JEREMIYA 12 - Sumi Naga CL (Re-edited) Bible (BSI)

Jeremiah Kumchho

¹ O Ampeu, O lau muchho kelo No ye achipiu shicheni; tishimu I vehu pesü O qhüinijuni. Kushiye kixikilami no kinikülü shicheni kea? Kushiye pishikiqhimi kümtsü no ikoishelu cheni kea?

² Nono panoqo shosü, panoqo no akuhu qüilolu eno thuiku eno axathi pithi; Nono pano kichi lo ngo kemu pano mlo lono putosüve.

³ Ikemu O Ampeu, Nono ni ithi ani; ni ithulu eno I mlo peju cheni. Ambe ghiqhi niye aketoi panoqo sünhephe luvelo, eno ghikiqhi tsala ghenguno ikhithape qhivelo.

⁴ Ayeghi ye khitohi mloqa eno aluza lo atsüni ye khitohi ighüive anani kea? Tile küxümi lhoksa ghenguno tüghashi eno aghauqo ye pühavae, kughengu panongu no pi, “Pa ye hithiu ningu shekuho ithulumo nani.”

Ampeu no Jeremiah Khochile

⁵ “Nono apukhu lono timi sasü pokimhe no akulho shive aye, kishino khurshi sasü pokuxu luni kea? Nono aqa yeghi lo thotsü lhove aye, Jordan ghasa loye kishini kea?

⁶ O thiküzümi eno o pu kibolomiu ghi o jechue; eno ighamku o hakuqo ke, panongu no ashou toi o pütsa namu panongu pülü kevilo.”

⁷ “Ni ye I kibo phevae, Ni ye I mheghi qhivae; I ngulho no qhuivü chekeu pesü li ghümi u lo süve tsüae.

⁸ I mheghi ye aghasü lo abongshuu lakhi toivae; li no I shou asütsa süqhe; tighenguno I no li mithike.

⁹ I mheghi ye atine ki toive akeo? Ashikuchu ghauqo no li homxa luve akeshea? Tüghashiqo no tsüchuve penike wuno kümtsü hekütsü saghilo.

¹⁰ Ambekhemi kutomo no I tsailu kütsavae; panongu no I lu qolevae; I no amloqi chekeu lu panongu no yenguyi qhive tsüae.

¹¹ Panongu no pighive tsüae; küghüküghai tino I lau mlo ani. Ayeghi kuchopu yenguyivae, ikemu khunomu amlo ighimoe.

¹² Asayeqha lo asa itsümo keu toghi shou kütsaveni kemi ighivae, kughengu Ampeu zütakikihi no ayeghi halau no halau kutolo leno khumu iqüghai mla nani.

¹³ Panongu no ashothi xusü kemu asahu ghilehu; panongu no ime mla kemu kiumu ala shimoe. Ampeu yiküsa mlo kighide ghenguno panongu no panow ghile jupe kujo nani.”

¹⁴ I kisüghümi lhoksami khunono I no Iw timi Israel tsüve keu mheghi luvetsü keno, pano ghenguno Ampeu no ishi piani: “Julo, I no ayeghi lono panongu nhüve nani, eno panongu gholono Judah kibo nhüve nani.

¹⁵ Panongu nhüve kethiu I no itaghi panongu shou kimiyeqhiyi nani, eno I no itaghi pütüta mheghi yeghi lo saghi nani.

¹⁶ Ti ye shikupu nani, panongu no amlo tsüqhiyi Iw timiqo laghi shikalu, eno Iw timiqo pelo Baal lau tushoqhi peke toi, I je lono tushoqhi, ‘Ampeu xü anike,’ ipi aye, panongu ye Iw timiqo gholono shiqhe pukutsü nani.

¹⁷ Ikemu khuno shiye no ini moni keno, I no qhoi nhüpe kütsave nani, ipi Ampeu no sheshu.”