JEREMIYA 22 - Sumi Naga CL (Re-edited) Bible (BSI)

¹ Ampeu no ishi piani: “Judah kükau kilo iqi no hipa tsa pilo,

² “Ampeu tsa inilo, O Judah kükau, David kükalakhü lo iqa akeu, no eno o qemiqo, eno khagho hipaqo lo ilo chekeqo.

³ Ampeu no ishi piani: Kuchou xakütha eno achipiu mikucho shilo, eno püka luve tsüno itaghi aküpkau no qhasüpe akeu xaphe lulo. Inaghami, mighimi, eno chimemi lau anguka eno akumou shi kevilo, a-a hipau lo pimihami ji pele kevilo.

⁴ Nongu no kuchou no atsa hipau gholu aye, David kükalakhü lo iqa akemi kükamiqo no khurkulu eno khurshi sasü kijemi ngo timiqo no pape no kükaki hipau khagho lo ilo nani.

⁵ Ikemu, Ampeu no asheshu, nongu no hipa tsa gholumo aye, Ni ampi no tushoqhi ani, kükaki hipau ye pighive nani.

⁶ Kughengu Judah kükau kibo ghenguno Ampeu no ishi piani: “‘No ye I ghenguno Gilead toike, Lebanon toghi kütsüqa toike, tishimu I no kuchou no o pesü asayeqha eno pighive keu mishighüna shive tsüni.

⁷ I no o lau shiküpsami puwuni, pütüta ghünanu xapu panoqo no o pulou Cedar sübo yeqhipe ami lo vesüve nani.

⁸ “‘Shiye kutomo no mishighüna hipau vechewu kelo milakhi no pa kisüghüu vilo pi nani, “Ampeu ye kushiye mishighüna hipau shou hitoi mlave kea?”

⁹ Panongu no khochile nani, “Kughengu panongu no pano Lhou AMPEUw puloshoqhi pheve no kütau lhouqo mlla eno qeuve ke.”’”

¹⁰ Thive keu ghenguno qa kevi momu amlo iju kevilo, ikemu akughu lo wuve kemi ghenguno mloqa lo, kughengu pano ye ideighi no pano ghüna ithulumae.

Josiah Nuliqo lau Atsape

¹¹ Ampeu no Josiah nu Judah kükau Shallum, khuu papu theli lo ka apüzü hipa-a lono wuve akeno, pa ghenguno ishi piani: “Pa ye hile ideighi moae,

¹² ikemu a-a khile pa pesü akughu lo puwuve akeno pa ye tileno thiniae, eno khilemu ayeghi hipau ithulu kithemae.”

¹³ “Khuu no amikucho kumo lono pa ki shipuku, achipikumo lono kunguu chebo mla keno, khuu no adou lono pa kisüghümi pelo pa qepe no ajume tsü chemo keno pa haküsapue,

¹⁴ pa no picheni, ‘I no I sala aki kije mlano kunguu achebo ililai mlani,’ pa no alashe mlano cedar süpa pesü akupuwu shino huchuyi keu pesü tipau nuda cheni.

¹⁵ Nono Cedar kutomo ani kehu no ye akükaue pi kümsü anio? O pu no chusho eno achipiu ngo amikucho shike kumo? Tino pa ghenguno akivi shilue.

¹⁶ Pa no mighimi eno kumlhomi ghenguno mlae; tino pa ghenguno akivi shilue. Hi ye Ni ithikeu kiqike kumo? ipi Ampeu no sheshu.

¹⁷ Ikemu nono o nhethi eno o mlo akeu ye achipi kumo lono ala shinikeu, pimihami ji peleni keu eno anguka lono qhasü nike ghengu likhino ke.”

¹⁸ Tighenguno Ampeu no Josiah nu, Judah kükau Jehoiakim ghenguno ishi piani: “Panongu ye pa ghenguno mloqa ghi pimo nani, ‘Aha, I thiküzüu!’ momu ‘Aha, I chepu!’ Panongu ye pa ghenguno mlo ghi pimo nani, ‘Aha, Ampeu!’ momu ‘Aha, anguagha küau!’

¹⁹ Khurha kumo kuqho toi pa shiqho nani, Jerusalem khaghoqo nguno khalau pa sünhe sawuve nani.”

²⁰ “Lebanon lo iqho no igha lo, Bashan lono o sütsa süqhelo; Abarim lono ighamku lo, kughengu nono kimiye chekemi kümtsü kütsavae.

²¹ Nono kinikülü shi akelono I no o pütsae, ikemu nono pi, ‘Ni ye inimoe.’ O lhothe lono no ye khilemu I tsa lumoe, hi no o laghi ke.

²² Amülhü no ow ambekhemi kümtsü fusawuve nani, o sakuphumi kümtsü akughu lo sawuve nani; tileno now küsakügha ghenguno nono kujove no atiche punani.

²³ O Lebanon lo küxümiqo, Cedar kilo akeqo, topumi no apunu küsü sü aketoi nongu shou kushuküqha ikughi kelo kishi kimiye kepu shinani kela!”

²⁴ “I no xüake toi, Ampeu no asheshu, Jehoiakim nu, Judah kükau Coniah no I u ajeu jedapu anguthi shiaghi namu, I no no ikhive nani,

²⁵ eno o küxü phuche kemi, nono khuu msa ani keno, Babylon kükau Nebuchadnezzar eno Chaldeami u lo phesüve tsüni.

²⁶ No eno o za o punuu pesü o punumo keu ghakhu lo I no kihi puwuveni, eno nokujo ye tilano thive nani.

²⁷ No ye khilemu nono kümsü akeu yeghi lo ideighimo nani.”

²⁸ Coniah hipau ye atichepu, hephove keu li, khunomu lumove keu li keo? Kushiye pa eno pa tianuli ye pano no mtha keu yeghi lo kihi puwuve akea?

²⁹ O ayeghi, ayeghi, ayeghi, Ampeu tsa inilo!

³⁰ Ampeu no ishi piani: “Timi hipau ye anuhami kepi yepe qhilo, pa ye pa küxü lo tokulu shimo nani, kughengu pa kughukomi khumu David kükalakhü lo iqa no Judah lo ayepe lumoae.”