ISAIAH 60 - Sumi Naga CL (Re-edited) Bible (BSI)

Ighini keu lo Israel Juküvü

¹ Ithu no yepüvü lo, kughengu o küvü ye ighivae, eno Ampeu juküvü ye o shou yepüvü ani.

² Julo, aküzü no ayeghi nhaluve nani, eno aküzü kutho no timiqo nhaluve nani, ikemu Ampeu no nongu shou yepüvü nani; eno Pa juküvü nongu shou akeu ithulupe nani.

³ Shiyeqo nongu küvü küdau ighi nani, eno nongu tsala kithe ipeche keu küdau kükami no ighi nani.

⁴ Nongu nhethi no pishipuwo julo; panongu kümtsü hekütsü no nongu lau cheni; no nuliqo ye putou no ighi nani; eno nongaqo ye xapu ighi nani.

⁵ Tileno nongu no ithulu no alokivi yebide nani; nongu mlo ye alokivi no thüthüshi nani eno sheqhe nani, kughengu azüghi lo akini kupukuno shi akeu nongu lau ighive nani; eno shiyeqo küakini ye nongu lau ighive nani.

⁶ Sayeshi loji kitikhi no nongu küzüluve nani, Midian ngo Ephah lo sayeshi tiqo, eno Sheba lono ighikha nani. Tipaqo lono ameshoyi ngo tsüngqüikeu ta xapu ighi nani, eno Ampeu shekiqhe, alokivi sütsa süghi nani.

⁷ Kedar lo lhoxü loji kümtsü nongu lau süghive nani; Nebaioth lo ambetsüqo ye akümllagho shi nongu lau süghi nani; tipaqo no aghokulu shi I kümlla khache lo ikughi nani, eno I no I chineki jukighilepu shi qhi nani.

⁸ Khüngküsü toi yewu akeu hipaqo ye khuno kea? Amiqhi no alashe lo aketoi hipaqo ye khuno kea?

⁹ Kughengu azüghimkü yeghi ye Ni ighini keu laju nani; Tarshish lono zükiluqo paghi ighive nani; Tileno nongu tianuli aghacheu no saighi nani, eno panow ameshoyi ngo ghükayi ghi pesü ighi nani, eno ti ye Israelmiw Akimthe Mpeu je ghenguno saighi nani, kughengu Pa no nongu jukighilepu shive tsüe.

¹⁰ Inaghami no nongu liwoqo shiqhekithe nani, eno panow kükamiqo no nongu huthu nani; kughengu I xukighide lono I no nongu ghimeqhi, ikemu Iw küpükini lono I no nongu kipimi qhitsüke.

¹¹ Now khaghoqo ye khaqhipe anani, eno putho pucho khilemu khavemo nani, tishianguno timiqo no nongu lau shiye kütami kini süghi nani.

¹² Kughengu shiye momu kükaqha khipaqo no nongu qemoni keno, tipaqo ye qhoi püghave nani.

¹³ Lebanon jekipi no nongu lau ighi nani, ti ye Cypress süboqo, asahubo eno asübo kütauqo pesü I kümlla khache jukighilepu shitsüni ke ighi nani, eno I kungo-a ighono ajuküvü shitsü nani.

¹⁴ Nongu qodaqhi chekemi nuliqo no pishiqho pesü nongu lau ighi nani; eno nongu junuqhi kemi kümtsü nongu pukhu philo pishiqho nani; panongu no nongu pesü Ampeuw mishighüna, Israel lo Akimtheu, Zion ipi kunani.

¹⁵ Nongu ye peve eno jumithive kemi shi ache, eno khunomu nongu katha moke, ikemu I no nongu shou akükanguagha pukutsü nani, eno tiqheli-tiqheli kupuju alopivitsü nani.

¹⁶ Nongu no shiye kütamiw kinikülü lukhave nani, eno kükami chuqupu kümtsü nongu no chu nani; tileno nongu no, Ni Ampeu ye Jacob Lhou Akughushuu, nongu Xachilekuluu kepi ithi nani.

¹⁷ I no alazayi züqhulo ameshoyi süghi nani, ayi theli lo ghükayi süghi nani, asü theli lo alazayi süghi nani, atu theli lo ayi süghi nani, nongu yepemi ye akümtshami shi nani eno nongu shou jukükütsümi ye achipiu shiche kemi shi nani.

¹⁸ Ghiqhi heqhikeu sütsa ye nongu yeghi lo chilu kithemae; eno shiküpsa ngo kütsakungo keu ye no lughi lo chilu moae; nongu no now aliwoqo pesü Xakuluu ipi ku nani, eno now khaghoqo pesü Shekiqhe ipi nani.

¹⁹ Khetsünhe ye puchou nongu küvü shimoae, momu putho lo aqhi ye nongu küvü shimoae, kughengu Ampeu no shekhaha nongu küvü shiniae, eno nongu Lhou no nongu juküvü shinani.

²⁰ Now khetsünhe ye khilemu ilovemo nani, momu no qhi ye khilemu süchileve monani; kughengu Ampeu no shekhaha nongu küvü shinani, eno nongu mlo ghime tsala ye kishekhave nani.

²¹ Now timi kümtsü no achipiu shi nani, eno alhokupuju lo ayeghi pesü amheghi shiluve nani, panongu ye I no shosükeu lokaqo eno I u lo kümla ke, tishikeu lono I juküvü shiniye ke.

²² Nongu gholo kihi kelo aghuloshi aghikeu no alimi shive nani, eno kümtsü gholo aghulou no shiye kumto shive nani; Ni ye Ampeu ke; eno ado achipi lono I no ti shikupu nani.