ISAIAH 65 - Sumi Naga CL (Re-edited) Bible (BSI)

Küghakütha eno Xakulu

¹ Ni ye I phujumo kemi pelo Ni ithuluve penike kheae, Ni ye I phumo kemi pelo I phulu penike khe ake. I no shiye I je lono kumo kemi vilo pi, “Ni hile ani, Ni hile ani.”

² Hekibidemi salu nike atsala kupuju I u sükhope kheke, panoqo ye alaghi lhoksa lo cheni, eno pano mqü lhoksa papeke;

³ timi hipaqo ye tamomithe pekipheshi I xukutho cheni, aghutuqo lono aghashi cheni, eno pititu shou no akümllagho tsücheni;

⁴ panongu ye akumona shou iqa, eno tuqhou-aqo lo puthotsü ngo cheni; panongu ye awoshi chu cheni, eno mithekumo shi kulhozü panow chithakhu lo ani;

⁵ panongu no picheni, “I launo putosülo; ni ye akimthe ke.” Hipaqo ye I nigi lo amchhi ke, puchopuju iqü chekeu mi ke.

⁶ Julo, I zülo hitoi yepüani: Ni ye inaqhoi ngomo nani, ikemu lochile nani; kuchou no I no pano lukobo lo lepukutsü nani.

⁷ Ti ye nongu xine ngo nongu puasüqo xine ishi lochiletsü nani, ipi Ampeu no piani; kughengu panongu no naghutoqo lono akümllagho tsüke eno atoghiqo lono I thaigha ke, I no pano lukobo lo wovekeu lo pano xine mighi püzü lepukutsü nani.

⁸ Ampeu no hitoi pi ani: “Atsaizü kithe no abohu lo akeloye, timiqo no picheni, ‘Hipau kütsa kevilo, kughengu tile kükümgha anike,’ tihutoi, I qemi ghengu likhino Ni ghi kümtsü kütsavemo nani.

⁹ I no Jacob kughukomi saghi nani, eno Judah lagha lo naghutoqo lo ampemiqo saighi nani, I no kishelu keqo no ti qhasü luve nani, eno I qemiqo no tile küghüna nani.

¹⁰ Sharon ye lhoxü lojiqo ghenguno achu kümza-a shinani, eno Achor khila ye lhoxü lojiqo no ihozü chekeu qha shive nani; I no hitoi shi I phuighi kemi ghenguno shitsü nani.

¹¹ Ikemu nongu khunoqo Ampeu qhive keno, khunono I kimthe naghuto kümsümave keno, Angukümgha ithulu niye achuqupu pesü mlla chekeqo, eno Kükümgha ithulu niye atsaiji jeli kitekungo chekeqo,

¹² I no nongu pesü azütakikihi tsüve nani, eno nongu kümtsü no hekiqhiu zülo pishiqho nani, kughengu I no nongu kukelo, nongu no khochile moe, I no nongu pütsa kelo, nongu no ini tsümoe, ikemu nongu no kiu no I nhethe lo axine keno ti shike eno I no pulomo keu kishelu ke.”

¹³ Tighenguno Ampeu Alhou no ishi piani: “Julo, I qemiqo no chu nani, ikemu nongu ye müzüthi nani; Julo, I qemiqo no sho nani, ikemu nongu ye tüghüthi nani; Julo, I qemiqo no alovi nani, ikemu nongu ye kujomza kepu shinani;

¹⁴ Julo, I qemiqo no amlo lono alokivi le phe nani, ikemu nongu ye amlo sakütü ighaqa nani, eno alolo itapinyi mloqa nani.

¹⁵ Iw kishekiphemi no müsüini kelo nongu je peitha nani, eno Ampeu Alhou no nongu pithive nani, ikemu Pa qemiqo ye, Pa no aje kithe lakhi tsüve nani,

¹⁶ tishikeu lono aghakhu lo timi khuu no pa likhi pa kümghatsü keno, pa ye kuchou Lhou no kumghatsü nani, eno aghakhu lo timi khuu no ashoqhi shini keno, pa ye kuchou Lhou vecheo ashoqhi shi nani; kughengu wove keu küküpna ye kümsümavae, eno tipaqo ye I launo küsüvae.

Kungugha Kithe eno Ayeghi Kithe

¹⁷ “Julo, I no kungugha kithe eno ayeghi kithe lhophe ani; wovekeu lo shivekeu kümtsü kümsümave nani momu akükümsü lo ighi move nani.

¹⁸ Ikemu I no lhophetsü keu shou alholo alovi eno alokiqi shilo; kughengu julo, I no Jerusalem lhophe keu ye alokivi shipeniye ke, eno liw timiqo pelo alovi peniye ke.

¹⁹ Ni ghi Jerusalem shou alovini eno Iw timiqo shou alokivi shini; khunomu tilehi aküqa momu aghime ghügha chimla nani.

²⁰ Angaqo ye akughunu aphi lono khilemu thivemo nani, eno kitemi no axüshu no thi nani, kughengu lhothemiqo no ampe aqhe shino thi nani, eno axinemi no ampe aqhe lono thive aye, ti ye müsüinive kehu ke.

²¹ Panongu no aki shiqhe no, tilehi küghüna nani; panongu no atsailu chi nani eno atsaizü tipau sholu nani.

²² Panongu no aki shiqhe no kütami no küghüna keu shimo nani; panongu no shosü no kütami no tipau chukeu shimo nani.

²³ Panongu kümla ye adou shivemo nani, momu kütsakungove nike atianuli punu keu shimo nani, kughengu panongu ye Ampeu no kümghatsü kemi kughukomi shi nani, eno panongu lagha ghi akümghami ke.

²⁴ Panongu no I kumphi lono I no khochile nani; panongu no pi aphi lono I no chiluve nani.

²⁵ Atine ngo ambe no kümtsa chu nani; abongshuu no amishi toi aghijini chu nani; eno ayeghimkhu no apighi chuqupu shi nani. Iw akimthe toghi lo panongu ye ghüza kile momu kütsakile monani,” ipi Ampeu no piani.