JEREMIYA 20 - Sumi Naga CL (Re-edited) Bible (BSI)

Pashhur no Jeremiah Kijipüsa

¹ Immer nu Pashhur, khuu Ampeu kilo atou keno, pa no Jeremiah no tungkuptsa pikeu chilu.

² Pa no Jeremiah tungkupu heqhi, eno Ampeu ki Benjamin Khagho lashou khathape qhive.

³ Thoghiu Pashhur no Jeremiah khaqhiphe kelo Jeremiah no pa vilo pi, “Ampeu ye o je Pashhur kumono Ako kümtsü lo Akümsapu ipi kutsüe.

⁴ Ampeu no ishi piani: Julo, no eno o küsami ghenguno I no akümsapu shitsüni. Nono ju aphi lono panongu ye aghümi zütakikihi lono ikiqive nani. Judah ye qhoi Babylon kükau u lo süvetsü nani. Pa no panoqo akughumi shi sasü Babylon lo wuve nani eno azütakikihi no panongu ghiqhive nani

⁵ Tinguno alau, I no Judah kükau, mishighüna hipau eno tile akini, tinhemgha, akughupu mheghi eno Judah kükau küakini kümtsü pesü aghümi u süvetsü nani, panongu no Babylon lo ti xülepe wuve nani.

⁶ Eno no Pashhur ngo Ampeu kilo kungomi kümtsü akughu lo wuve nani. No eno o küsami khunoqo vilo nono kichile tungkuptsa piche keno kümtsü Babylon lo wuve no tilauno thive no tilau qhove nani.”

⁷ O Ampeu, Nono I pishiqhivae; No ye I nguno akumtou, eno Nono toluvae. Ni ye atsala kupuju azükutunupu shiauvae; kümtsü no I thaigha anie.

⁸ Kughou I no atsa pini keno, ni ye ighamku, “Hekiqhi eno kütsakungo” ipi cheni! Kughengu Ampeu tsa ye I ghenguno tsala kupuju atiche eno cheqhi keu ke.

⁹ I no, “Ni ye Pa je pimoae, eno Pa je kumoae,” ipi aye, Pa tsa no I mlo lo eno I saghilo ami toi pitiqhi cheni, ni ye tipau mtupe ngokeu no qeive no tokümlapu shivae.

¹⁰ Kughengu I no chhuchhushi keu sütsa chilu ani. Akümsapu no ako kümtsü lo ani! “Pa pipüthave lo, ningu pa pipüthani!” ipi I poshumi kümtsü no pi ani, I pelo ikiqive penike khe ani. “Pa pishiqhive luve aye nino pa shou toluve nani eno pa shou ningu mkhülu nani.”

¹¹ Ikemu Ampeu ye akümsapu ghütomi toi I gholo ani; ikehu I ghime akeqo ye küpxalu nani; panongu ye I shou tolumo nani. Panongu no tomlave kehu akukujopu kije shinani. Panow lhokta kukujo huye khilemu kümsümamo nani.

¹² O aqokitikhi MPEU, khuu no amikuchomi peju cheni, amlo akükümsü ithulu cheni keno, I pelo Nono panongu shou amkhü lukeu ithulu pelo, kughengu ni ampi pesü O lau kulhuqhivae.

¹³ Ampeu lau ale phelo; Ampeu sheqhelo! Kughengu Pa no kixikilami u lono kumlhomi küxü xaphelue.

¹⁴ I punu keu tsala müsüinive tsülo! I za no I punu keu tsala ye müghamo keu shipelo!

¹⁵ I pu vilo, “No ye anu ithuluvae,” ipi asütsa süghi no pa lopivitsü keu pelo angusü shive pelo.

¹⁶ Timi tipau ye Ampeu no küpümo no mishighünaqo haleve ketoi pelo; pa pelo inaqhe aküqa chilu pelo eno puchou kütüghü keu sütsa chilu pelo,

¹⁷ kughengu pa no atita lono I pithive moe; tishike aye I za tita no I kumo kilive shiveni cheke, li tita no alholo kije shini cheke.

¹⁸ Ni ye kushiye aghime ithulu eno akukujo lono I küxü asheho niye atita lono ipeghi kea?