JEREMIYA 27 - Sumi Naga CL (Re-edited) Bible (BSI)

Nebuchadnezzar Kuokhasü

¹ Josiah nu, Judah kükau Zedekiah yepe hukuthu lo Ampeu tsa hipau Jeremiah lau ighi.

² Ampeu no I vilo ishi pi: “Ashiyiko kighi ngo kuokhasü mlano o kuo lo süpulo.

³ Asütsa pesü Edom kükau, Moab kükau, Ammon nuliqo kükau, Tyre kükau, eno Sidon kükau lau, Jerusalem lo Judah kükau Zedekiah lau aghinimi ighi kemi u lono tsüpuwu lo.

⁴ Pano mpemi lau azah hipau pesü tsülo: ‘Israel Lhou, aqokitikhi MPEU no ishi piani: Nongu no hipau pesü nongu mpemi vilo pilo:

⁵ “Aküka kije lono eno au xachho pesü ayeghi mlano timi ngo tüghashi tile qhikeu ye I no ke, eno khukhumu I no achipishi ithulu keu lau ayekipe tsücheni.

⁶ Itehi ayeghi hipaqo kümtsü pesü I qeu Nebuchadnezzar Babylon kükau u lo süve tsüae, eno aluza lo tüghashi ghi pa huthu penike tsüvae.

⁷ Pano ghakhu do aghuloki ighi moke kutolo shiye kümtsü no pa ngo pa nu eno pa tilimi kutolo huthu nani. Tithiu no shiye kutomo, eno kükami kijeqo no pa pesü pano qeu shive nani.

⁸ “‘“Ikemu shiye momu kükaqha lakhino hi Nebuchadnezzar Babylon kükau qemo eno pano kuo lo paw kuokhasü pumo aye, I no shiye tipau kütsave moke kutolo azütakikihi, akhüava, eno püsa pesü ghime nani, ipi Ampeu no sheshu.

⁹ Ikehu, now tungkupmi, tuumi, asamo kishimi, asheazü tsa kipimi, momu küdüumi, nongu vilo ‘Nongu ye Babylon kükau qemo nani,’ ipi chekeqo tsa ini kevilo.

¹⁰ Kughengu ti ye akimki lono nongu lau tungkuptsa piani, ti ye nongu pesü no yeghi lono putosüu hapuwuveni keu kiqi ke; I no nongu hapheve no nongu ye pühave nani.

¹¹ Ikemu khuno shiye no Babylon kükau kuokhasü qholo ighi no pa huthuni keno, I no panongu pelo pütüta yeghi lo ngono mla chupe nani, ipi Ampeu no asheshu.”’”

¹² Zedekiah lau ghi I no titoi pi: “Babylon kükau kuokhasü qholo ighilo, pa eno paw timiqo huthu no xülulo.

¹³ Ampeu no Babylon kükau qemo keu shiye ghenguno pi keshi, kushiye ow timiqo ye azütakikihi, püqümiye, eno püsa lono thini kea?

¹⁴ Tungkupmi khunono nongu vilo, ‘Nongu ye Babylon kükau qemo nani,’ ipi ani keno pano tsa ini kevilo, kughengu panongu ye akimki tungkuptsa pi anike.

¹⁵ Ni ye panongu puwu püamoe, ipi Ampeu no sheshu, ikemu panongu ye I je lono kichile tungkuptsa piani, ikehu tipau visavili ye I no nongu hapheve no nongu eno tungkuptsa pi akemi tungkupmiqo pühave kelono ipeghi nani.”

¹⁶ Ikehu I no achinemi eno timiqo vilo pi, “Ampeu no ishi piani: Tungkupmi khunono nongu vilo tungkuptsa, ‘Julo, ado kushuo womono Ampeu chineki lo akhu ajukhuqo süwuve keu Babylon lono süchile süghive nani,’ ipi cheni keno tipaqo tsa ini kevilo, kughengu ti tungkuptsa ye akimki ke.

¹⁷ Panongu tsa ini kevilo; Babylon kükau qelo eno xülulo. Kushiye mishighüna hipau kütsalepe qhiveni kea?

¹⁸ Panongu no tungkupmi shiaghi, eno Ampeu tsa no panongu gholo aghi aye, panongu pelo aqokitikhi MPEU qhüiniju pelo, tishianguno akhu ajukhu Ampeu kilo, Judah kükau kilo, eno Jerusalem lo akeqo ye Babylon lo pewuve pemoni.

¹⁹ Kughengu aqokitikhi MPEU no atsükuchoqo, alazayi tughuko, ghokepu khache, eno kütau akhu ajukhuqo ghenguno ishi piani,

²⁰ ti ye Babylon kükau no Jerusalem lono Jehoiakim nu Judah kükau Jeconiah eno Judah ngo Jerusalem lo ghenimiqo haphe sawuche kelono pewumo no qhive keqo ke,

²¹ ikehu Israel Lhou, aqokitikhi MPEU no akhu ajukhu Ampeu kilo, Judah kükau kilo, eno Jerusalem lo qhive keqo ghenguno ishi piani:

²² Hipaqo ye Babylon lo xapu wuve nani eno I no panongu xuju moke kutolo tile anani, ipi Ampeu no sheshu. Tishino I no hipaqo süchile süwo hipa-a lo qhikitheve nani.”