ISAIAH 62 - Sumi Naga CL (Re-edited) Bible (BSI)

Zion Xakulu Chekeu

¹ Zion ghenguno Ni ye inaqhoi mo nani, eno Jerusalem ghenguno Ni ye qümüive mo nani, Liw achipiu-mikucho no vüqai yepüvü moke kutolo, eno liw xakulupu no akuluqhe iqü aketoi moke kutolo, Ni ye inaqhoive mo nani.

² Zion, shiyeqo no ow achipiu-mikucho ithulu nani, eno kükami kümtsü no o juküvü ithulu nani, no ye aje kithe pesü o ku nani, eno aje ti ye Ampeu no tsü nani.

³ No ye Ampeu ghakhu lo jukighilepu kütsükuqho lakhi shi nani, eno o Lhou yekipe lo kükakütsüqho shi nani.

⁴ Hinguno hilau no ye Pheve kemi ipi kumo nani, eno nongu ghakhu ye khilemu Pighive keu ipi kumae, ikemu o pesü ishi pinani, I züküvü ye li shou ani, eno o ghakhu ye külakupu shiluvae; kughengu Ampeu no o lau amloqi ani, eno Pa no o ghakhu ye külauvepe nani.

⁵ Apulhothe lakhi no ililhothe sasü külau ketoi, o punoqo no o sasü küla nani, eno külapuu no paw külaliu jupe alokivi shi ketoi, o Lhou no o shou alokivi shi nani.

⁶ O Jerusalem, o liwoqo lo, I no aghukhemi qhivae; putho pucho panongu ye khilemu inaqhoive mo nani. Nongu khunoqo Ampeu pelo kümsüchile anipe keno, akulhoqhi kevilo,

⁷ Pa no Jerusalem shiqhe kithe moke kutolo, eno ayeghi lo tino shekiqhepu shimoke kutolo, pa pelo akulhoqhipe kevilo.

⁸ Ampeu no Pa u ajeu eno Pa u kumto shou no ashoqhi hitoi shivae: “Hinguno hilau ye nongu thi pesü no ghümi tsümae eno inaghami ye no tsaizü shope moae;

⁹ ikemu khunono yisü keno ti chunani eno Ampeu sheqhe nani, eno nongu atsailu chikemi no ti pewo Iw akimthe chineki lono sholu nani.”

¹⁰ Kathawu lo, khagho kathawu lo; timiqo ghenguno alaghi kutolo, shiqhelo, aghüzü laghi shiqhelo; tile atuqo ikhivelo; amchipu timiqo shou süqhelo.

¹¹ Julo, Ampeu no ayeghi shekha kuto sheshuvae, Zion ngaqo vilo pilo, “Julo nonguw xakuluu ye cheni, julo, Pa no asaxü pecheni, eno Pa no xaphe luve kemi no Pa züu shino cheni.”

¹² Panongu ye Akimthemi ipi ku nani; eno Ampeu no xachile luve kemi ipi ku nani; eno nongu pesü Alhou no Phuche kemi, eno Qhivemokeu Mishighüna ipi ku nani.