JEREMIYA 13 - Sumi Naga CL (Re-edited) Bible (BSI)

Shipüsave keu Chighichephi

¹ Ampeu no I vilo pi, “Wuno phepheike chighichephi lakhi qhü no o chita khapulo, eno azü lo pütsü kevilo.”

² Ikehu Ampeu no pike toi I no chighichephi qhü no tipau pesü I chita khapu.

³ Akiniu Ampeu tsa I lau ighi,

⁴ “Nono qhükeu chighichephi o chita khapu akeu pesü Euphrates lo wuno atu kighipe lo küsüve lo.”

⁵ Ikehu Ampeu no azah I tsüke toi, I no wuno tipau pesü Euphrates phivilo küsüve.

⁶ Atsala kutomo thiu Ampeu no I vilo pi, “Ithulo, Euphrates lo wulo, eno I no azah tsüno chighichephi tile küsü püakeu ikhilulo.”

⁷ Ikehu I no Euphrates lo wuno chighichephi khile küsü püa keno chhuphelu. Julo, ti ye ghüuve eno peitha mlakepu shive.

⁸ Tileno Ampeu tsa I lau ighi:

⁹ “Ampeu no ishi piani: Hipaphi lono I no Judah ngo Jerusalem qheküza kütsave tsünani.

¹⁰ Lhoksa kügha timiqo, I tsa chilumo keqo, khunono kuthovi ghi pano mlo ghola hawuve eno alhou kütauqo huthu no mlla nike pape wuve keno chighichephi avehu kühave ketoi shivetsü nani.

¹¹ Chighichephi pesü timi polo khapu ketoi, I no Israel ngo Judah kibo kuchopu pesü I khada peke, ipi Ampeu no asheshu, tishianguno panongu pelo Iw timi shilu, I jeku, shekiqhe eno agigihu tsü peniye ke, ikemu panongu no initsü moe.

Atsaiji Tughuko

¹² “Atsa hipau pesü panongu vilo pilo: ‘Israel Lhou, Ampeu no ishi piani, “Atsaiji pesü atughuko kümtsü shepichhi nani.”’ Panongu no o vilo iniju nani, ‘Atsaiji pesü atughuko kümtsü shepichhi nanie pi ningu ghi ithi anike kumo?’

¹³ Tile nono panongu vilo pini, ‘Ampeu no ishi piani: Julo, I no ayeghi hile küghüna akemi kümtsü pesü shokümzümi shivetsü nani: David kükalakhü lo iqa akemi kükami, achinemi, tungkupmi, eno Jerusalem lo küxümi kümtsü.

¹⁴ I no apu-anu dolo lakhino lakhi ghadaqhi kilepe nani, ipi Ampeu no sheshu. Ni ye panongu kütsamo no amlo ighiqhiyi püxüve momu kimiyeqhiyi keu shimo nani.’”

Haphe Sawuve nike Kichiqhi

¹⁵ Akini kughopuwo inilo; qheza kevilo, kughengu Ampeu no pivae.

¹⁶ Pa no aküzü süghi mphi züuno, zümoive keu naghutoqo lo nongu pukhu no küpxa mphi lono, eno nongu no aküvü laju akelo Pa no züchiyive tsüno aküzü kutho shivetsü mphi lono, Ampeu o Lhou sheqhelo.

¹⁷ Ikemu nono inimo aye, o qheküza ghenguno I ngulho no tuqhou no qa nani; I nhethi lono kukhukimji shi anhezü ipeghi qa nani, kughengu AMPEUw timi loji ye akughu lo sawuveni ake.

¹⁸ Akükau eno Kükaliu paza vilo pilo: “Aqhou lakhü lo iqave lo, kughengu ow jukivi kütsükuqho ye o kütsü lono ikiqivae.”

¹⁹ Negeb mishighünaqo ye khathavae, khaqhini kemi khumu kühae; Judahmi kümtsü haphe sawuvae, qhoi haphe sawuvae.

²⁰ “Khunoqo ahuu no cheni keno pishipuwo julo. O pelo jukuto peniye pichetsü keu jukivi loji khile ani kea?

²¹ Nono o küsami shi penike shika keqo no o kütsü shou ikughive kelo no ye kiu pilu nani kea? Totimi no apunu küsü sü aketoi no ye küsakushu no o tsügha luve moni keshea?

²² Nono o mlo lono, ‘Kushiye hipaqo ye I shou ikughi ani kea?’ ipi aye, ti ye o xine kije ghenguno o phimini süxüve tsüno no ye ighono aghimeshi ani.

²³ Ethiopiami ye pa yiko kililu momu akhighiu ngushuu ye akütsükive kililu nani keshea? Tishiaye nongu alhoaye lono alhoksa shikemi ghi kili mla nani.

²⁴ I no amuu toi nongu kuthole nani asaye mülhü no fupe wuve nani.

²⁵ Hi no o saje, I no o saje mighi phevae, Ampeu no asheshu, kughengu nono I kümsümave eno akimki shou pükhübe ke.

²⁶ Ni ampi no o mini lhaphepe o gi lo betsüni, eno o kukujopu ithulu peni.

²⁷ I no ow kuchhube kümla, o shupu asalha eno akimine, atoghi lo nono kütüqha keu ithuluvae. O Jerusalem, o hasapue! Khitohi no ye mithe mono anani kea?”