁴ I no Jehoiakim nu, Judah kükau Jeconiah ghi sachile saghive nani, eno Judah lono Babylon lo haphe sawuve kemi sachile saghi nani, ipi Ampeu no sheshu, kughengu I no Babylon kuokhasü hephove tsü nani.”

⁵ Tile Jeremiah no Ampeu kilo achinemi eno timi khunoqo puthugho akeno panongu nhethe lono Hananiah tungkupu vilo pi,

⁶ Tungkupu Jeremiah no pi, “Amen! Ampeu pelo tishi peniu, nono tungkuptsa pive keu kuchou shi aghi peniu, eno Babylon lono Ampeu kilo akhu ajukhu eno akughumi kümtsü a-a hipau lo sachile saghive peniu.

⁷ Ikemu I no atsa hipau nono chikulupu shi pitsüni eno timi kümtsü pelo chilu peni.

⁸ Khaghi tungkupmi o züumi eno I züumi tungkuptsa piche kemi no aghakhu kutomo eno kükaqhaqo shou aghükishi, akhüava, eno püsa ighini keu kütüghü ke.

⁹ Tungkupu khuu no külakishi tsa pichhotsü keno tino kuchou shive aye, kuchou no Ampeu no pa puwu kepi ithive nani.”

¹⁰ Tileno tungkupu Hananiah no Jeremiah kuo lono kuokhasü ikhipe hephove tsü.

¹¹ Hananiah no timi kümtsü zülono pi, “Ampeu no ishi piani: Hipaphi lono I no Nebuchadnezzar Babylon kükau kuokhasü eno shiye kümtsü kuokhasü ampe kini dolono hephove tsü nani.” Ikemu tungkupu Jeremiah ye tileno cheve.

¹² Hananiah no tungkupu Jeremiah kuo lono kuokhasü hephove tsü kethiu ado kushuo kumo lo Ampeu tsa Jeremiah lau ighi:

¹³ “Wuno Hananiah vilo pilo, Ampeu no ishi piani: ‘No ye asü no shikeu kuokhasü hephovae, ikemu tipau theli lo ayi kuokhayi ithulu nani.

¹⁴ Kughengu aqokitikhi MPEU, Israel Lhou no ishi piani: Babylon kükau Nebuchadnezzar huthu penike I no shiye kümtsü kuo lo kuokhayi pipe nani, eno panongu no pa qe nani, kughengu aluza lo tüghashiqo ghi I no pa tsüvae.’”

¹⁵ Tungkupu Jeremiah no Hananiah vilo pi, “Inilo Hananiah, Ampeu ye o puwu püamoe, ikemu nono timi hipaqo pelo akimki tsa shou pükhübe peke.

¹⁶ Tighenguno Ampeu no ishi piani: ‘Julo, I no ayeghi lono no ikhive nani. No ye hipa mpe lono thive nani, kughengu no ye Ampeu hekibide tsa pivae.’”

¹⁷ Tipau mpe, aqhi akütsüniu lono tungkupu Hananiah ye thive.