JEREMIYA 14 - Sumi Naga CL (Re-edited) Bible (BSI)

Püqümiye, Azütakikihi, Püsa

¹ Züha ghenguno Ampeu tsa Jeremiah lau ighi:

² “Judah no mlo ani, eno li khaghoqo no qhaighoivae; timiqo no ayeghi lo ihi mloqa, Jerusalem no ighamku ani.

³ Liw ghenimi no aqemi hape azü phuwu; panongu no azü tughuko lo ighi; ikemu azü phumlae; pano zübohu kümsa pechile ighi; panongu ye akukujo no akümza qhiyive eno pano kütsü nhaluve.

⁴ Ayeghi shou ghuqhi tsümove kehu tino ikoghegheive, alukichimi no kujove eno pano kütsü nhaluve.

⁵ Ashe ali ghi aluza lo atsüni kühave kehu anileshi ati piti püakeu kümsümave.

⁶ Aghalo khurhaqo no atoghi kümsa lo puthugho; aghalo tsüqo toi atuthu shekukuno; asütsüni kühave kehu pano nhethi no ithumlave.

⁷ “Ni xine no ni shou thopi shi ani, O Ampeu, O je lono kiuala shitsü lo; kughengu niw hekibide no ihuloe; nino O shou axine shivae.

⁸ O, No Israel lajupu, aveküsa ghuloki lo xakuluu, kushiye No ye ayeghi lo inami lakhi toi, kicheghüzümi no kijili lakhi ngoke toi ani kea?

⁹ No ye kushiye timi lakhi no avehu izüveke toi, xamlani keu ghütomi toi ani kea? Ikeghi, O Ampeu, No ye ni gholo ani, nino O je ku anike ni qhivetsü kevilo.”

¹⁰ Timi hipaqo ghenguno Ampeu no ishi piani: “Panongu ye itsü wuveni keu no pano pulou; pano pukhu süchile jumphie; tighenguno Ampeu no panongu ikhilu chemoe; itehi ye Pa no pano xine kümsüchile luno tipau ghenguno ghime nani.”

¹¹ Ampeu no I vilo pi, “Timi hipaqo kivipu ghenguno inikhu kevilo.

¹² Panongu no kümvü anamu Ni ye pano sütsa inimo nani, panongu no akipti kümllagho eno athi kümllagho tsünamu I no tipaqo ikhilumo nani. Ikemu I no püqümiye ngo azütakikihi eno püsa pesü panongu kütsale nani.”

Akimki Tungkupmi

¹³ Ikehu I no pi, “Ya, Ampeu Alhou, tungkupmi no panongu vilo picheni, ‘Nongu ye azütakikihi momu püqümiye mu ithulumo nani, ikemu I no a-a hipau lo aloino keu tsünani.’”

¹⁴ Ampeu no I vilo pi: “Tungkupmi no I je lono akimki tungkuptsa pi ani. Ni ye panongu puwu püamoe, azah mu tsü püamo, eno panongu mu pütsa püamoe. Panongu no akimki kungunhetsü pesü nongu lau tungkuptsa piani, ameküküha tumu eno pano kükümsü lo akeu pesü pishiqhi ani.

¹⁵ Tighenguno khunono I no puwu moamu I je lono tungkuptsa pi eno, ‘Azütakikihi ngo püqümiye ye hipa yeghi lo ighimo nani’ ipi cheni keno, panongu ghenguno Ampeu no ishi piani: Azütakikihi eno püqümiye no tungkupu tipaqo pühave nani.

¹⁶ Eno timi khunoqo lau panongu no tungkuptsa pi cheni keno tipaqo ghi püqümiye ngo azütakikihi no Jerusalem laghila lo vepheve nani. Panongu nipu momu apu-anga khunomu pano shiqhomo nani. Kughengu I no pano lhoksa pesü pano shou lepuku nani.

¹⁷ “Atsa hipau pesü panongu vilo pilo: ‘Putho pucho I nhethi lono tamo mithe anhezü qopelo, kughengu Iw timi ngaqo ye aghüza kitikhi shi imevae.

¹⁸ I no aluza lo wu aye julo, ghiqhive kemi ithulue! I no aphughi lo ilo aye akhüava no ghave kemi ithulue! Kughengu tungkupmi ngo achinemi no pano no mthakeu yeghi lo kilhisho shike.’”

¹⁹ No ye qhoi Judah kheleve akeshea? O ngulho no Zion mithive akeshea? Ni shipivi mlave peniye No ye kushiye ningu hekulu kea? Nino aloino keu laju, ikemu akivi ighimoe; shikipivi do huqhe, ikemu akümsapu ithulue.

²⁰ O Ampeu, nino niw kixikila eno ni puasüqo xine piphe ani, kughengu ningu ye O shou axine shivae.

²¹ O je ghenguno ningu thaigha tsü kevilo; O jekipipu kükalakhü shipünha kevilo; ni sasü puloshoqhi shikeu hepho kevino kümsülu tsülo.

²² Shiyeqow kichile lhouqo no tsütsüghu süghilu nani keshea? Momu atsütsü no ghuqhitsü nani kea? O Ampeu ni Lhou, Nono Pake kumo? Niw lajupu O shou be ani, kughengu Nono hi kümtsü shike.