James 5 - Sumi Naga CL (Re-edited) Bible (BSI)

Kinimi lau Ghutu

¹ Nongu kinimiqo, itehi inilo, Nongu shou amlo kighishipu chekeu ghenguno ighamku qalo!

² Now kinikülü ye tsümavae eno no phimini ye apila no chuvae.

³ Nongu no ashekha tsala lono akini pekütsü ke now ameshoyi ngo ghükayi ye ayisa no chuvae, eno tipa yisa no nongu lachile thopi shi nani eno ami toi nongu phiashi chupüha nani.

⁴ Julo, akümlami khunoqo nongu lulo mlatsü keno, nongu no pano pishiqhipe ajume qhichile luve tsüke, panoqo no nongu shou ighamku ani, ghile kuhumi ghügha no aqokitikhi Mpeu kini tovae.

⁵ Nongu ye ayeghi lo nibonilei eno aghakiqipu shi xüvae. Ghiqhini keu tsala ghenguno nongu ye atha pubeyivae.

⁶ Nongu no pimimo keu kileqhive no ghiqhivae. Pa ye nongu mjochile chemoe.

Aghime lo Kheakulu

⁷ Ikehu athiküzümiqo, Ampeu ighi moke kutolo kheakulu shilo. Alukichimi no kishi alu lo akughupu xathi ipeghi peniye tsütsüghu atüghüu ngo ashekhau ithumlake kutolo kheakulu shicheni keno ithilo.

⁸ Nongu ghi kheakulu shilo. Nongu mlo mtotoi shilo, kughengu Ampeu ighini keu ye au lo pesü ngovae.

⁹ Athiküzümiqo, nongu shou küghathabe pemo nike lakhi no lakhi shou muchho kevilo; julo, Küghaküthau ye ahukikha lo puthugho ani.

¹⁰ Athiküzümiqo, aghime lo kheakulu shinike kichekipiye shi tungkupmi khunoqo Ampeu je lono piche keno, panongu kümsülu lo.

¹¹ Julo, khunoqo no puqhekulu keno, tipaqo ye akümghaue pi ningu no kihi cheni. Job no puqhekulu shikeu nongu no chiluvae, eno ashekha lo Ampeu kimji kiu akeno ithuluvae. Pa ye amlo ighiqhiyi eno kimiyekini ke.

¹² Ikemu I thiküzümiqo, kümtsü nguno alauno nongu ye kungugha, ayeghi, momu kiu kiumu pesü tushoqhi kevilo. Nongu ye “iyei” ipi aye iyei pilo eno “moe” ipi aye “Moe” pilo, tishianguno nongu shou küghathabe monani.

Aküpülü Kighini

¹³ Nongu gholo khuana no shilusa anio? Pa ye inikhu lo. Khuana no alovi ani keshea? Pa ye shekiqhe le phelo.

¹⁴ Nongu gholo khuana ye küsükini shi ani keshea? Pa ye akukuho lo kichimi kuno panoqo pelo Ampeu je lono thazü pesü nu püzü pa shou inikhu tsü pelo.

¹⁵ Aküpülü lono inikhu kelo aküsüu ye vive nani, eno Ampeu no atho puthotsü no pa no axine shipüaghi aye pevetsü nani.

¹⁶ Tighenguno lakhi no lakhi lau nongu xine piphelo eno lakhi no lakhi ghenguno inikhu lo, tishianguno nongu ye viluve nani. Amikuchomi kighini ye aküka kije ani kughengu tino mlaitha achenie.

¹⁷ Elijah ye ningu lhoaye toi kemi, ikemu pa no tsüghu pemo nike amlo tsüqhiyi inikhu kelo ampe küthü no aqhi tsügho ayeghi lo ghuqhi move.

¹⁸ Tithiu pa no itaghi inikhu kelo atsütsü no ghuqhitsü eno ayeghi no tüxatini tsüe.

¹⁹ I thiküzümiqo, nongu gholo milakhi no kuchou launo wuve kelo milakhiu no pa sachile ighi aye,

²⁰ khuu no ala kumo lono axinemi sachile ighi keno, pa ye akithi lono axinemi ngulho xalu ani, eno axine kütsasa pevetsü kulupu shi anie pi ithi pelo.