JEREMIYA 26 - Sumi Naga CL (Re-edited) Bible (BSI)

Akithi pesü Jeremiah Kichi

¹ Josiah nu, Judah kükau Jehoiakim yepe hukuthu lo Ampeu launo atsa hipau ighi:

² “Ampeu no ishi piani: Ampeu kikhala lo puthugho lo, Ampeu kilo mlla nike ighi kemi Judah lo mishighüna kümtsü vilo I no o pelo pi penike azah tsükeu pesü pilo, atsathi lakhimu süchile kevilo.

³ Ishiake panongu no ini luvi, eno lakhikhi no pano laghi lono xaide ighi luvie, eno pano kümla lhoksa ghenguno I no ahaküsapu kughu akeu süchile luvike.

⁴ Panongu vilo pilo, ‘Ampeu no ishi piani: Nongu no I tsa inimo, I no nongu zülo ayezah qhitsü keu papemo aye,

⁵ eno I qemi tungkupmi I no nongu lau anguno anguno puwu keu tsa ini tsümo aye,

⁶ I no akibo hipau pesü Shiloh toi shitsüni, eno mishighüna hipau pe ayeghi lo shiye kümtsü ghenguno ghukusho shivetsü nani.’”

⁷ Jeremiah no Ampeu ki lono pikeu tsa achinemi ngo tungkupmi eno timi kümtsü no chilue.

⁸ Kughou Jeremiah no Ampeu no timiqo vilo pi penike azah tsükeu pitave keno, achinemi ngo tungkupmi eno timi kümtsü no pa tsüqü luve no pi, “No ye thi nani!

⁹ No ye kushiye Ampeu je lono tungkuptsa, ‘Aki hipau ye Shiloh toive nani eno mishighüna ye kütsaleve no küghüna move nani,’ ipi ani kea?” Ikehu Ampeu kilo timi kümtsü no Jeremiah süho luve.

¹⁰ Kughou Judah lo hiyampemi no hipau sütsa chilu keno akükau ki lono Ampeu kilo ighive, eno Ampeu ki Khagho Kithe ikulo lo iqave.

¹¹ Tishino achinemi ngo tungkupmi no hiyampemi eno timiqo vilo pi, “Timi hipau ye pithive küzüe, kughengu nongu kini no chiluve ketoi pa no mishighüna hipau shou akumou tungkuptsa pike.”

¹² Tile Jeremiah no hiyampemi eno timiqo vilo pi, “Ampeu no aki hipau eno mishighüna hipau mjochile keu tungkuptsa pi penike I puwu keu nongu no chiluvae.

¹³ Tighenguno itehi nongu laghi shikithe lulo, eno nongu Lhou Ampeu tsa lulo, tishiaye Ampeu no nongu ghenguno amhekiqi pi püakeu xachileve nani.

¹⁴ Ikemu niu ye nongu u lo ani. Kiu no akivi eno achipi keno nongu no shilo.

¹⁵ Ikemu hi thebei ithilo, nongu no I pithive aye pimihami ji nongu shou ikughi nani, eno mishighüna hipau ngo tile xüküami shou ighi nani, kughengu kuchou no Ampeu no atsa hipaqo nongu kini lo pisütsü peniye I puwu ke.”

Akithi lono Jeremiah Süchilelu

¹⁶ Tileno hiyampemi ngo timiqo no achinemi eno tungkupmi vilo pi, “Timi hipau ye thive kepu aküzüpu kumoe, kughengu pa no Ampeu ni Lhou je lono ningu vilo pivae.”

¹⁷ Tile layemi lakhino ithu timi kumqo akeqo vilo pi,

¹⁸ Moresheth lo Micah no Judah kükau Hezekiah ghuloki lono Judah lo timi kümtsü vilo tungkuptsa ishi pi: ‘aqokitikhi MPEU no ishi piani, “‘Zion ye alu toi hokide nani; Jerusalem kütsalepe amoqhe puku nani, achineki toghi ye aghasa shive nani.’

¹⁹ Judah kükau Hezekiah eno timiqo ye pa pithive keshea? Pa ye Ampeu sümsa eno Ampeu pulou qhüiniju ke, Ampeu ye amhekiqi panongu shou pi püakeu süchileve ke kumo? Ikemu ninguu ye ni shou ahaküsapu kije süghini cheni.”

²⁰ Tile kütami lakhi Ampeu je lono tungkuptsa pi chekeu Kiriath-jearim ghami Shemaiah nu Uriah ae. Pa no mishighüna eno ayeghi hipau ghenguno Jeremiah no pikeu tsatho pi.

²¹ Kughou Akükau Jehoiakim ngo pa ghütomi eno hiyampemi no pa tsa chilu keno akükau no pa pithiveni ke phuthu. Ikemu Uriah no hipau tsa chilu kelo msave no Egypt lo poka wuve.

²² Ikehu Akükau Jehoiakim no timi khami Achbor nu Elnathan eno kütami pa gholo puwu

²³ eno Egypt lono Uriah küghaluve no Akükau Jehoiakim lau saghi, tishino azütakikihi no pa ghiqhive eno pa kumo ye aqha timi qhoche keu-a lo qhove.

²⁴ Ikemu Shaphan nu Ahikam no Jeremiah pithive penike timiqo lau ikhiphe tsümoe.