JEREMIYA 11 - Sumi Naga CL (Re-edited) Bible (BSI)

Puloshoqhi Hephove

¹ Ampeu tsa Jeremiah lau ighikeu:

² “Puloshoqhi hipau tsa inilo, eno Judah ngo Jerusalem lo küxümiqo vilo pilo.

³ Israel Lhou, Ampeu no ishi piani pi panoqo vilo pilo: Puloshoqhi hipau tsa chilumo kemi ye müsüinivae,

⁴ ti ye I no Egypt yeghi lo ayi kiyiqibo lono no puasüqo saipeghi kelono azah tsükeu ke. I no pi, I sütsa inilo, eno I no azah tsükeu kümtsü shilo. Tishiaye nongu ye Iw timi shinani, eno I no nongu Lhou shinani,

⁵ tishikeu lono ishi nongu no akichhizü ngo akhingozü qowu akeu yeghi lo xüakeu ye, I no nongu puasüqo lau tushoqhi keu shoqhi shikupu tsüniye ke.” Tile I no khochile, “Ampeu, tishilo.”

⁶ Ampeu no I vilo pi, “Atsa hi kümtsü pesü Judah lo mishighüna eno Jerusalem laghila lo sheshulo: Puloshoqhi hipau tsa chilu no papelo.

⁷ Kughengu I no Egypt yeghi lono no puasüqo saipeghi kelono tamo mithe ishi tsala kutolo, I tsa inilo, ipi kütüghü ighike.

⁸ Tishimu panongu no agholumo eno pano kinimu kughopuwo moe, ikemu kümtsü no pano mlo lhoksa lo kuthovi auve. I no panoqo pelo pelu penike azah tsü kemu panongu no pemo kehu puloshoqhi lo müsüini keu kümtsü panongu shou puku tsüe.”

⁹ Itaghi Ampeu no I vilo pi, “Judah ngo Jerusalem lo xüküami gholo amqü küsüqe keu ani.

¹⁰ Panongu ye I tsa milive no pano puasü xine lo idewovae. Panongu ye alhou kütauqo huthu nike pape wuvae. Israel ngo Judah kibo ye I no pano puasü sasü puloshoqhi shikeu hephovae.

¹¹ Tighenguno, Ampeu no ishi piani, Julo, I no amhekiqi panongu shou süghini cheni eno panongu ye pomla nani. Panongu no I lau ighamku namu Ni ye panongu sütsa inimo nani.

¹² Tileno Judah lo mishighünaqo eno Jerusalem lo küxümi no pano kümllagho tsü chekeu lhou lau ighamku nani, ikemu pano veküsa ghuloki lo tipaqo ye pano xalumo nani.

¹³ O Judah, nongu lhouqo ye now mishighünaqo jehi shivae, eno Jerusalem laghila no khije akeno tijehi Baal lau akümllagho tsünike akiptiaqo shiqhe keu lono akukujopu shivae.

¹⁴ “Tighenguno timi hipaqo ghenguno inikhu kevi, momu pano züqhushi ighamku khu kevilo, kughengu pano veküsa lo panongu no I kunamu Ni ye ini tsümo nani.

¹⁵ Alhoksa kümla kutomo shive no I qhuu ye I chineki lo kiu shi ani kea? Ashi pesü aghashi keu no aghime tutsüghülu nani keshea? No ye alovilu nani keshea?

¹⁶ Ghuthu lakhi lo Ampeu no o pesü ‘xüthilei keu olive sübo, jukivi eno axathi kivi’ ipi kuche. Ikemu Pa no pasapagha kije ghügha pesü tipau lo ami süvetsü nani, eno tipa lokaqo ye pitive nani.

¹⁷ Aqokitikhi MPEU, khuu o shosü keno, Pa no o shou amhekiqi xaküthaza beva, kughengu Israel ngo Judah kibo no alhoksa kümla shike, Baal lau akümllagho tsü keu no I xukutho pe I mlo shikighide tsüe.”

¹⁸ Ampeu no I piye eno I no tipau ithive; tishino panongu kümla I piye.

¹⁹ Ikemu ni ye ambeti ivünhei ghikiqhi-a lo sawu cheke toike. Ni ye panoqo no I shou alhoksa ishi kuchughu akeu mthae, “Ningu axathi gholono asübo kütsaveni, küxümi yeghi lono pa pithiveni, tishino pa je kümsü chilelu moveni.”

²⁰ Ikemu, aqokitikhi MPEU, amikucho xaküthau, amlo eno akükümsü peju chekeu, panongu shou O mkhükulu I pelo ithulu pelo, kughengu ni ye O lau I vehu kulhuqhivae.

²¹ Tighenguno Anathothmi khunono o küxü phu ani keno pano ghenguno Ampeu no ishi piani, “Ampeu je lono tungkuptsa pi kevilo, tikumo aye no ye ningu u lono pithiveni”

²² ikehu aqokitikhi MPEU no ishi piani: “Julo, I no panongu ghime nani. Panow apumiqo no ghüyi lono wonani, pano tianuliqo no püqümiye lono thinani,

²³ khumu ghüpe qhimo nani. Kughengu I no Anathothmi ghimeke mpe lo pano shou amhekiqi süghi nani.”