ISAIAH 63 - Sumi Naga CL (Re-edited) Bible (BSI)

Ampeu Mkhükulu Tsala

¹ Edom qhalo Bozrah lono chekeu, hughüike phimini pepusü chekeu ye khuu kea? Khuu pa no pepuche keu phimini lo ighono jukighilepu shi ani keno, Pa ye Pa kükakumto lono cheni, “Achipiu-mikucho lono pi akeu eno xalu nike akumtoshi akeu ye Ni ke.”

² Kushiye o phimini ye huchuyi kea? Hi ye atsaithi kütsüghümi phimini toi anie.

³ “I likhi I no atsaithi tsüghüve ake, eno timiqo khunomu I gholo ighimoe; I no I loghu kighide lono panongu qodaqhi eno I xukighide lono panoqo nedaqhi; panoqo gi lo aji no I phimini lo hedaveke.

⁴ Kughengu amkhükulu tsala ye I mlo lo ani, eno I no xaluni keu mpe ye ighivae.

⁵ I no pishipuwo juke ikemu milakhi mu I kuphuni kemi kühave; Ni ye akichiqhive ikemu khunomu ti ithi tsümoe; ikehu ni ampi no Iw xakulupu süghi, eno I loghu no I süqheke.

⁶ I no I loghu lono timiqo qodaqhi; panoqo pelo I xukighide shomzü pe, eno I no panongu küxüji ayeghi lo pele qhike.”

Ampeu w Küpükini Kümsülu

⁷ Ampeuw iqemokeu kikimiye I no kümsüchile nani; Ampeu shekiqhe, Ampeu no ningu tsükeu kiqi lono, eno Israel lo shishe akivi tsükeu ghenguno, ti ye Pa no Paw kimiyeqhiyi keu eno iqemokeu kikimiye kupukuno shi akeu kiqi lonoke.

⁸ Kughengu Pa no pi, “Panongu ye Iw timiqo ke; I tianuli, kühakügha shimo nani.” Ikehu Pa no panoqow Xakuluu shive.

⁹ Panongu no imeke kümtsü lo, Pa ghi ime ke; eno Paw kungumi no panongu xaluke; Paw kikimiye eno amlo ighiqhiyi keu no panongu xachilelue; Pa no wovekeu tsala lo pülhapuju panoqo süqhe cheke.

¹⁰ Ikemu panongu no Pa hebideke, eno Pa Ghungu Kimthe pelo amloküsa shipeke; ikehu Pa no panoqo ghümi lau küqhano Pa ampi no panongu sasü aghüshi ke.

¹¹ Ikemu Pa no wovekeu tsalaqo kümsüchilelue, ti ye Moses eno pa gholo kichemiqo. Khuu no ambe khemi gholono lhoxü lojiqo sasü azüghi mta lono ipeghi keno, Pa khilehi ani kea? Panoqo mta dolo Pa Ghungu Kimthe sütsü keu ye khile ani kea?

¹² Pa no Moses u ajeu Pa kükakumto tsüve, Pa likhi Pa je shekhaha ghenguno ache penike panongu zülono azüghi kijethave tsüke.

¹³ Pa no azükutho kachesü panongu sawue, khurshi no asayeqha lo cheke toi, panongu ye kiumu küpxamoe.

¹⁴ Pichepighi lhoxüqo no akhila lo iqiche keshi, Ampeu Ghungu no panoqo kulhoqhi tsüe. Ikehu no ye ow timiqo saphe, eno O likhi O juküvü ghenguno tishike.

Akipimi Qhikütsü Kighini

¹⁵ Kungugha lono pishipiqi ju tsülo, O kimthe eno jukivipu-a lono jutsü lo, O lokümsü ngo O küka khile ani kea? O mlo ighiqhiyi keu eno O kikimiye ni launo süchilevae.

¹⁶ No ye ningu papu ke, Abraham no ningu mtha pinamu, eno Israel no ningu kihimo pinamu, O Ampeu, No ye ningu papuke, khaghi nomu niw Xachilekuluu no O je ke.

¹⁷ O Ampeu, No ye kushiye ni pelo O laghi vezüvepe ani, eno kushiye ni mlo shikümkave tsü ani kea? Eno kushiye tishikeu lono ni pelo O sümsa movepe kea? O qemi, O mheghi shiye ghengu likhi nomu ideighi tsülo.

¹⁸ O kimthe timiqo ye ado hami ghenguno qhasüpe ngolue; ikemu itehi ye ni ghümi no o kimthe ki nedaqodave tsüae.

¹⁹ Ningu ye No ye khilemu ni shou ayepe püaghimo kemi toivae, eno O je vecheo ku püaghimo kemi toivae.