James 1 - Sumi Naga CL (Re-edited) Bible (BSI)

Alhou ngo Ampeu

¹ Jisü Khristo qeu James no khunoqo apanagha hakiphive akeno, ashiaye chighikini lau ye ani. Petha tsü ani:

Aküpülü Pekuju

² I thiküzümiqo, kughou nongu no akijiksa jeli sholuni keno, ti kümtsü alokivi lo kihisülo,

³ kughengu nongu küpülü pekuju lono tsaqütsalei keu ipeghi cheni kepi nongu no ithi ani.

⁴ Ikehu tsaqütsalei keu küka no kupukülai lupelo, tishianguno nongu ye thokha kupukülaive nani eno kiu lonomu zülamo nani.

⁵ Nongu gholo khami no alokütsü mikhe aghi aye, pa ye Alhou lau khulo eno ti pa tsü nani; kughengu Alhou ye khumu sakiyi mono kümtsü tsü cheni.

⁶ Ikemu pa ye lipi mono aküpülü lono khulo, kughengu khuu no lipini keno pa ye amülhü no azüghi lo azü fukucho sawu-sawo keu toike.

⁷ Titoi kemi ye Ampeu launo kiumu ithulu nani kepi kümsü kepu küha.

⁸ Pa ye amlo kini puche kemi, eno pa küxü lo tsaqüi moke likhie.

⁹ Akumlhou athiküzüu ye pa sünheqhe keu lo akijivile masae,

¹⁰ eno kinimiu ghi pa shikuchuni keu lo akijivile masae, kughengu pa ye atsünikupu toi hauve nani.

¹¹ Kughengu khetsünhe no akülü kushu shi ipeghi no atsüni phuqhive cheni; tipau kupu ighiqive cheni eno jukivi ye hauve cheni. Titoi kinimi ghi pa kümla püzüche kelono hauve nani.

¹² Pujupeju kelo puqhelu kemi kümghapue, kughengu pekuju lo puthugholu kemi ye Alhou no Pa kimiye chekeqo tsünie pi püakeu aküxüpu kütsükuqho ithulu nani.

¹³ Kughou ghukuju ighini keno, khunomu “Alhou no I ghuju ani” ipi kevilo, kughengu alhoksa ye Alhou ghuju mlae, eno Pa ampi ghi khumu ghuju chemoe.

¹⁴ Ikemu kughou alikhi ampi ngosükümla no pa müsü no züluveni keno, tileno pa ghuju cheni.

¹⁵ Tishino ngosükümla no mishipu luve no axine punu cheni; eno kughou axine no chhikhoi thuwuveni keno akithi süghive cheni.

¹⁶ I qhuu athiküzümiqo, nongu pishiqhivepe kevilo.

¹⁷ Agho kivi eno kupukülai keu gho kümtsü kungulo küvü Papu launo iqighi cheni, Pa gholo aküvü ye kilive momu yekhüve chemoe.

¹⁸ Pa pulou lono kuchou tsa vecheo Pa no ningu lhosüe, tishianguno Paw pulhoküsüqo gholo ningu pelo amsüu xathi shipeniye ke.

Atsa Chikulu eno Akümla

¹⁹ I qhuu athiküzümiqo, hi ithilo: kümtsü no pai chilu kemi shilo, ikemu atsapi eno amlokighide loye asheshi lo,

²⁰ kughengu timi mlokighide ye Alhou mikucho pephelu chemo.

²¹ Tighenguno aphikümqhüpu eno küsakügha kümtsü peve no ivünhei shi xusü püakeu tsa khikhi nongu ngulho xalu nani keno, ti ikhilulo.

²² Atsa chikulu likhi shive no nongu ampi pishiqhi kevi, ikemu atsa tho akümlami shilo.

²³ Kughengu khuana no chiluke likhi shino mlamo aye, pa ye milakhi no ahiju lono tsaqüi pa jutho juake toie.

²⁴ Pa no pa ampi jua püzü wuve kemtsa pa ye kiu toi keno kümsümave cheni.

²⁵ Ikemu khuu no kupukülai keu yezah, timi kuqhophe chekeu yezah shou jupuku no papeni keno, pa ye chilu no kümsümave kemi kumono mlaitha kemi kehu pa kümla lo kümgha keu shinani.

²⁶ Khuana no pa ye achineye lo amlokütsümie pi kümsü cheni mu pa mili ghasümo aye, pa ye pa ampi pishiqhi ani, eno pa chineye ye ame kühae.

²⁷ Apu Alhou zülo tsüghükhüi eno shipuqo mokeu chineye ye hike: mighimi eno chimemi no aghimeshi akelo xujuni keu, eno ayeghi pelo shikitiqe pemoni keu ke.