ISAIAH 66 - Sumi Naga CL (Re-edited) Bible (BSI)

Küghakütha eno Lajupu

¹ Ampeu no ishi piani: “Kungugha no I kükalakhü, eno ayeghi no I pukhu kinepu ke; tishiaye nongu ye I ghenguno kiu toikeu ki shitsü luni kea? Eno kiutoi keu lo I pelo ngopeni kea?

² Hi kümtsü I u no mlake, tishino thokha kuchopu aghive, ipi Ampeu no sheshu. Ikemu Ni ye timi hitoi keu lau I mloqi nani: aqhokighemi eno aghungu lono xaide kemi eno I tsa sümsa chekemi.

³ “Khuu no amshitsü heqhipe mllani keno, pa ye timi heqhiveke paphie; khuu no ambe heqhipe mllani keno, pa ye atsü kuo hechheve tsüke paphie; khuu no athi kümlla tsüni keno, pa ye awo ji pesü mlla ake paphie; khuu no tsüngqüikeu ta pesü kümsükulu kümllagho shi mllani keno, pa ye ajulho kümghatsü ake paphi ke. Timi hipaqo ye pano laghi kisheluve ake, eno panongu ngulho ye aphikümqhüpu hitoi keu lono alovi cheni.

⁴ Ni ghi panongu ghenguno aghimepu kishetsü nani; eno panongu no msa chekeu panongu shou pukutsü nani, kughengu khunomu I no kukeu lo khochile moe, I no pütsa kelo, panongu no ini tsümoe; ikemu kiu no I nhethe lo axine keno, panongu no ti shike, eno I no pulomo keu kishelu ke.”

⁵ Ampeu tsa inilo, nongu Pa tsa sümsa chekemi, “Nongu thiküzümi nongu mithi eno I je ghenguno nongu hapheve kemi no ishi pike, ‘Ampeu juküvü shilo, tishianguno ningu no nongu lokivi jutsüni’; ikemu panoqou no kujove nani.”

⁶ “Mishighüna lo mqhu akeu sütsa! Achineki lono aghügha igha ani! Ti ye Ampeu no Pa ghümi lochile akeu ghügha ke!

Jerusalem gholo Alovilo

⁷ “Li ye apunu küsü sümphi lono punuve ke; aküsü no li shou ikughi mphi lono li ye anu punuve.

⁸ Khuu no tikithipu ghili chiluve akea? Khuno tikithipu ithuluve akea? Ayeghi ye atsala lakhi lono punulu nani keshea? Paikhavi lono shiye lakhi mla pheluve nani keshea? Kughengu Zion ye apunu küsü sü kemtsa, li ye atianuli punuve ke.

⁹ Ampeu no pi, Ni ye li pelo punu penike kupunukhoive no punu pemove kepu keshea?” Nongu Lhou no ishi iniju ani, “Imaye I no punulu penike khaqhitsü chekeu huno atita khave tsüni keshea?”

¹⁰ “Jerusalem gholo alovilo eno li gholo alopiqi lulo; nongu li kimiye chekemi; li sasü alovi küqhalo, nongu li ghenguno mloqa chekemi;

¹¹ tishiaye nongu tuchohiju nani eno li kicheqho lono nongu lopiqitsü nani; li no shishe kupukuno shi akeu lono nongu ye alokivishi sholu nani.”

¹² Ampeu no ishi piani: “Julo, I no aloino keu aghoki toi süghi tsüni, eno aghoki qotamo keu toi shiyeqo kinikülü nongu lau qoighipe nani; aza no anga tuchomjo akeshi li no khape eno li lukobo lo khape alokivi shi kilhe ketoi nongu tuchomjo nani.

¹³ Aza no anga lokughunotsü keshi, I no nongu lokughunotsü nani; Zion lono nongu lokughunotsü nani.

¹⁴ Nongu no hipaqo ithulu nani eno nongu mlo no alovi nani; nongu phi lo aghiqo no atsüni toi thuwu nani; tileno Ampeu küka ghili Pa qemiqo no ithive nani, eno Ampeu no Pa ghümi shou Pa mlokiqi kumo puku nani.

Ashekhau Xakütha eno Ampeu Juküvü

¹⁵ Julo, Ampeu ye ami lono ighi nani, eno Paw khurkulu ye amülhü fuchighi ketoi ighi nani, Pa loghu puku nani, eno ami mili lono Pa no sakiyi nani.

¹⁶ Kughengu Ami ngo azütakikihi vecheo, Pa no timi kümtsü shou küghathabe nani, eno Ampeu no kutomo pithive nani.”

¹⁷ Ampeu no sheshu ani, “Khunono aghutuqo lo tüghachine ghenguno aphi kimthe shicheni, eno tilau shekujo wucheni eno khunoqo no awoshi ngo ajifu eno aphikümqhüpu chuqupu chucheni keno, tipaqo ghenguno ye ashekha shiveni keu kupunuvae.”

¹⁸ “Kughengu I no panoqo kümla ngo kükümsü ithi ani eno shiye kümtsü hekütsü nikeu, ado kupunu wochea. Panongu no ighi no I juküvü ithulu nanie.

¹⁹ Eno I no panoqo gholo amchipu lakhi tsü nani. Eno panoqo gholo ghüluve kemi khami I no shiyeqo lau puwu nani eno I juküvü ghili pesü hipaqo lau pi nani, ti ye shexilika peche kemi shiye Tarshish, Pul eno Lud, eno I jekipi chimla aphikemi, azüghimkü lo akeqo Tubal ngo Javan qhalo.

²⁰ Panongu no aghakhu kümtsü lono nongu thiküzümi akümllagho Ampeu tsükeu shi ghi sasü ideighi nani. Panongu no tipaqo sasü I kimthe toghi Jerusalem lo ighi nani. Eno Israelmi no athi kümllagho bohu kimthe lono Ampeu kilo pesü ighike toi, timi hipaqo ye khami no khurshi shouno, khami no khurkulu shouno, khami no tinhemgha puche keu shouno, khami no khurgha shouno, khami no sayeshi shouno ishi xapusü ighi nani, ipi Ampeu no piani.

²¹ Panoqo khami ye I no achinemi eno Levimi shipe nani.”

²² “Kughengu atsütsü kithe eno ayeghi kithe I no lhokeu no I nhethe lo acheke toi, nongu kughukomi eno nongu je ye ache nani.

²³ Aqhi kithe lono aqhi kithe kutolo, eno Sabbath lono Sabbath kutolo, kümtsü no ighi no I mlla nani,” ipi Ampeu no sheshu ani.

²⁴ “Eno panongu no kuwolau ye khunono I mjochile keno tipaqo kithi kumo ithulu nani. Kughengu panoqo kumo lo apitheqo ye khilemu thimo nani, eno ami no panoqo piti akeu khilemu inhemo nani. Panoqo ye timi kümtsü lau aphikümqhüpu shi ache nani.”