James 3 - Sumi Naga CL (Re-edited) Bible (BSI)

Amili Ghaküsü

¹ I thiküzümiqo, nongu kutomo no shikükami shikepu kumoe, kughengu nongu no ithi anike ningu khunoqo no shika cheni keno, ningu shou pachi küghathabe nani.

² Kughengu ningu kümtsü ala kutomo lo pimive cheni. Khuana no pa tsapi lo khilemu shipimi cheghi moaye, pa ye kupukulumi, pa phimpi kuchopu ghasükulumi ke.

³ Ningu no khurshiqo pelo agholu peniye akichi lo ayitachu khatsü aye, tipaqo phimpi kuchopu ghasülu cheni.

⁴ Zükiluqo ghi julo: tipaqo ye akuloghi eno amülhü kumto no fusawu cheni kemu tipa sakicheu no helisa aghulo pesü khila khilamu pa pulou lono satsüghüsü wucheni.

⁵ Titoi amili ye aphimpi lo saje aghulo, ikeghi tino aqheküza tsa kije picheni. Ami kitila no kishi aghasü kije pitive cheni keno kümsü julo!

⁶ Amili ye ami toi, ni phimpi lo achipikumo yeghiqha hutoi ke. Tino aphimpi kuchopu shipüsave tsüno amiyizü mi pesü aküxü kupuju lo pitiqhi cheni

⁷ Tüghashi, aghau, itikiche, azü lo lhoxü kümtsü chhiküghüvü luve nani, eno timi no chhiküghüvü luvae,

⁸ ikemu timi khunomu amili chhiküghüvü mlae. Hi ye akithipu tüghü no chhitoi, alhoksa, ghasükümla lakhie.

⁹ Hipau pesü ningu no ni Mpeu eno Apu shikimthi cheni, eno Alhou kimihi lono lhokeu timiqo ghusho cheni.

¹⁰ Akichi lakhi lono kükümgha ngo ghukusho ipeghi cheni. I thiküzümiqo, hitoi keu ye shikepu kumoe.

¹¹ Azüpuki lakhi lono akungo zü ngo amti zü ipeghi cheni keshea?

¹² I thiküzümiqo, mububo no olive pithilu, momu atsaibo no mubuthi pithilu nani keshea? Tike kumono amti zükhe loye azü kivi ipeghi mlae.

Kunguu Lokütsü

¹³ Nongu gholo khuu no alokütsüu eno vethakuluu kea? Pa khuaye kivi vecheo mtshaivü keu lokütsü lono pa kümlaqo pephe piye pelo.

¹⁴ Ikemu nongu mlo lo khumtsai keu nhekushu eno aghükha aghi aye, qheza kevilo eno kichile pesü kuchou shoqa kevilo.

¹⁵ Tikithipu lokütsü ye kungugha lono iqighi keu kumoe ikemu ti ye ayeghilo, aghungu küküha eno tüghaküsapu ke.

¹⁶ Kughengu khile anhekushu eno aghükha ani keno, tile kübangü keu eno alhoksa jeli kümtsü anie.

¹⁷ Ikemu kunguu no ighikeu lokütsü ye atüghüu no mqhamqhi keu, tishino alakishi, ivünhei, ikhilu kile keu, akipimi qhikütsü likhi keu eno axathi kivi, agikuju küha no tsaqütsalei keu ke.

¹⁸ Alashi chekemi no alakishi lono apiti yisü keu lono amikucho ghile hucheni.