ISAIAH 6 - Sumi Naga CL (Re-edited) Bible (BSI)

Isaiah no Ampeu Ithulu

¹ Akükau Uzziah kithi mpe lo Ampeu no chuqumghaike-a lo Pa kükalakhü lo iqa aghikeu I no ithulu; Pa phishe no achineki nhape ae.

² Seraphim no Pa shou puthugho ae. Panongu lakhikhi no achishibo tsügho pua: achishibo kini no agi nhapu, kini no apukhu, eno kini pesü yewu ae.

³ Panongu dolono ighamku pi: “Aqokitikhi MPEU ye akimthe, akimthe, akimthe ke; ayeghiqha ye Pa jekipi küka no chhitoi ani!”

⁴ Panongu sütsa no achineki boqha süküghütha, eno amchhi no chhitoive.

⁵ Tileno I no pi, “I hasapuae! Ni ye pühavae; kughengu ni ye akichi mithemo kemi, eno mithekumomi gholo xüacheni; ikeghi I nhethi no aqokitikhi MPEU, Akükau ithuluvae!”

⁶ Tileno Seraphim lakhi no tsümtsa pesü akiptia lono amibalu lakhi tsalu keu pa u lono pesü I lau yeighi.

⁷ Pa no I mütsü ditsü no pi, “Hi no o mütsü dive tsüae; o kipimi süwuve tsüae eno o xine peve tsüae.”

Ampeu no Isaiah Puwu

⁸ Tileno I no Ampeu sütsa chilu, “Ni ye khuu puwuni, eno khuu no ni ghenguno wuni kea?” I no khochile, “Ni hile ani! I puwulo.”

⁹ Pa no pi, “Wulo, eno timi hipaqo vilo pilo: “‘Ini-ni alo, ikemu vethamlae; ju-ju alo, ikemu ithumlae.’

¹⁰ Timi hipaqo mlo shikümka lo, panoqo kini kughupove tsü, eno anhethi kighicheve tsülo; tikumo aye panongu no ithulu, chilu eno vethalu no xaide püzü shipivi luve nosake.”

¹¹ I no pi, “Khitohi kea, O Ampeu?” Pa no pi, “Aphughi lo eno aki lo küxümi kühano kümsa ixapinyi eno ayeghi no yenguyive moke kuto,

¹² eno Ampeu no aghache lo timiqo hapuwuve no a-a kümtsü yenguyive moke kutoloe.

¹³ Chighi lo lakhi ghüpüaghi namu tighi piti kitheve nani. Ikemu aphisübo yeqhi kelo azüngü likhive cheke toi tipau züngü lono apiti kimthe ipeghi nani.”