JEREMIYA 18 - Sumi Naga CL (Re-edited) Bible (BSI)

Alikümlau eno Aghani

¹ Ampeu tsa Jeremiah lau ighi:

² “Ithulo, eno alikümlau kilo iqilo, tileno o pelo I tsa chilu peni.”

³ Ikehu I no alikümlau kilo iqi, tile pa ye aliho lo mla aghi.

⁴ Pa no aghani pesü ali mla akeu ye pa u lono ipove, ikehu itaghi pa no mlanishi akeu ghola lono ali kütau mlakithe.

⁵ Tileno Ampeu tsa I lau ighi:

⁶ “O Israel kibo, alikümlau hipau no shike toi Ni ye nongu mlalu moni keshea? ipi AMPEU no asheshu. Julo, alikümlau u lo aghani aketoi, nongu ye I u lo ani, O Israel kibo.

⁷ Kugho kughomu shiye momu kükaqha lakhi I no nhüve, xaleqhive eno kütsaveni ke ghenguno kütüghü kelo,

⁸ I no ghutuve keu shiye no alhoksa kümla lono xaideve aye, I no amhekiqi kümla shini pi kughuve keu lono I kükümsü kilive nani.

⁹ Tsala shiye momu kükaqha lakhi I no shiqhe puku eno shosüni pinamu,

¹⁰ tipau no I zülo alhoksa kümla shino I tsa lumove aye, akivi shinipi kughu akeu lono I kükümsü kilive nani.

¹¹ Tighenguno itehi, Judah ngo Jerusalem lo küxümi vilo pilo: ‘Ampeu no ishi piani, Jualo, Ni ye nongu shou amhekiqi eno amqü kuchughu ani. Kümtsü no pütüta kümla lhoksa lono ideighi lo, no laghi eno no kümla lhoksaqo shikithe luvelo.’

¹² “Ikemu panongu no pi, ‘Ti ye adoue! Ningu ye ni kukughu pape nani; eno pütüta no kuthovi eno amlo lhoksa shikeu kiqi lono mla nani.’

¹³ “Ikehu AMPEU no ishi piani: Shiyeqo gholo ighiju lo, Khuu no hitoike tsa chilu akea? Amikuchou Israel no shishe akümsapu kümla shivae.

¹⁴ Lebanon mürasü ye Sirion tuxu lono hauve cheni kea? Naghuto zü, aghoki kumko zü ye qhaive cheni keshea?

¹⁵ Ikemu Iw timiqo ye I kümsümavae; panongu no kichile lhou lau akümllagho tsüuve ke; tino mulhou laghi, panongu no cheche keu lo küpxalu pe, eno panongu pelo alaghila lo kumono alaphe lono püla pe,

¹⁶ pano yeghi pesü akümsapu shitsüe, alholo ghenguno atichepu shivae. Tipau veche kemi kümtsü no thüghüi pano kütsü küngüe.

¹⁷ Kipela mülhü toi I no aghümi zülono panoqo kuthole nani. Pano haküsapu tsala lo I no I gi kumono I zübo panoqo piyeni.”

¹⁸ Tile panongu no pi, “Ighilo, ningu Jeremiah shou kuchughuni, kughengu achinemi launo ayezah shiküka tavemo nani, alokütsümi launo mijekütsü eno tungkupmi launo atsa pühave monani. Ighilo, ningu amili pesü pa leni eno pa no kiukiu pinamu ini moni.”

¹⁹ I tsa ini tsülo, O Ampeu; eno I külami sütsa inilo.

²⁰ Alhoksa pesü akivi lochile kepu keshea? Tishimu panongu ye I küxü ghenguno aqo chhuvae. I no panongu kivipu ghenguno, panongu launo O loghu tuchileve penike, O zülo puthugho no pi chekeu kümsülu tsülo.

²¹ Ikehu pano tianuliqo pesü akhüava lo süve tsülo; azütakikihi küka lau tsüvelo; pano nipuqo pelo anuha eno chimemi shive pelo. Kiptimi no püsa lono thi pelo, lhothemi no azütakikihi no ghiqhive pelo.

²² Kughou Nono züleno küpkami pano lau saghini keno pano ki lono aküqa chilu pelo. Kughengu panongu ye I kitime nike aqo chhuvae, eno I pukhu meluve nike alichhe shivae.

²³ Ikemu O Ampeu, panoqo no I pithini ke amqü shi akeu Nono ithi ani. Pano kipimi qhitsü kevilo, momu O zülono pano xine nuxave tsü kevilo. O zülono panongu ikhive lo; O mlokighide lono pano kuto tsülo.