JEREMIYA 2 - Sumi Naga CL (Re-edited) Bible (BSI)

Israel no Ampeu pheve

¹ Ampeu tsa I lau ighi no pi,

² “Wulo eno Jerusalem no chikulupu shi asheshu lo, Ampeu no ishi piani, “O lhothe lo mlokütsü, kishi külaliu lau toi nono I kimiye, asayeqha, chimo keu yeghi lo, kishi nono I pape keno I no kümsülu ani

³ Israel ye Ampeu lau akimthe shiche, Paw ghilelo xathi amsüu. Ti chukemi kümtsü küqüve; pano shou ahaküsapu ikughive, ipi Ampeu no sheshu.”

⁴ O Jacob kibolomi, eno Israel lagha lo akibo kümtsü, Ampeu tsa inilo.

⁵ Ampeu no ishi piani: “O puasüqo ye I lau achipikumo kiu ithulue pi panongu ye I launo putosü lo wuve, eno ameküküha pape wuve no ame kühave kea?

⁶ Panongu ye ishi pimoe, ‘Egypt yeghi lono ningu saipeghi no yenguyi ke-a, asayeqha eno anhepho yeghi lo, züha yeghi eno aküzü kutho khunomu kathamo eno küghüna mokeu yeghi lo ni sawu keu Ampeu khile ani kea?’

⁷ I no kupukuno shi akeu yeghi lo axathiqo eno thime kivi chulu penike nongu saghi ke. Ikemu nongu no iloghi kelo, I yeghi shipixive eno I mheghi pesü aphikümqhüpu shivetsü.

⁸ Achinemi ye ishi pimoe, ‘Ampeu ye khile ani kea?’ Ayezah kipemi no Ni mthae, ambekhemi no I shou axine shive, tungkupmi no Baal je lono tungkuptsa pi eno ala shimo keu thime pape wuveke.

⁹ “Ikehu Ni ye o mjochile aphi, Ampeu no asheshu, eno no tianuli tianuliqo mjochileni aphi.

¹⁰ Cyprus xüsa veche wuno julo, momu Kedar lo puwu no tsaqüi chhejulo; tile hitoi keu thime ani mala julo.

¹¹ Shiye lakhi ye alhou kumomu pano lhouqo kilive cheni keshea? Ikemu Iw timiqo ye pano jekipi pesü ala küha keu küsükilivae.

¹² O atsütsü, akichiqhi lo; thüghüi lo, küghüküghalei lo, Ampeu no asheshu,

¹³ kughengu Iw timiqo ye axine kini shivae: panongu ye Ni aküxü züpuki phevae, eno pano sala azü tughuko, azü mighemla keu akughupo zütughuko mlake.

¹⁴ “Israel ye aqüaxeu keo? Pa ye apunu lono aqeu keo? Imaye kushiye pa ye tsüchuve keu lakhi shive kea?

¹⁵ Abongshuu no igha pa kichi; panongu no ighono ighae. Panongu no pa yeghi pighive tsüe; pa phughiqo ye ixapinyi, küghünani kemi kühae.

¹⁶ Itaghi Memphis ngo Tahpanhes timi no o boghe kubove tsüae.

¹⁷ Pa no alaghi lo o sawu kelo nono Ampeu o Lhou pheve keu lono hipaqo o shou süghi anike kumo keshea?

¹⁸ Nile zü yenike Egypt lo wuke kumo aye no ye kiu shiwu kea? Momu Euphrates zü yenike Assyria lo wuke kumo aye no ye kiu shiwu kea?

¹⁹ O lhoksa no o ghimeqhi nani, o hekibede no o sakiyi nani. O Mpeu Alhou pheve keu ye alhoksa eno khumtsai kepi ithilo, I sümsa keu o lolo kühae, aqokitikhi Mpeu Alhou no sheshu ani.

²⁰ “Khaghi no I no ow kuokhasü hephove tsü eno o kütsüghaqo süthave tsü kemu nono pike, ‘Ni ye O qemoe.’ Iyei, atoghi kümtsü lo eno asübo kümtsü qholo nono kütüqhalimi toi ihozü ke.

²¹ Tishimu akighiche tsaibo, qhoi tsüghükhüi keu piti toi I no o shosü ke. Imaye kishino no ye tsüuve no aghalo tsaibo shive kea?

²² Nono asalu jeli kutomo pesü o qhüve anamu o xine no hedave keu ye I zülo aphie, Ampeu Alhou no asheshu.

²³ No ye kishino ‘Ni ye Baal lhouqo lau wu püamo ke kitiqe mphi,’ ipini kea? Akhila lo o laghi julo; nono kiu mlave akeno ithilo, sayeshi lhothe no ngosümla no hile hule powu aketoi,

²⁴ aghalo khurha no asayeqha lo külhübei kelau no amülhü müsüsü aketoi ani! Khuu no li kimne ghasü luni kea? Li phuwu kemi khumu lhove chemo, li no kipewu kelo panongu no li phuluve nani.

²⁵ O pukhu kümsa shive moke kutolo eno o kughoki qhaive moke kutolo po kevilo. Ikemu nono pi, ‘Hi ye akiqi kühae, kughengu ni ye inaghami kimiyeve ake pano pape wuni.’

²⁶ “Küpkami lakhi küghaluve kelo shikukujo cheke toi, Israel kibo shikukujo nani: panongu, pano kükami, kijemi, achinemi eno tungkupmi,

²⁷ Nongu no asübo vilo, ‘No ye I pu,’ eno atu vilo, ‘Nono I punu ke,’ ipi cheni. Kughengu panongu no agi I piye mono kughope azübo I tsüke, Ikemu pano veküsa loye, ‘Ithughi no ni xalulo!’ ipike.

²⁸ Ikemu nongu no mlakeu lhouqo khile ani kea? O Judah, no veküsa lo nongu xalu kepushi aye pano pelo ithughi pelo; kughengu now mishighünaqo khije ani keno no lhouqo ghi tijehi ani.

²⁹ “Nongu ye kushiye I mjochile ani kea? Nongu kümtsü no I shou axine shivae, Ampeu no asheshu.

³⁰ Ni ye adou lono no tianuliqo heqhivae; panongu no shikithe kütsü ikhilu tsümoe; abongshuu yiküsa toi nongu züta no now tungkupmi ghiqhivae.

³¹ O nongu tiqhelimi, Ampeu tsa jukuto lo. Ni ye Israelmi ghenguno asayeqha momu aküzü shishoi keu yeghi shive akea? Imaye Iw timiqo ye kushiye, ‘Ningu ye ililai ani, ningu ye khilemu O lau ighimoae,’ ipi cheni kea?

³² Amikucho ilimi lakhi ye li chila kümsümave nanio, momu külaliu ye li phimini kümsümave nani keshea? Ikemu Iw timiqo no atsala kihimla kepushi I kümsümavae.

³³ “No ye kishita o la shesü kikimiye phuwu kelae! Tishi kehu kixikila totimiqo ghi nono o laghiqo shika ke.

³⁴ Pimimo kemi kumlhomi no hepho ilo pükamo keghi nongu phiküzü lo pano küxü ji ithulue. Hikithipu shinamu

³⁵ nono pi, ‘Ni ye akipimi kühae, mtsüqheino Pa mlokighide ye I launo tsüghü wuvae.’ Julo nono, ‘Ni ye axine shipüamoe’ ipike ghenguno I no o pesü küghaküthapu lo saghini.

³⁶ Ghuthu khijehi no ye o laghi kilive acheni kelae! Assyria no o shikukujo ketoi Egypt no o shikukujo nani.

³⁷ Hipau lo ghi no ye o u no o kütsü nhape wu nani, kughengu nono pükhübe akeu ye Ampeu no kilevae, eno no ye pano vecheo ikoishe lumo nani.