James 4 - Sumi Naga CL (Re-edited) Bible (BSI)

Ayeghi Xüghola

¹ Nongu gholo kighekile keu ngo kichighi keu ye kiu no kea? Ti ye nongu no pitipüza keu no nongu lolo kichighi keu ghenguno ke kumo?

² Nongu no mine cheni ikemu küha kelauno ghiqhi cheni. Nongu no thime minekütü ikemu ithumla kelauno kichighi mtomshu cheni. Nongu no khumo kehu ithulu chemoe.

³ Nongu no khu cheni kemu ithulu chemoe, kughengu nongu no akumou lono nonguw minemighei keu ghapiqi niye khu kehue.

⁴ Nongu pükhükümla timiqo! Ayeghi sasü ashou shiche kemi ye Alhou ghümie pi nongu ye mtha keshea? Tighenguno khuu no ayeghi sasü ashou shinishi keno pa ye pa pesü Alhou ghümi shi ani.

⁵ Ikeo Kuchoyesü lo, “Alhou ye Pa nheshu qhiyi ni lolo aghungu sütsü keu kümsükütü acheni,” ipikeu ye akiqi kühano pi küghashi cheni kea?

⁶ Ikemu Pa no küpükini alau tsü kehu Kuchoyesü no ishi pie, “Alhou no aqheküzami lakhave cheni ikemu aqhokighemi lau küpükini tsü cheni.”

⁷ Tighenguno nongu ampi pesü Alhou qhoqhülo. Tüghami mjochile lo eno pa ye nongu lau no pove nani.

⁸ Alhou lau kupunu ighilo eno Pa no nongu kupunu ighi nani. Nongu axinemiqo, nongu u qhukimtheve lo, nongu amlo kini kupumiqo, nongu mlo shikütsüghüve lo.

⁹ Amlo küghütashi mloqa ighamku lo. Nongu kunu pesü akumlo shivelo eno alokivi pesü alomtshüve lo.

¹⁰ Nongu ampi pesü Ampeu zülo kuchuni lo eno Pa no nongu sünheqhe nani.

¹¹ Athiküzümiqo, lakhi no lakhi lau alhoksa pi kevilo. Athiküzümi lau alhoksa pi momu küghathabe kemi ye ayezah shou alhoksa pi ani eno ayezah shou küghathabe ani. Nono Ayezah shou küghathabe aye, no ye ayezah pelu kemi kumono küghaküthau shi auvae.

¹² Alhou likhi no ayezah kütsüu eno küghaküthau ke. Pa likhi no xalu nani eno kütsalu nani. Ikemu no ye khuue pi o kisüghüu shou küghathabeni kea?

Thoghiu ghenguno Qheza

¹³ Nongu khunono, “Ishi momu thoghiu ningu ye aphughi hipau momu hupau lo izüwu no tilau ampe lakhi ngoni eno lhidi shino ala shiluni,” ipi cheni keno, itehi inilo.

¹⁴ Kughengu thoghiu ye kiu shive nani keno nongu ye mtha aphie. Nongu küxü ye kiu kea? Kughengu nongu ye akimhi no ado kitila ipeghi no pai hauve ketoi ke.

¹⁵ Ikehu nongu ye ishi pi kepue: “Ampeu pulou shiaghi aye, ningu ye xü nani, eno hipau momu hupau shi nani.”

¹⁶ Ikemu le nonguu no aqheküza shiuve ke, aqheküza ye kümtsü alhoksae.

¹⁷ Ikehu khukhumu achipiu shimasa keu ithi apülaghi shimove aye pa ghenguno axine ke.