JEREMIYA 25 - Sumi Naga CL (Re-edited) Bible (BSI)

Ampe Lhotsüni Akughushi

¹ Josiah nu Judah kükau Jehoiakim yepe mpe abidiu lo Judah lo timiqo ghenguno Ampeu tsa Jeremiah lau ighi, (ti ye Babylon kükau Nebuchadnezzar yepe mpe atüghüu lono),

² tungkupu Jeremiah no Judah ngo Jerusalem lo küxümiqo vilo pi:

³ “Amon nu Judah kükau Josiah yepe mpe chighiaküthüu lono ishi kutolo ampe muku küthü shi akelono Ampeu tsa I lau ighi, eno ni ye tamo mithe nongu vilo pivae, ikemu nongu no inimoe.

⁴ Nongu ye Ampeu no tamo mithe Pa qemi tungkupmi nongu lau puwu akeghi nongu no inike kumono nongu kinimu kugho puwomoe,

⁵ eno pi, ‘Itehi nongu pütüta laghi eno akümla lhoksa lono tsüghü ighilo, eno Ampeu no khaghi no alholo ghenguno nongu eno no puasüqo tsükeu yeghi lo xülulo.

⁶ Alhou kütauqo huthu eno mllani ke papewu kevi, momu nongu kümla no I mlo shikighide kevilo. Tishiaye Ni ye nongu ghimemo nani.’

⁷ Ikeghi, Ampeu no sheshu, nongu no I tsa inimoe, eno nongu kümla no I mlo shikighide tsüe.

⁸ “Tighenguno, aqokitikhi MPEU no ishi piani: Nongu no I tsa gholumo ke ghenguno,

⁹ julo, I no ahuu shiayeqo eno Babylon kükau I qeu Nebuchadnezzar kunani, ipi Ampeu no sheshu, I no panoqo sawo ayeghi hipau lo küxümi eno tipau hokümxa lo shiye akeqo mjochile nani. I no qhoi panoqo kütsaleve no panongu pesü aküighüpu, atichepu, eno pülhapuju ghenguno pighive tsü nani.

¹⁰ Tinguno alau I no panongu launo alokivi eno amlokiqi ghügha, külapuu külaliu lokivi ghügha, athikütsüghü tu ghügha eno akulu küvü kümtsü kishekhave tsü nani.

¹¹ Ayeghi qhoi kütsape kümsa shive tsüni, shiye hipaqo ye ampe lhotsüni Babylon kükau huthu nani.

¹² Tishino ampe lhotsüni kupuve kethiu I no Babylon kükau eno tipau shiye, Chaldeami yeghi ghime nani, pano kipimi ghenguno alholo ayeghi pighive tsü nani, ipi Ampeu no sheshu.

¹³ I no ayeghi tipau shou pipuku keu tsa kümtsü, eno shiye kümtsü shou Jeremiah no tungkuptsa pikeu kaku hipau lo yepüakeu qhoi shikupu nani.

¹⁴ Kughengu shiye kutomo eno kükamiqo no pano küghape aqüaxemi shinani, I no panongu kümla eno panongu u no mlakeu kiqi lono lochile nani.”

Ampeu Loghu Jukhu

¹⁵ Ampeu, Israel Lhou no ishi I vilo pi: “I u lono aloghu tsaiji jukhu hi ikhilulo, eno I no khuno shiye lau o puwu ani keno kümtsü no sho pelo.

¹⁶ Kughou panongu no ti sho keno kulokili eno izüvuive nani, kughengu I no azütakikihi panongu lau puwu nani.”

¹⁷ Ikehu I no Ampeu u lono ajukhu ikhipe Pa no khuno shiye lau I puwu keno tipaqo pije:

¹⁸ Jerusalem ngo Judah mishighünaqo, kükami ngo hiyampemi, tishikeu lono ishi kutolo panoqo no kiu lo ani keno titoi panoqo pesü yenguyi, atichepu eno ghukusho shive peniye ke;

¹⁹ Egyptmi kükau Pharaoh qemi, hiyampemi eno paw timi kümtsü,

²⁰ eno panongu gholo kitekungo shiaye kümtsü, Uz yeghi eno Philistia yeghi lo kükami (Ashkelon, Gaza, Ekron, eno Ashdod lo ghükulumi);

²¹ Edom, Moab, eno Ammon nuliqo;

²² Tyre ngo Sidon kükami kümtsü, azüghimkü lo kükamiqo;

²³ Dedan, Tema, Buz, eno asa acheku lo tsave keqo;

²⁴ Arabia kükami kümtsü eno kitekungo shiaye asayeqha lo küxümi;

²⁵ Zimri kükami, Elam kükami, eno Media kükami kümtsü;

²⁶ Ahuu kükami kümtsü, putosüu eno akupunu lo ashe lo akeqo, eno ayeghi lo kükaqha kümtsü. Hi kümtsü thiu no Babylon kükau no sho nani.

²⁷ “Tishino panongu vilo pilo, ‘Israel Lhou, aqokitikhi MPEU no ishi piani: Hi shopusü mughule lo, ikiqive no ithughi kevilo, kughengu I no azütakikihi nongu gholo puwu ani.’

²⁸ “Panongu o u lono ajukhu tuchile aye, panongu vilo pilo, ‘Aqokitikhi MPEU no ishi piani: Nongu ye sho masae!

²⁹ Kughengu julo, I no I je lono kukeu mishighüna lo amhekiqi kümla huthu kelo o ghime moveni keshea? O ghime nani pütsae, kughengu I no ayeghi lo küxümi kümtsü ghime nike azütakikihi ku ani, ipi aqokitikhi MPEU no sheshu.’

³⁰ “Tighenguno no ye atsa hipaqo pesü panongu lau tungkuptsa pi masae, panongu vilo pilo: “‘Ampeu no ato lono igha nani, Pa kimthe-a lono mqhu ani; Pa no Pa lojimi shou mghachhoi mqhu nani, eno atsaizü kütsüghümi no ighamku ake toi, ayeghi lo xüküami shou mqhu nani.

³¹ Akumqhu no ayeghi shekha kutolo veküva nani, kughengu Ampeu no shiyeqo akipimi tsü nani; Pa ye lhoxü kümtsü shou küghathabeni cheni, kixikilami ye ghiqhive nani, ipi Ampeu no sheshu.’

³² “Aqokitikhi MPEU no ishi piani: Julo, shiye lakhino lakhi lau amhekiqi phawoni cheni, pasapagha kije no ayeghi shekhau no xukutho ani!

³³ “Tipa ghuloki lo Ampeu no heqhive kemi ayeghi shekha lono ashekha kutolo pekishe wonani. Panongu kümsü qamo, kumqomo, momu akumo shiqhomo nani, panongu ye tübatüzü toi ayeghi lo anani.

³⁴ “Mlo lo, nongu ambekhemi, ighamku lo, ayevu lo ihilo, nongu aloji mpemiqo, kughengu nongu ghiqhive eno kutholeni keu tsala ighivae, nongu ye ayeghi li kivi vepho ketoi iluqive nani.

³⁵ Ambekhemi ghenguno itshükulupu küha nani, momu aloji khemi ye poka kulupu küha nani.

³⁶ Asütsa lakhi, ambekhemi ghügha eno akhemi mpemi kumlo chilu ani! Kughengu Ampeu no pano chuqupu kütsave tsü ani,

³⁷ Ampeu xukighide ghenguno iqünhei akeu loji ye kütsalevae.

³⁸ Abongshuu toi Pa ye Pa ki qhivae, kughengu Pa mlokighide yiküsa eno qhaküsümi zütakikihi ghenguno pano yeghi ye kümsa shivae.”