JEREMIYA 19 - Sumi Naga CL (Re-edited) Bible (BSI)

Kuboleve keu Külabo

¹ Ampeu no ishi piani, “Wulo, alikümlauw ayeghi külabo qhülo, layemi khami, achinemi asachumi khami sasü

² Alitsa Khagho kulaghi lo Hinnom Nu Khila lo wulo, eno I no kiu o vilo pini keno tileno asheshu lo.

³ Nono pini, ‘Ampeu tsa inilo, O Judah kükami eno Jerusalem lo küxümiqo. Aqokitikhi MPEU, Israel Lhou no ishi piani: Julo, I no kütsakungo keu a-a hipau lo süghini cheni, hipau chilu kemi kümtsü kini lo qüqüshi chilu nani.

⁴ Kughengu timiqo no I pheve no panongu eno pano puasüqo momu Judah kükami nomu mtha keu kütami lhou lau akümllagho tsüwuve keu lono a-a hipau shipixivae; eno pimihami ji pele keu pesü a-a hipau chhitoivae,

⁵ eno Baal lau qhemghai ke-a shiqhe puku no pano nuliqo ami lono piti pe Baal mlla niye shike, hi ye I no azah tsümo keu momu I kükümsü lomu iloghimo keu,

⁶ tighenguno, Ampeu no asheshu, jualo, atsala cheni, hipa-a ye Topheth momu Hinnom Nu Khila ipi kumove nani, ikemu Ghikiqhi Khila ipi nani.

⁷ A-a hipau lono I no Judah ngo Jerusalem kukughu kümsa shivetsü nani, pano timiqo ye ghüyi lono wove nani, eno pano küxü phuche kemi u lo ilove nani. Panongu kumo ye aghau eno tüghashi chuqupu shive nani.

⁸ I no mishighüna pesü akümsapu shivetsü, atichepu thime kughulhove tsü nani. Tipau veche kemi kümtsü no kichimamaive nani eno aghüzaku jukünatha nani.

⁹ I no pano pelo pano pu-angaqo shi chupe nani, aghümi eno pano küxü luve tsünike phuighi kemi no pano khasü luve kelo aveküsa lono panongu no pano kisüghümi shi chunani.’

¹⁰ “Tileno o gholo sawu keqo nhethe lono akülabo hepholo,

¹¹ eno panongu vilo pilo, ‘Aqokitikhi MPEU no ishi piani: Alikümlau yeghi li hepho keshi I no timi eno mishighüna hipau hepho nani, eno khilemu kime mlave nani. Asükumo ye Topheth lo qho nani kughengu qhokepu-a kütau kühave nani.

¹² Hipa-a eno timiqo pesü I no hitoi shive tsü nani, Ampeu no asheshu. I no aphughi hipau Topheth toive tsü nani.

¹³ Jerusalem ngo Judah kükami kiboqo eno aki khijeno akütsüqa lono akümllagho pe aqhi ayepu mllauve, eno atsaiji kümllagho pesü kütau lhouqo lau lephetsü keno, kümtsü Topheth toi kitiqevae.’”

¹⁴ Tithiu Jeremiah ye Ampeu no Topheth lo tungkuptsa pi penike puwu keu lono ighi, eno Ampeu kikhala lo puthugho no timiqo vilo pi:

¹⁵ “Israel Lhou, Aqokitikhi MPEU no ishi piani, julo, I no kütüghü püake toi mishighüna hipau eno mishiphu kümtsü lo amhekiqi süghini cheni, kughengu panongu no I tsa ini mono kuthovi auveke.”