ISAIAH 8 - Sumi Naga CL (Re-edited) Bible (BSI)

Assyriami no Leighini ye Akeu

¹ Tithiu Ampeu no I vilo pi, “Atupha kije lakhi luno yesüta pesü yepuku lo: ‘Maher-shalal-hash-baz’

² Eno o ghenguno thopi shikepu shi achineu Uriah ngo Jeberekhiah nu Zechariah pama lulo.”

³ I no I nipu lau wukelo li no mishive, eno anu punuve. Tileno Ampeu no I vilo pi, “Pa je ‘Maher-shalal-hash-baz’ kutsülo,

⁴ kughengu anu no, ‘I puo’ ‘I zao’ ipini keu mtha aphi lono Damascus küakini eno Samaria lono hakholu keu thimeqo ye Assyria kükau no xapu wove nani.”

⁵ Itaghi Ampeu no I vilo pi:

⁶ “Timi hipaqo no Shiloah zü mtshaminhei qo akeu ye milive no Remaliah nu ngo Rezin pama züqozü shou alovi ani kehu

⁷ julo, Ampeu no Aghoki zü kümka eno züqozü toikeu, Assyria kükau ngo paw ghüshimi kümtsü, sasü panoqo lau cheni. Tino azülaki eno aghoki mkü vesü ikughive nani,

⁸ eno Judah qha kümtsü qoiloghi no akuo kutolo yimi ikughive nani, pa chishibo sükhope nongu yeghi kümtsü qhawo nani, O Immanuel.”

⁹ Nongu ashiayeqo, ipoveni ake kutolulo; nongu aghache ghakhuqo, inilo; ipoveni ake aghünanu pepululo; iyei, ipoveni ake aghünanu pepululo.

¹⁰ Kughu küqhaju lo, ikemu avehu shimo nani; atsa pijulo, ikemu tolumo nani, kughengu Alhou no ni gholo anie.

Alhou Msalo, Ampeu Khelo

¹¹ Ampeu no Pa u kumto pesü I sünhe luve no timi hipaqo laghi lo wu pemoni ke I ghutu ghi pi,

¹² “Timi hipaqo no kiu küsüqe ani keno ti ye kumoke tishi kevilo, eno panoqo no kiu msa ani keno msaighüve kevilo.

¹³ Ikemu nongu ye aqokitikhi MPEU no akimthe kepi gihuni. Nonguw sükümsa eno agigihu ye Pa tsüni.

¹⁴ Pa ye akimthe-a, ikemu Israel ngo Judah ghenguno küpxa kepu tu, apukhu küpsüpu tuqu ghike, eno Jerusalem lo küami ghenguno alichhe lakhie.

¹⁵ Kutomo no küpxa luni cheni. Panongu ye veqhi iqi kütsave nani; panongu ye meluve no kügha pewuve nani.”

¹⁶ I no kütsü shikave keu tsape liküzü no mekhape I papemi gholo qhivelo.

¹⁷ Ampeu Khuu Jacob laghami launo Pa gi küsü ani keno, ni ye Pa khe anani eno Pa lajube anani.

¹⁸ Julo, ni eno atianuli khunoqo Zion Toghi lo achekeu aqokitikhi MPEU no I tsü keno, ningu ye Israel ghenguno Paw michipu eno xüakeu thopi ke.

¹⁹ Eno timi no nongu vilo, “Asakiqhimi ngo kithixashemi lau küsütsa julo” ipi kelo, panongu ye pano lhou lau küsütsa kelauke kumo? Panongu ye küxümi züqhushi kithimi lau kighinikile akelau keshea?

²⁰ Ampeuw shiküka eno ashepe lulo! Panongu no hipau kiqi lono pimo aye, panongu ye alolo aküvü küha kemie.

²¹ Panongu no aveküsa eno akhüava shi itsü iqhoiqi nani; kughou müzüthi ipeghini keno panongu no axuideuve no pano kükau ngo pano lhou ghusho nani. Panongu no kunguu jupuku

²² no ayeghi lo juqhi nani kemu aveküsa ngo aküzü, eno ime kelauno khümüi keu likhive nani; eno panongu ye aküzü kutho lo vesüve nani.