JEREMIYA 1 - Sumi Naga CL (Re-edited) Bible (BSI)

¹ Hi ye Jeremiah tsa, pa ye Hilkiah achinemi gholo lakhi nu, Benjamin yeghi bocho Anathoth lo küxümi,

² pa lau Ampeu tsa Amon nu Josiah, Judah kükau yepe mpe chighiaküthüu lono ighi.

³ Itaghi Josiah nu Jehoiakim, Judah kükau no ka akelono ighi, ti ye Josiah nu Zedekiah, Judah kükau yepe mpe chighiaqhaqhiu aqhi apunguu lo Jerusalem no akughu lo wuve kelono ke.

Jeremiah Kukulu

⁴ Ampeu tsa I lau ishi ighi,

⁵ “Atita lo azü ghomphi züuno Ni ye no ithi ae, o punu mphi züuno I no o kishekimtheve; I no o pesü shiyeqo lau tungkupu lakhi shi süsüe.”

⁶ Ikehu I no pi, “Ya, Ampeu Alhou! Julo, ni ye kishi pikepu keno mthae, kughengu ni ye lhothemi shiaphi.”

⁷ Ikemu Ampeu no I vilo pi, “‘Ni ye lhothemi’ ipi kevilo; kughengu khuno lau I no o puwuni keno no ye wuni, eno kiu kiumu I no azah o tsükeu no ye pimasae.

⁸ Panoqo msa kevilo kughengu I no o xaphe lunike o gholo ani, Ampeu no asheshu.”

⁹ Tishino Ampeu no Pa u pesü I kichi butsü eno I vilo pi, “Julo, I no I tsa pesü o kichi lo süve tsüae.

¹⁰ I no ishi tsala lono o pesü shiye eno kükaqhaqo shou süsüvae, nhüve eno hephove penike, kütsaleve eno haleve penike, shiqhe eno shosü penike süsüvae.”

¹¹ Ampeu tsa I lau ighi eno pi, “Jeremiah, no ye kiu ithulu ani kea?” I no pi, “Ni ye almond loka ithulu ani.”

¹² Itaghi Ampeu no I vilo pi, “No ye akivishi ithuluvae, kughengu Ni ye I tsa pesü tipau shinike jukuto ani.”

¹³ Ampeu tsa akiniu I lau ighi no pi, “No ye kiu ithulu ani kea?” I no pi, “Ahuu no kughove keu akumqho li ithulu ani.”

¹⁴ Ikehu Ampeu no I vilo pi, “Ahuu no kütsakungo keu ayeghi hipau lo küghüna akemi shou ikughi nani.

¹⁵ I no ahuu kükaqha shiayeqo kukumqo ani, Ampeu no pi, eno panongu no ighi no lakhikhi no Jerusalem khagho kulaghi lo pa kükalakhü süsüpe qhinani, tipau tupi hokümxa kümtsü eno Judah lo mishighüna sükümxa kümtsü bothape qhinani.

¹⁶ I pheve keu kümla lhoksa kümtsü ghenguno I no panongu mjochile keu tsakükügha shupheni. Panongu no akümllagho pesü alhou kütau tsüno panongu u no mla keqo mllauve ke.

¹⁷ Ikemu no ye akümla shi kepushi o ghili kutolo, ithulo, eno I no azah o tsükeu kümtsü pesü panongu vilo pilo. Panongu pelo o shikümsape kevilo, tikumo aye I no panongu zülono o shikümsa nani.

¹⁸ Julo, I no ishi no o pesü ayeghi kümtsü mjochile kepu, Judah kükamiqo, tile kijemi, achinemi, eno ayeghi lo timiqo mjochile kepu aliwo kumto phughi shitsüni, ayi no shikeu tsükucho, alazayi tupiqo shitsüni.

¹⁹ Panongu no o mjochile nani, ikemu o shou tolumo nani, kughengu o xaphe lunike Ni ye o gholo ani, ipi Ampeu no sheshu.”