JEREMIYA 24 - Sumi Naga CL (Re-edited) Bible (BSI)

Akivi ngo Alhoksa Mubuthi

¹ Babylon kükau Nebuchadnezzar no Jehoiakim nu Judah kükau Jeconiah, eno Judah lo kijemi ngo atshamgha kishimi ngo ayi kümlami kughu sasü Babylon lo wuve kethiu Ampeu no kungunhetsü hipau I piye: Julo, mubuthi ashoghi kini Ampeu chineki zülo qhitsü.

² Ashoghi lakhi loye xo tüghüu mubuthi toi, ighono akivi, ashoghi akiniu loye ighono alhoksa mubuthi, alomo mithe kehu chukulupu shimoe.

³ Eno Ampeu no I vilo pi, “Jeremiah, no ye kiu ithulu ani kea?” I no pi, “Mubuthi, ighono akivi mubuthi, eno alhoksa mubuthi, ighono alomove keu, alomo mithe kehu chukulupu shimoe.”

⁴ Tileno Ampeu tsa I lau ighi:

⁵ “Ampeu, Israel Lhou no ishi piani: Mubuthi kivi hipaqo toi, I no khunoqo Judah lono Chaldeami yeghi lo akughu shi puwuve akeno tipaqo ye akivi kepi kihi nani.

⁶ Akivipu ghenguno I nhethi no panoqo shou anani, eno ayeghi hipau lo panoqo sachile saghi nani. Ni ye panoqo xaleqhive mono shiqhe nani, panoqo nhüvemo no shosü nani.

⁷ I no panoqo pelo Ni ye Ampeu kepi ithi kepu mlo panongu tsünani, tishino panongu no Iw timi shi eno I no panongu Lhou shi nani, kughengu panongu ye amlo kuchopu no I lau xaide ighi nanie.

⁸ “Ikemu Ampeu no ishi piani: Judah kükau Zedekiah, paw kijemi eno Jerusalem lo ghükulumi khunoqo ayeghi tipau lo ani keno, eno Egypt yeghi lo xü akeqo shou I no chukümlapu mubuthi toi shitsü nani.

⁹ I no khile panongu hapuwuni keno ayeghi lo kükaqha kümtsü lau panongu pesü aküighüpu, thoküghapu, küghakichepu, atichepu, eno angusüpu shitsü nani.

¹⁰ Panongu eno pano puasüqo tsükeu yeghi lono qhoi kütsaleve moke kutolo I no azütakikihi, püqümiye, eno püsa panongu shou puku nani.”