ISAIAH 64 - Sumi Naga CL (Re-edited) Bible (BSI)

¹ O pelo atsütsü kiyeve no iqighi penishi, tishikeu lono naghutoqo no khokhoshi penie—

² tipaqo pelo ami no asü lokaqo piti akeshi, eno ami no azü kumqho akeshi— tileno O ghümi pelo O je ithi penike, eno shiyeqo pelo O zülo khokhoshi msa peniye ke.

³ Kughou Nono akichiqhipu kümla, nino kümsümo keu shi keno, ti ye Nono iqighi kelo, naghutoqo no O zülo khokhoshi ke.

⁴ Timi khunomu O nguno alau ye alhou kütau anipi chimla aphi momu khuno nhethi nomu ithulu mphie, timi no huqhe kelo khochiletsü chekeu Lhou ye O likhi ke.

⁵ Khunono achipiu shikeu lono alovi cheni keno Nono tipaqo pütsa cheni, O laghi zünike O kümsülu kemi Nono pütsa cheni. Nono ni shou amloide, ikemu ningu no axine shi auve, ningu ye ado kushuo ni xine lo auve kehu ni xalu nanima?

⁶ Ningu kümtsü no mithemo kemi toivae, eno ni mikucho ye niqhinilai keu phinhe toivae. Ningu ye asünipa ighiqive keu toivae, eno ni xine no amülhü toi ni sasü wuvae.

⁷ Milakhi mu O lau ighamku moe, eno milakhimu O süije nike wumoe, kughengu Nono ni launo itshüvae eno ni pelo ni xine lo tsüma auve peke.

⁸ Ikemu itehi O Ampeu, No ye ningu papu ke; ningu ye aghani eno Nono alikümlau ke; Ningu kümtsü Nono mla keqoke.

⁹ O Ampeu, ighono aloghuide kütü kevilo, eno alholo ni xine kümsülu tsü kevilo. Kimiyeno jutsülo ningu kümtsü Ow timiqo ke.

¹⁰ O kimthe phughiqo ye timi asayeqha toivae; Zion ye timi asayeqha toivae, Jerusalem ye küghüküghaleivae.

¹¹ Niw akimthe eno jukighilepu chineki, khilehi ni puasü no O sheqhe chekeno ami no pitilevae, eno nino kimiye chekeu-a kümtsü ixapinyi ani.

¹² O Ampeu, No ye hipaqo jupe O likhi O hakha ani keshea? No ye inaqhoi ngove no ni pelo aghimeshi apeni keshea?