ISAIAH 61 - Sumi Naga CL (Re-edited) Bible (BSI)

Xaphekulupu Mpe

¹ Ampeu Alhou Ghungu no I shou ani, kughengu Ampeu no I nukishevae, I pelo kumlhomi lau sütsa kivi süghi peniye, Pa no amlo ghimeshi akemi shipivi peniye I puwue, akughumi lau kuqhokiphe sütsa sheshu peniye, eno akughumi ghenguno akughuki khaqhitsü peniye ke.

² Ampeu pulou mpe eno Ni Lhou no amkhü lutsü keu tsala sheshu peniye, qamlo akemi lopiqitsü peniye ke.

³ Zion lo mloqa akemi lopiqitsü peniye, eno ayevu theli lo jukivi kütsükuqho panongu tsüniye, mloqa keu theli lo alokivi thazü tsüniye, amloksa theli lo shekiqhepu phimini tsüniye ke; tishianguno panongu ye amikucho phisübo, Ampeu no shosü keu, ipi ku nani, eno Ampeu juküvüpu shinani.

⁴ Panongu no khaghi lono ixapinyive keu shiqhekithe nani; wovekeu ghuloki lono kütsakungove keu shiqhekithe nani; panongu no khaghilo mishighüna ixapinyive keqo shiqhekithe nani; Tipaqo ye tiqheli kutomo züuno kütsakungove keqo ke.

⁵ Tüsümi no puthughope, nonguw lhoxü lojiqo tucho nani; inaghami no nonguw alu kichimi eno atsailu chitsü nani;

⁶ Nongu ye Ampeu chinemi kepi ku nani, panongu no nongu ye Ni Lhou qemiqo kepi ku nani; nongu no shiye kütamiw kinikülü peitha nani, eno panongu jekipi shou no, nongu no akijivile nani.

⁷ Nongu kukujo theli lo nongu saje ye kini kishetsü nani; küthakügha theli lo panongu ye pano makho jupe alokivi shi nani; tighenguno pano yeghi lo, panongu saje ye kini kishetsü nani; panongu ye pülhapuju alovi nani.

⁸ Kughengu ni Ampeu ye achipiu xakütha kimiye; I no aküpka ngo akumou mithi ke; I no amikucho lono panongu asaxü tsü nani, eno I no panoqo sasü lhokta ghenguno puloshoqhi shi nani.

⁹ Pano tikughuko ye shiyeqo gholo ajekipi shi nani; eno panoqo lagha ye timiqo gholo ajekipi shi nani; panoqo ithulu kemi kümtsü no panongu ikhilu nani, eno panongu ye Ampeu launo ighi kemi ipi nani.

¹⁰ Ni ye Ampeu launo shishe alovi nani; I ngulho no I Lhou sheqhe nani, kughengu külapuu no achineu toi jukivi kütsükuqho pu ketoi, eno külaliu no akughupu chikuqo ni ketoi, Pa no xakulupu phimini pesü I pipe; eno achipiu-mikucho pesü I phiküzü shitsü ke.

¹¹ Ayeghi no apiti lhophetsü ketoi, eno aghutu no athi yisü püakeu lhophetsü ketoi, Ampeu Alhou no achipiu-mikucho ngo shekiqhe pesü ashiaye kümtsü zülo mini ipeghilu pe nani.