JEREMIYA 15 - Sumi Naga CL (Re-edited) Bible (BSI)

Ampeu ye Süchilemo Nani

¹ Ampeu no I vilo pi, “Moses ngo Samuel pama no I zülo puthugho püaghi namu, I mlo ye timi hipaqo lau tsüghü ighimo nani. I zülono panongu hapheve no puwuve lo!

² Panongu no o vilo, ‘Ningu ye khila wuveni kea?’ ipi aye panongu vilo pilo, ‘Ampeu no ishi piani: “‘Püsa no ghaveni kemi no püsa, azütakikihi lono thini kemi no azütakikihi; püqümiye lono thini kemi no püqümiye, akughu lono thini kemi no akughu lono thi nani.’

³ I no panoqo kütsani kemi ajeli bidi süsüni, ipi Ampeu no sheshu: ghiqhi kepu zütakikihi, mikipe wuni keu atsüqo, külhü chuve eno qhoi kütsave kepu aghau eno tüghashiqo.

⁴ Hezekiah nu Manasseh, Judah kükau no Jerusalem lo kiu shi keno, tipa ghenguno I no panongu pesü ayeghi lo kükaqha kümtsü lau akümsapu shitsü nani.

⁵ “O Jerusalem, khuu no o kimiyeni, momu o ghenguno mloni kea? Khuu no iqa no o ghili inijuni kea?

⁶ Nono I milive, ipi Ampeu no asheshu; no ye athiu likhi idewove, ikehu I no I u chhopuwo no o kütsave Ni ye süchile keu no lhovae.

⁷ I no aphughi khagho lono asüküba pesü panongu vepuku no fule nani; I no Iw timi kütsavae, pano mlo ghujuve tsüae, panongu ye pano laghi lono tsüghü moe.

⁸ I no azüghi lo asaye nguno alau chimemi kutomo shive tsüae; I no puchomghü lono apumi paza noqo kütsave nike saghivae; I no züleno amlo ghuju ngo akümsapu pesü panongu shou pukue.

⁹ Anga tsüni paza no miqemleive no ikiqivae; li tsala ye puchou shiaphi lono tsüzüvae; li ye akukujopu eno atichepu shivae. Achili aghi keqo ye pano ghümi zütakikihi lono ikiqive peni, ipi Ampeu no asheshu.”

Jeremiah Kumchho

¹⁰ I za I punuu, I hasapue, aghakhu kuchopu lo mtomshu eno kütsala chekeu timi! Ni ye püna püamo, momu nalu püamoe, tishimu kümtsü no I ghusho ani.

¹¹ Ampeu no pi, “Ni ye panongu kivipu ghenguno o khaqhi pheke kumo? Ni ye aküpüna eno aghime ghuloki lo aghümi zülono o ghenguno qhüiniju ke kumo?

¹² Khuu no ahuu no ayi momu alazayi hechhelu nani kea?

¹³ “Nongu xine ghenguno aghakhu kümtsü lo I no nongu küakini eno akini khukiqo ame tsümono hakhope wuvepe nani.

¹⁴ Nongu no mtha keu yeghi lo I no nongu pesü no ghümi qemi shiuvepe nani, kughengu I mlokighide ye ami toi iqü ani, ti ye alholo piti ache nani.”

¹⁵ O Ampeu, Nono ithi ani; I kümsülu eno I xuju tsülo, I ghime akemi lau I mkhü lutsülo. Nono aghümi lau kutuu anipi I pelo thivepe kevilo; O ghenguno I thaigha akeu ithi tsülo.

¹⁶ O tsa phulu kelo I no chuve, eno O tsa no I lopivi tsüno I mlo züküvüpu shitsüe, kughengu O je lono I kulue, O Ampeu, aqokitikhi Lhou.

¹⁷ Ni ye züphu-zügha shikemi gholono ado puwo alovi püamoe; O u no I gholo akehu ni ye I likhi ae, kughengu ni ye axukighide no chhitoi ake.

¹⁸ Kushiye I küsü ye tavemo, I zaku ye zaghi eno shipivi mla kea? No ye kushiye pishikiqhi ghokiti, tuqu lo züha ghoki toi kea?

¹⁹ Ikehu Ampeu no ishi piani: “Nono ideighi aye, I no o pesü athoputho tsüni, eno nono I zülo puthugho nani. Nono ameküküha tsa kumono akughupu tsa pi aye, no ye I kichi shinani. Panongu no o lau tsüghü ighi nani, ikemu no ye panongu lau tsüghü wumo nani.

²⁰ I no o pesü timi hipaqo lau alazayi tupikiye shitsü nani; panongu no o mjochile nani, ikemu o theqhi lumo nani, kughengu Ni ye o xalu eno o xaphe luni ke o gholo ani, ipi Ampeu no asheshu.

²¹ I no kixikilami u lono no xaphelu nani, eno ayiküsami u lono o xachilelu nani.”