James 2 - Sumi Naga CL (Re-edited) Bible (BSI)

Agikuju Xine

¹ I thiküzümiqo, nongu no ni Mpeu Jisü Khristo, ajuküvü Mpeu lau aküpülü tsüqüpe akelo khilemu agiju kevilo.

² Tsala timi lakhino ameshoyi nguthi ngo aphimini kivi pepusü nongu hoho lo ighini, eno kumlhomi lakhi ghi aphimini itamjui pepusü ighini,

³ eno tsala nongu no aphimini kivi pepusü ighikeu jukuto auve no pa vilo, “Hilau alakhü kivi lo iqalo,” ipini, ikemu akumlhou vilo ye, “Tilau puthugho lo” momu “I pukhu philo iqalo,” ipi aye,

⁴ nongu ye nongu dolo kotha letha keu süghi ani eno tishikeu lono alhoksa kükümsü xapu kemi küghaküthami shive anike kumo?

⁵ I qhuu athiküzümiqo, inilo, Alhou no ayeghi lo kumlhomi kishelu no aküpülü lo kinimi shilupe eno Pa kimiyekemi tsüni keu shi piqhi püakeu kükaqha mheghi kiyighimi shilupe kekumo keshea?

⁶ Ikemu nongu no kumlhomi gihu movae. Kinimiu no nongu nedaqoda eno küghakütha-a lo nongu sünhe sawu cheni kekumo?

⁷ Le panoqou no aje kivi khikhi nongu tsü keno, tipau thaigha chenike kumo keshea?

⁸ Nongu no akükau yezah khikhi Kuchoyesü lo, “No ye o likhi o toi o kisüghüu kimiye lo,” ipikeu shikupulu aye, nongu ye achipiu shi ani.

⁹ Ikemu nongu no agikuju shi aye, nongu ye axine shi ani eno ayezah heküxami kepi nongu shou akipimi tsü nani.

¹⁰ Kughengu Ayezah kümtsü pelu anamu lakhi pemlave aye, tino kümtsü lo küqüvae.

¹¹ Kughengu khuu no, “Shupu-salha kevilo” ipi keno, Pa no, “Timi ghiqhi kevilo” ipikeu ghi pike. Nono shupu-salha cheghimo namu timi ghiqhi aye, no ye ayezah heküxami.

¹² Tighenguno kuqhokiphe yezah qholono küghatha beniye akemi kimshi atsa toi akümla ghi shilo.

¹³ Kughengu khunono akipimi qhitsü moni keno küghakütha lo pano kipimi qhitsümo nani. Akipimi qhikütsü no küghakütha shou tokulu cheni.

Aküpülü eno Akümla

¹⁴ I thiküzümiqo, milakhi no pa ye aküpülü anie pi aghimu akümla küha aye kiu akivi ani kea? Aküpülü tipau ye pa xalu nani keshea?

¹⁵ Athiküzümi momu achelimi lakhi no aphimini eno achuqupu avehupu shi aghi kelo,

¹⁶ pano phimpi no avehupu shi akeu ye tsümono nongu no, “Aloino wulo, lüvüi eno aposünhei lo” ipi aye kiu akivi ani kea?

¹⁷ Tihutoi akümla sümo kelo aküpülü likhi ye akithie.

¹⁸ Ikemu khuana no ishi piluvi, “Nono aküpülü ani eno I no akümla ani.” O kümla sümono o küpülü I piyeju lo, eno I kümla lono I no I küpülü o piyeni.

¹⁹ Alhou ye lakhi likhi kepi nono pülü cheni; ti ye aloe. Tüghamiu ghi pülü cheni—eno khokhoshi msa cheni.

²⁰ No aghüzüu, akümla sümo kelo aküpülü ye ameküha kepi o piye penishi ani kea?

²¹ Ni sü Abraham no pa nu Isaac pesü akiptia lo ikhiphe tsükeu kümla vecheo pa ye Alhou lau achipikalu kekumo?

²² Nono ithulu anino pa küpülü ye pa kümla gholono mla ae eno pa kümla vecheo aküpülü shikupu tsüe;

²³ eno Kuchoyesü no pikeu shikupuve, “Abraham no Alhou pülü, eno ti ye achipi shi kihitsü”—eno pa ye Alhou küsau ipi kue.

²⁴ Nongu no ithulu anino timi lakhi ye aküpülü lo likhino kumono akümla vecheo achipikalu cheni.

²⁵ Tihutoi kütüqhaliu Rahab ghi, li no atsapemi aki lo sasü püzü ala kütau no puwuve keu kümla vecheo achipikalu kekumo keshea?

²⁶ Kughengu aghungu küha kelo aphimpi ye akithi ketoi akümla sümo kelo aküpülü ye akithi ke.