JEREMIYA 16 - Sumi Naga CL (Re-edited) Bible (BSI)

Akhüava, Azütakikihi, Akithi

¹ Ampeu tsa I lau ighi:

² “A-a hipau lo no ye anipu lumoni eno apu-anga mu shimoni.

³ Kughengu hipa-a lono punu kemi apu-angaqo, eno pano punu keu puazaqo ghenguno Ampeu no ishi piani:

⁴ Panongu ye akithipu küsü lono thinani. Panongu kümsü qamo eno shiqhomo nani. Panongu ye ayeghi lo tübatüzü toi nani, azütakikihi ngo akhüava lono pühave nani, eno pano kumo ye aghau ngo tüghashiqo chuqupu shinani.

⁵ “Kughengu Ampeu no ishi piani: mloqa akemi kilo ilo kevilo, momu panongu ghenguno mlo nike wu kevilo, kughengu I no timi hipaqo launo iqüghai keu, ithamo keu kikimiye eno kimiyekini süwuvae, ipi Ampeu no asheshu.

⁶ Kijemi ngo kitilami ghi ayeghi hipau lono thinani. Panongu ye shiqhomo nani, khunomu pano ghenguno mloqamo nani, momu asa miyemo nani.

⁷ Khunomu asho süwo kithimi ghenguno mlo akemi lokughuno tsümo nani, pa puaza laumu alokughuno tsünike azü piyemo nani.

⁸ No ye aghulhu shi akemi kilo iqa no chushomo nani.

⁹ Kughengu aqokitikhi MPEU, Israel Lhou no ishi piani: Julo, o nhethe lono eno o ghuloki lono kunu vüqai eno alokivi sütsa, külapuu eno külaliu lokivi sütsa kishekhave tsü nani.

¹⁰ “Kughou nono hipa tsa pesü timiqo vilo pi keno panongu no o vilo iniju nani, ‘Ampeu ye kushiye alhoksa kije hipaqo ni shou pipuku ani kea? Ningu xine ye kiu kea? Ningu ye Ampeu ni Lhou lau kiu xine shive kea?’

¹¹ Panongu vilo pilo: ‘Kughengu no puasüqo no I kümsümave ke, Ampeu no asheshu, I kümsümave eno I yezah pheve no kütau lhouqo huthu eno mllauve, panongu mlo kümka lhoksa pape wuve no I tsa ini move,

¹² eno nongu no no puasüqo nguno alhoksau shiveke, nongu kümtsü no I tsa inimo no kuthovi, kixikila pulou shike.

¹³ Tighenguno I no ayeghi hipau lono no eno o puasüqo no mthakeu yeghi lo küza puwuveni, eno tilauno putho pucho nono kütau lhouqo huthu nani, kughengu Ni ye I pulou o piye moae.’

Israel Athoputho Tsüni

¹⁴ “Tighenguno, julo, Ampeu no asheshu, timiqo no, ‘Ampeu xüküau no Egypt yeghi lono Israelmi saipeghi,’ ipi moveni keu tsala cheni,

¹⁵ ikemu ‘Ampeu xüküau no ahuu ghakhu eno ni haküghütsüve keu ghakhu kümtsü lono Israelmi sachile saighi,’ ipi nani. Kughengu I no pano puasüqo tsükeu yeghi lo panongu sachile ighi nani.

¹⁶ “Jualo, Ampeu no asheshu, I no akha kükhami kutomo puwu no panongu küghaluve nani. Tithiu itaghi I no ashihami kutomo puwu nani, eno naghuto ngo ato eno anhepho kümtsü lono panongu haphe nani.

¹⁷ Kughengu I nhethi no pano laghi kümtsü shou ani. Panongu ye I launo itshüve mlae, momu pano xine ye I launo küsüve mlae.

¹⁸ Ikemu I no pano kipimi eno axine küghüsü no lochile paghini aphi, kughengu panongu no akimthipu julho kithi kumoqo pesü I yeghi shipixi, eno aphikümqhüpu jeli pesü I mheghi yeghi chhitoive tsüke.”

¹⁹ O Ampeu, I kumto eno I liwo, I veküsa tsala lo I kicheqho, ayeghi shekhau no shiyeqo no O lau ighi no pi nani: “Ni puasüqo ye akimki, ala küha keu ameküküha thimeqo kumo aye kiumu ighilu moe.

²⁰ Timi ye pa sala alhou mlalu nani keshea? Tipaqo ye alhou kumoe!”

²¹ “Tighenguno, julo, I no panongu pelo ithi peni, ghuthu lakhi I no panongu pelo Ni ye aküka eno akumto kepi ithi peni, eno panongu no I je ye Ampeu kepi ithi nani.”