JEREMIYA 23 - Sumi Naga CL (Re-edited) Bible (BSI)

Amikucho Loka

¹ “Ambekhemi khunono I luza lo ambe kütsave eno kutholeve tsü keno ahaküsapue!” ipi Ampeu no asheshu.

² Ikehu Israel Lhou, Ampeu no ambekhemi khunono Iw timiqo tucho cheni keno panongu vilo ishi piani: “Nongu no I mbeloji kuthole eno hapupove no panoqo jukütsü moe. Ikehu julo, nongu no alhoksa kümla shike ghenguno I no ghime nani, ipi Ampeu no asheshu.

³ Tileno I no ghükulumi aghakhu khile panoqo hapuwuve keno ti kümtsü lono hekütsü sawo pano lojilo qhinani, panongu ye pithi kighishe eno alau ikowo nani.

⁴ I no panongu tucho mjoni kemi akhemi qhinani, panongu ye msa kithemo nani, shithüghüive, momu lakhimu pühavemo nani, ipi Ampeu no sheshu.

⁵ “Jualo, Ampeu no asheshu, I no David ghenguno amikucho Loka lakhi süqheni keu tsala cheni, pa no akükau shino alokütsü lono ayepe nani, eno ayeghi lo kuchou xakütha ngo achipiu mikucho anani.

⁶ Pa ghuloki lono Judah xaluve nani, eno Israel ye sükusho lono xünani. Pa je hipau ku nani: ‘Ampeu ye niw achipiu mikucho.’

⁷ “Tighenguno, julo, Ampeu no asheshu, panongu no ishi pimoni keu tsala cheni, ‘Ampeu xüani ke Pa no Israelmi Egypt yeghi lono saipeghi,’

⁸ ikemu ishi pi nani, ‘Ampeu xüani ke Pa no haküghütsü puwuve keu ghakhu eno ahuu ghakhu lono Israel kibolomi saipeghi.’ Tishino panongu ye pano yeghi lo xüsülu nani.”

Kimkimi Tungkupmi

⁹ Tungkupmi ghenguno: I mlo alou no itapinyi ani; I ghi kümtsü süküthü ani; ni ye shokümzümi toi ani, atsaiji shomzü kemi toi ani, Hi ye Ampeu ghenguno eno Pa kimthe tsa ghenguno ke.

¹⁰ Kughengu ayeghi ye asalhami no chhitoivae; ghukusho ghenguno ayeghi no mlo ani eno asayeqha lo atsüni kümtsha no thizümüivae. Panongu laghi ye alhoksa eno pano kumto ye achipi kumoe.

¹¹ “Tungkupmi ngo achinemi ye Alhou kümthami; I kilou ghi Ni ye panongu lhoksa ithulu püani, ipi Ampeu no asheshu.

¹² Ikehu pano laghi ye aküzü lo nekiphe kepu laghi toi nani, tilau no panongu ye ikiqive nani, pano ghimeke mpe lo I no pano shou amhekiqi süghi nani, ipi Ampeu no sheshu.

¹³ Samaria lo tungkupmi gholo I no angaghai keu thime ithulu: panongu no Baal jelono tungkuptsa pi eno Iw timiqo saküghüzüve.

¹⁴ Ikemu Jerusalem tungkupmi gholo Ni ye aküighüpu ithulue: panongu no salha eno miki cheni; alhoksa kümlami shikumto, ikehu khunomu alhoksa lono tsüghü ighimoe; I zülo panongu kümtsü Sodom ngo Gomorrah timi toivae.”

¹⁵ Ikehu aqokitikhi MPEU no tungkupmi vilo ishi piani: “I no khumtsai keu chuqupu pesü panongu lojini eno tüghü zü pesü ye penike panongu piyeni, kughengu Jerusalem tungkupmi launo Alhou kümtha khuaye ayeghi kümtsü lo wuvae.”

¹⁶ Aqokitikhi MPEU no ishi piani: “Tungkupmi no adou lajupu tungkuptsa pesü nongu shepichhi keu ini kevilo. Panongu ye Ampeu launo kumono pano kükümsü lono ipeghi keu kungunhetsü tsa piani.

¹⁷ Panongu no Ampeu tsa thaigha chekemi vilo tamono picheni: ‘O ghenguno akivipu ani’; eno kuthovi ghi amlo pape chekeu vilo picheni, ‘O shou amhekiqi ighimo nani.’”

¹⁸ Ikemu panoqo dolo khuu no Ampeu ithulu eno Pa tsa chiluni ke Pa hoho lo puthugholu, momu amlo tsüqhiyi Pa tsa ini eno chilu kea?

¹⁹ Julo, AMPEUw pasapagha! Aloghu ye miyitsü pasapagha toi cheni; tino kixikilami kütsü shou no mpale nani.

²⁰ Ampeu mlokighide ye Pa no kughu akeu shikhave moke kutolo süchilemo nani. Athiu tsala lono nono mtsümishei vethalu nani.

²¹ “Ni ye tungkupmi puwumo keghi panongu no piwuvae; Ni ye panongu pütsamo keghi panongu no tungkuptsa pike.

²² Ikemu panongu no I hoho lo puthugho ke aye, panongu ye I tsa pesü Iw timiqo vilo pikülha luniche, eno pano kümla lhoksa lono sachile süghi luni cheke.

²³ “Ampeu no asheshu, Ni ye akupunu lo Lhou likhi kumono putou Lhou ghike kumo?

²⁴ Timi lakhi ye I no pa ithumla kepushi tuqhou-a lo itshülu nanio? ipi Ampeu no sheshu. I no atsütsü eno ayeghi shepichhi ke kumo keshea? ipi Ampeu no asheshu.

²⁵ Tungkupmi no I je lono akimki tungkuptsa ishi pikeu I no chiluvae, ‘I no asamo pumova, I no asamo pumova!’

²⁶ Khikutolo panongu mlo lo pishikiqhi lono akimki tungkuptsa pi anani kea?

²⁷ Asamo lakhi no lakhi vilo lhe aye, pano puasüqo no Baal kümlla vecheo I je kümsümave ketoi, Iw timiqo ghi I je kümsümave nanie pi panongu no kümsü cheni.

²⁸ Tungkupu khuu no asamo pumo ani keno pa samo pipelo, ikemu khuu no I tsa piani keno pa ye pükhükulupu shi pilo. Aghijini ye kiu lono athi sasü aqü shini kea? ipi Ampeu no sheshu.

²⁹ I tsa ye ami toike, eno ayihesü no atuqu amuno shi hephove keu toike kumo? ipi Ampeu no sheshu.

³⁰ Tighenguno julo, Ampeu no asheshu, Ni ye tungkupmi khunono lakhi no lakhi launo I tsa püka luve cheni keno tipaqo mjochile ani.

³¹ Julo, Ni ye tungkupmi khunono pano mili peitha no, ‘Ampeu no sheshu ani,’ ipi cheni keno tipaqo mjochile ani.

³² Julo, Ni ye khunoqo no akimki samo tungkuptsa picheni keno pano mjochile ani, ipi Ampeu no sheshu. Ni ye panongu puwu püamo eno ghutumo keghi panongu no kühakügha kimki lono Iw timiqo vilo pi eno saküghüzü sawu cheni. Ikehu panongu ye timi hipaqo launo kiumu ala shimlae, ipi Ampeu no sheshu.

³³ “Timi hipaqo gholo lakhino, momu tungkupu, achinemi lakhino o vilo, ‘Ampeu pekimshi ye kiu kea?’ ipi ighiju aye, panongu vilo pilo, ‘Ape kimshi ye no ke, I no o peve nani, ipi Ampeu no sheshu ani.’

³⁴ Tungkupu, achinemi, momu timi lakhino, ‘Ampeu pekimshi,’ ipi aye, I no timi tipau kibolomi ghime nani.

³⁵ No ye ishi pini, pütüta kisüghümi lau, pütüta thiküzümi lau, ‘Ampeu ye kiu khochile kea?’ momu ‘Ampeu ye kiu pi kea?’ ipini.

³⁶ Ikemu no ye khilemu ‘Ampeu pekimshi’ ghili pi kevilo, kughengu ape kimshi ye timi lakhikhi tsake, no ye aküxüpu Alhou, aqokitikhi MPEU, ni Lhou tsa tuchighive ani.

³⁷ Tighenguno no ye tungkupu vilo pilo, ‘Ampeu ye kiu o khochile kea?’ momu ‘Ampeu ye kiu pi kea?’

³⁸ Ikemu nono, ‘Ampeu pe kimshi,’ ipi aye, Ampeu no ishi piani, I no o puwu kelo, “No ye ‘Ampeu pe kimshi’ ipi kevilo” pi kemu, Nono atsa hipau, “Ampeu pe kimshi,” ipive ake ghenguno,

³⁹ julo, I no kuchou no nongu ikhiqhepe I nhethe lono peveni, no eno o puasüqo tsükeu mishighüna ghi peveni.

⁴⁰ I no nongu shou alholo sakiyi keu eno pülhapuju kümsümamo kepushi akukujo süghi tsüni.”