JEREMIYA 10 - Sumi Naga CL (Re-edited) Bible (BSI)

Ajulho eno Aküxüpu Lhou

¹ Ampeu no nongu vilo pi akeu tsa inilo, O Israel kibolomi.

² Ampeu no ishi piani: “Shiyeqo laghi pape kevilo, momu atsütsü lo amchipuqo jupe thüghüi kevilo kughengu shiyeqo ye tipaqo no shithüghüi ani,

³ kughengu timiqo khuaye ye ame kühae. Asübo lakhi aghasü lono thaqhi no külalumi no amüghü pesü ajulho mla cheni.

⁴ Panongu no ghükayi eno ameshoyi pesü ananu shicheni; ayihesü pesü ayishu yesü cheni ikehu ti ye itha mlae.

⁵ Pano julhoqo ye akukali lo aluthu toi, tipaqo ye atsa pimla; ala chemla kehu xapu masae. Tipaqo msa kevilo, kughengu tipaqo ye alhoksa shimlae, momu akivimu shimlae.”

⁶ O Ampeu, O toike kühae; No ye kije, O je ye aküka kije ke.

⁷ O shiyeqo Kükau, khuu no O msa moni kea? agigihu ye O tsüküzüe; shiyeqo gholo alokütsümi dolo eno pano kükaqha kümtsü lo O toike khumu kühae.

⁸ Panongu ye anikha eno mbomzüe; ajulhoqo kükütsütsa ye asü paphie!

⁹ Ghükayi ye Tarshish lono süghi cheni, eno ameshoyi no Uphaz lonoe. Tipaqo ye külalumi eno ameshoyi kiyiqimi kümlae; tipaqo phimini ye hughai eno tsülabei; ti kümtsü timi u lo kümlae.

¹⁰ Ikemu Ampeu ye kuchou Lhou; Pa ye aküxüpu Lhou eno lhokta Kükau. Pa loghu lono ayeghi itha cheni, eno Pa no amloide kelo shiyeqo ye puqhelu chemoe.

¹¹ Ikehu nono panongu vilo ishi pini: “Atsütsü eno ayeghi lhomo keu lhouqo ye atsütsü qholo eno ayeghi lono pühave nani.”

¹² Alhou no Pa küka lono ayeghi lhoe, Pa lokütsü lono ayeghiqha kughuphe, eno Paw vethakulu lono atsütsü qhawo ke.

¹³ Pa tsa lono atsütsü lo azü no mqhumza ighae, Pa no ayeghi shekha lono khüngküsü ipeghipe. Pa no tsütsüghu ghenguno tsütsüpha kulo, eno Paw pekükütsü ki lono amülhü saipeghi cheni.

¹⁴ Timi kümtsü anikha eno akighithi kühae; ameshoyi kiyiqimi ye pa no mlakeu julho no shikujo, kughengu pa julhoqo ye kichile, tipaqo lolo atuthu kühae.

¹⁵ Tipaqo ye ame küha, atichepu; aghime ghuloki lo pühave nani.

¹⁶ Khuu no Jacob Lhou keno Pa ye hipaqo toi moe, kughengu Pa no thime kümtsü kughulho ke, Israel shiaye ye Pa mheghi ke; aqokitikhi MPEU no Pa jeke.

¹⁷ O nhemgha xukumqo lulo, O, khasüve keu phughi!

¹⁸ Kughengu Ampeu no ishi piani: “Hipa ghuloki lono I no ayeghi hipau lo xüküami haleveni, panongu pelo michelu penike I no kütakihi keu süghi nani.”

¹⁹ I ghüzaku ghenguno I hasapue! I zaku ye zaghi shivae. Ikemu I no pi, “Kuchou no hi ye aghime kitikhi, ni ye puqhelu masae.”

²⁰ I phiki ye xaleqhive tsüae, akighi kümtsü süthavae; I tianuliqo ye I launo wuvae, panongu ye kühavae; I phiki tshü tsüni kemi eno nhaqhiphi sütsüni kemi khumu kühavae.

²¹ Ambekhemi no Ampeu vilo küsütsaju moke anikhae tigheno panongu ye ikoishe moe, pano mbeloji kümtsü apanaghavae.

²² Asütsa lakhi ighi ani! Julo, ti ye cheni! Ahuu ghakhu lono Judah phughiqo kütsave tsüno aghalo tsü kungo-a shive tsünike akümsapu kije cheni.

²³ O Ampeu, timi küxü ye paw kumoe pi I no ithi ani, timi ye pa kutoshi pa nepa kichetsü mlae.

²⁴ Kuchou xakütha lono I shikithe tsülo, O Ampeu; O mlokighide lono kumoe, ni ye kiumu kumove nosake.

²⁵ O mtha keu shiyeqo shou, O je kumo kemi shou, O loghu lepuku lo, kughengu panongu no Jacob munovae, qhoi pa munovae, eno pa kungo-a ye kümsa shivae.