JEREMIYA 17 - Sumi Naga CL (Re-edited) Bible (BSI)

Judah Xine

¹ “Judah xine ye ayi yesüta pesü yepüani, mlaputu mtsüsüi keu pesü panongu mlo tulupha eno pano kiptia kibo lo kixipuku püani,

² pano tianuliqo no asübo eno qhemghai keu toghi lo pano kiptia eno Asherim akeqo kümsülu nani.

³ Aghakhu lo naghuto, qhemghai ke-a eno küakini ngo akini khuki kümtsü nongu xine ghenguno le ighi kemi lau agho lakhi shi tsüpuwuve nani.

⁴ Nongu ye I no tsükeu mheghi au lono lekhove nani, eno I no nongu no mthakeu yeghi lo nongu ghümi qemi shiuvepe nani, kughengu I mlo kighide lono alholo iqüni keu mi küqüvae.”

⁵ Ampeu no ishi piani: “Khuu no timi shou pükhübeni, aphimpi kumto pükhüni eno Ampeu launo tsüghüveni keno müsüinivae.

⁶ Pa ye asayeli lo asütsüni toi, akivi kiumu ithulumo nani. Pa ye asayeli lo qhaike-a eno amti yeghi lo pa likhi xü nani.

⁷ “Ampeu shou pükhübe kemi, Ampeu pesü pa küpkhü shikemi kümghapue.

⁸ Pa ye azü phivilo asübo shosü püakeu toi, ti ye aghoki lo azü no akuhu pütsütsü cheni, akülü tsala ighimu msamoe, pa nipa ye xüthilei acheni, ti ye züha mpe lomu mlomoe, ti ye axathi pithi tave chemoe.

⁹ Amlo ye thime kümtsü nguno pishikiqhiue, shipivimla kepushi sü ani; khuu no ti vethakulupu kea?

¹⁰ “Ni Ampeu no amlo phuju cheni eno akükümsü peju cheni, timi lakhikhi laghi, pa kümla xathi kiqi lono agho tsücheni.”

¹¹ Timi no kuchokumo lono akini shilu keu ye akhi no yikhu qhimo keu khopheke toike, pa küxü mta lono akini hauve nani, eno ashekha lo anikha shive nani.

¹² Ajekipi kükalakhü abothu lono qhemghai süqhe püakeu ye ni chineki ke.

¹³ O Ampeu, Israel lajupu, O pheve kemi kümtsü akukujopu shinani; khunono O launo pove keno ayeghi lo aje yepüani, kughengu pano ye aküxüpu züpuki Ampeu pheveke.

Jeremiah Kighini

¹⁴ I shipivi tsülo, O Ampeu, eno ni ye viluve nani; I xalulo, eno ni ye xaluve nani, kughengu No ye Iw shekiqhe ke.

¹⁵ Julo, panongu no I vilo pi, “Ampeu tsa khile ani kea? Itehi ighi pelo.”

¹⁶ Ni ye O mbekheu shimono pove mphi, momu ni ye aküsü tsala mine amoe. I mütsü lono kiu ipeghi ani keno Nono ithi ani ti ye O zülo ani.

¹⁷ I shithüghüi tsü kevilo; No ye I mhekiqi tsala lo I küghütshü-a ke.

¹⁸ I ghimeqhi kemi shikukujo lo, ikemu I shikukujo tsü kevilo; pano pelo aghüthi süve pelo, ikemu I ghüthipüsü tsü kevilo; pano shou amhekiqi süghi tsülo; küghüsü no pano kütsave lo!

Sabbath Akimtheshi qhilo

¹⁹ Ampeu no I vilo ishi pi: “Wuno Timiqow Khagho lo puthugho lo, Judah kükau no ipeilo chekeu, eno Jerusalem khagho kümtsü lo,

²⁰ eno pilo, ‘Judah kükami, Judah eno Jerusalem lo küxümi kümtsü, khagho lo iloche kemi kümtsü Ampeu tsa inilo.

²¹ Ampeu no ishi piani: Sabbath tsala lo akho pumo nike kutokupui lo, momu Jerusalem khaghoqo veche ilo kevilo,

²² Sabbath tsalani no ki lono akho xapu ipe kevi momu akümla shi kevilo, ikemu I no o puasüqo lau azah tsüke toi Sabbath tsala akimthe shi qhilo.

²³ Ikeghi panongu ye I tsa inimo eno pano kini kughopuwo moe, eno akükütsü tsa chilu eno ikhilu moniye kuthovi auve.

²⁴ “‘Ikemu, Ampeu no asheshu, nongu no I tsa ini, Sabbath tsalani nongu kho xapusü mishighüna khagho veche wumo, eno Sabbath tsala akimthe shi qhino tipa tsalani akümla shimo aye,

²⁵ David kükalakhü lo iqa akemi kükami eno kijemi no mishighüna lo khurkulu ngo khurshi lono pano gholo Judah ngo Jerusalem lo küxümi sasü khagho veche ilo nani. Eno mishighüna hipau ye alholo küghüna nani.

²⁶ Judah phughi lono eno Jerusalem hokümxa lo aphuqo lono timi ighi nani, Benjamin eno kulolau ato ghakhu lono ighi nani, Negeb lono akipti kümllagho ngo aghakishi ngo athi kümllagho eno müsüghüta Ampeu kilo süghi nani.

²⁷ Ikemu nongu no I tsa inimo, Sabbath tsala akimthe shi qhimo, akho xapusü Sabbath tsala lono Jerusalem khagho veche ilo aye, I no ghapinhe mlakeu mi pesü Jerusalem khaghoqo eno liw jukivi kighikiqo pitive tsü nani.’”