JEREMIYA 21 - Sumi Naga CL (Re-edited) Bible (BSI)

Jerusalem Ikiqive

¹ Akükau Zedekiah no Malchiah nu Pashhur ngo Maaseiah nu achineu Zephaniah hape Jeremiah lau puwu kelono Ampeu tsa hipau Jeremiah lau ighi. Pama no pi,

² “Ampeu vilo ningu ghenguno ighiju tsülo, kughengu Babylon kükau Nebuchadnezzar no ni sasü aghü shiniye ani. Ishiake Ampeu no Paw akichiqhipu kümla ni lau mlatsü no ni launo pa hachileve tsü luvie.”

³ Tile Jeremiah no pama vilo pi: “Zedekiah vilo ishi pilo,

⁴ ‘Israel Lhou, Ampeu no ishi piani: Julo, Babylon kükau eno Babylonmi khunoqo atupikiye khalacheu no nongu khasüpe ani keno, nongu no panoqo sasü aghü shiniye nongu u lo aghünanu pe akeqo I no nongu shou pukuve tsü nani. I no mishighüna hipau lo panongu kümtsü sailoghi nani.

⁵ Ni ampi no au xachhope au kumto pesü axukighide, mqhumza eno aloghu kije lono nongu sasü aghüshi nani.

⁶ I no mishighüna hipau lo küxümi, timi eno tüghashi kütsale nani. Panongu ye püsa kije lono thive nani.

⁷ Tithiu, Ampeu no asheshu, I no Judah kükau Zedekiah, pa qemi, eno mishighüna hipau lo khunoqo püsa ngo azütakikihi eno akhüava lono püxülu keno tipaqo pesü pano ghümi, pano küxü phuighi kemi, Babylon kükau Nebuchadnezzar u lo süvetsü nani. Pa no azütakikihi pesü panongu ghiqhive nani. Pa ye panoqo ghümo momu küpüqhiyi monani.’

⁸ “Timi hipaqo vilo pilo: ‘Ampeu no ishi piani: Jualo, I no nongu zülo aküxü ngo akithi laghi qhitsü ani.

⁹ Khuu no mishighüna hipau lo ani keno azütakikihi, püqümiye, eno püsa lono thive nani, ikemu khuu no Chaldeami nongu khasüpe akeqo lau liqhipe tsüveni keno pa ye xülu nani eno aghüshi lono aküxü pükhalu nani.

¹⁰ Ni ye mishighüna hipau shou akivipu kumono aküsapu ghenguno I kupulo shivae, Ampeu no asheshu: ti ye Babylon kükau u lo süvetsü nani eno pa no ami no pitive nani.’

David Kibo lau Atsape

¹¹ “Judah kükau kibo vilo pilo, ‘Ampeu tsa inilo,

¹² O David kibo! Ampeu no ishi piani: “‘Ina atsütsü lo kuchou xakütha peitha lo, pükaqhive no itaghi qhasüpe akeu xaphe lulo, tikumo aye nongu kümla lhoksa ghenguno I loghu no ami toi ghapinhe mlano piti nani.’”

¹³ “Julo, O akhila eno aqa lo atuqu lo küxümiqo, Ni ye nongu mjochile ani, ipi Ampeu no asheshu; nongu no picheni, ‘Khuu no iqighi no ni mjochile eno ni kungo-a lo iloghini kea?’

¹⁴ Nongu kümla xathi kiqi lono I no nongu ghime nani, ipi Ampeu no asheshu; I no li ghasü lo ami süvetsü eno tino li hokümxa kümtsü pitive nani.”