ISAIAH 9 - Sumi Naga CL (Re-edited) Bible (BSI)

Ningu lau Anu Punutsü ani

¹ Ikemu khunono aghime lo ache keno, pano ye aküzü kühave nani. Ampeu no püzüu Zebulun ngo Naphtali yeghi pesü tichetighepu shivetsüe, ikemu asheazü loye Pa no Azüghi lo kuwula, Jordan kukuu yeghi, shiyeqow Galilee qha kümtsü ajekipipu shivetsü nani.

² Khunono aküzü lo cheche keno aküvü kije ithuluvae; khunono aküzü kutho lo ache keno, aküvü no pano yepüvü luvae.

³ Nono shiye pesü küghüsü tsü; Nono pa lokivi kighishe tsüe; panongu ye ghile lo alovi akeshi, hakhokulu thime kijelu akeshi, O zülo alovi anie.

⁴ Kughengu Nono paw kuokhasü, abighi lo amakho puchekeu, pa qhaküsümi küsü kümtsü, Midianmi lau shike toi hechheve tsüae.

⁵ Leighi kemi pukhukuqho ngo aji hepho pinyive keu phimini kümtsü ami lono pitivetsü nani.

⁶ Kughengu ni lau anu punutsü ani, anu lakhi ningu tsü anie; Yepeka kükagha ye Pa u lo anani, Pa je ye Akümzapu Mijekütsüu, Akughushu Lhou, Alholo Apu, Külakishi Yepeu kutsü nani.

⁷ Paw yepeka eno külakishi ye kishekhave mono ikoishe nani, Pa no David kükaqha shou hipa ghuloki lono lhokta kutolo kuchou xakütha eno amikucho shosütsü eno puthuphe tsü nani. Aqokitikhi MPEU kupulo lono hipau shi nani.

Israel Shou Küghakütha

⁸ Ampeu no Jacob shou pipukuvae eno ti ye Israelmi shou ikughi nani;

⁹ Ephraim eno Samaria lo küami kümtsü no ithi nani, ikemu pano mlo lono qhezalaki ghi pi nani:

¹⁰ “Pititu ki kütsave tsüae, ikemu nino hekütha tu pesü shiqheveni; Tüküthi süpa kiqo tulaqhiva kemu nino cedar pesü tile shiqheveni.”

¹¹ Ikehu Ampeu no pano shou Rezin ghümi xukutho puthu ani.

¹² Kipelau no Syriami eno kulolau no Philistiami no abaxa mkupe Israel munovae. Ikeghi Ampeu loghu ye tave mphi eno Pa u ye xachhope aphike.

¹³ Ikemu timiqo no aqokitikhi MPEU, pano ghime keu lau xaidemo eno inijumoe.

¹⁴ Ikehu atsala lakhi lono Ampeu no akütsü ashomhi kütüta shi Israel ghethave

¹⁵ layemi ngo ajuaje küami no akütsü, eno akimki tungkupmi no ashomhi;

¹⁶ kughengu timi hipaqo lapiyemi no panongu pishiqhipe saküghüzüvae.

¹⁷ Ikehu Ampeu ye apumi, mighimi, chimemi jupe amloqi eno kimiye luamoe; kughengu kümtsü Alhou ithimo no akümla lhoksa shi, eno mbomzü tsa likhi picheni. Ikeghi Ampeu loghu ye tave mphi eno Pa u ye xachhope aphike.

¹⁸ Kughengu kixikila ye ami toi iqü cheni, tino aghüsahubo qhoi pitive cheni, tino aghasüli mühasü kunguu phochighi ikuve cheni.

¹⁹ Aqokitikhi MPEU loghu no ayeghi pitivae, süküghüpu sü toi timiqo piti ani, eno khumu khuu püxülu amovae.

²⁰ Ajeu no ashi hakholu anamu müzüthi, piyiu no süxachu anamu aghapiqimlae; kümtsü no pütüta tianuli shi chue,

²¹ Manasseh no Ephraim, eno Ephraim no Manasseh süqhi; pama küqhano Judah mjochile. Ikeghi Ampeu loghu ye tave mphi eno Pa u ye xachhope aphike.