ISAIAH 7 - Sumi Naga CL (Re-edited) Bible (BSI)

Akükau Ahaz lau Isaiah Puwu

¹ Jotham nu eno Uzziah tilimi, Judah kükau Ahaz ghuloki lo Syria kükau Rezin ngo Israel kükau Remaliah nu Pekah pama no Jerusalem leniye ighi, ikemu leilo mlano ae.

² Kughou “Syria ye Ephraim sasü visho shipe ani,” ipi David laghami Ahaz vilo pi keno, pa ngo paw timiqo mlo ye amülhü no aghasü lo asüboqo fukini keshi khokho shive.

³ Ampeu no Isaiah vilo pi, “O nu Shear-jashub nokujo Ahaz sasü kusholu kepushi Aphikighishimi Luza kuwula lo azüla khikhi azükhe lashou lono ighi ani keno tipau shekha lo wulo.

⁴ Eno pa vilo pilo, ‘Kutokupui eno inaqhoi shilo, msa kevi, eno amsü miche ilhouve keu Syriami Rezin ngo Remaliah nu hupama xukighide ghenguno o mlo hauve kevilo.

⁵ Kughengu Syria no Ephraimmi Remaliah nu sasü o shou kixikila kuchughu ghi piani,

⁶ “Ningu Judah lewu no kichiqhi püzü ningu ampi no qhasü luveni, eno Tabeel nu pesü tile akükau shive tsüni,’”

⁷ ikehu Ampeu Alhou no ishi piani: “Ti ye khilemu shikupumo nani.

⁸ Kughengu Syria tou no Damascus, eno Damascus tou ye Rezin likhie. Ephraim ye ampe lhotsügho pungu dolono ashiaye ghi ipopinyive nani.

⁹ Ephraim tou no Samaria, eno Samaria tou ye Remaliah. Nongu no aküpülü lo mtotoimo aye nongu ye mtomla nani.”

Immanuel Michipu

¹⁰ Ampeu no itaghi Ahaz lau pi puwu:

¹¹ “Ampeu o Lhou vilo amchipu, Kithigha kuthoku qhemi na atsütsü kiqhe qhemi namu, lakhi khulo.”

¹² Ikemu Ahaz no pi, “Ni ye khumoe, ni ye Ampeu pejumo nani.”

¹³ Ikehu Isaiah no pi, “Tishiaye inilo, O David laghami! Nono timi züpüzüve keghi kiumu ithimo kehu no ye I Lhou ghi züpüzüveni keshea?

¹⁴ Tighenguno Ampeu ampi no amchipu lakhi o tsü nani. Julo, ili thathe lakhi no mishipuve no anu punu nani, eno pa je pesü Immanuel kutsü nani.

¹⁵ Kughou pa no kivi küsa kishe ithiveni keno akichhizüchi ngo akhingozü chu nani.

¹⁶ Ikemu tipa tüqhüdo ighi mphi lono nono msa akeu kükami pama yeghi ye pighive nani.

¹⁷ Ephraim no Judah launo kütüta shive kethiu khilemu sholu mphi keu tüqhüdo lakhi Ampeu no no eno ow timi ngo o laghami shou süghitsü nani, ti ye Assyria kükau ke!”

¹⁸ Tipani Ampeu no Egypt ghokiqo shekhau amthu toi ghüshimi akeqo eno Assyria yeghi lo akhi toi ghüshimi akeqo kütüghü ghi miji ku nani.

¹⁹ Panongu no tasüwo atuxu, anhepho lo atuki, asahuli, eno achu kümza-a kümtsü lo ngoluve nani.

²⁰ Tipani Ampeu no Aghoki kukuu Assyria kükau gholono piqe saghikeu pelo aqe pesü akütsüsa, apukhumhi, eno akichimhi kümtsü miyeleve tsüpe nani.

²¹ Tipa ghuloki lo timi no akushukulu amishi lakhi eno ane kini pighilu nani,

²² ikemu tipaqo no akichhizü kupukuno shi tsükeu lono tile achili akeqo ye akichhizüchi ngo akhingozü chu nani.

²³ Tipa ghuloki lo ghükayi qhethonhe me qhemi atsaibo qhethonhe piqi ache keqo ye aghüsahu eno asahuli ilhouve nani.

²⁴ Ayeghi kümtsü agha itsüve kehu timiqo no asüzü ngo apiji pesü tilau ashi hawu nani.

²⁵ Eno atoghi khipaqo hokidepe chiche keno, asahuli msake ghenguno kumono ti ye atsüaqu sala achu kümza-a shive nani kehu nongu ye tilau wumove nani.