ISAIAH 59 - Sumi Naga CL (Re-edited) Bible (BSI)

Alhoksa eno Qhaküsü

¹ Julo, Ampeu u ye ikholove no nongu xaluni keu tolumo ake kumoe, momu Pa kini ye ipove no nongu sütsa chilumo ake kumoe;

² ikemu nongu xine no nongu ngo Alhou dolo kijethavae, eno nongu xine ghenguno Pa gi nongu launo tsüghüvae tighenguno Pa ye nongu ghügha chilu amoe.

³ Kughengu nongu u ye aji no kitiqe püani eno nongu ulotiqo ye akimthe shiamoe. Nongu mütsü lo akimki ani; eno nongu mili no kixikila tsa pike.

⁴ Khunomu atsa kükügha lo achipiu lono wu chemoe, khunomu yepemi lau amikucho lono wu chemoe, panongu ye adou tsa shou pükhüpe acheni eno akimki tsa pi cheni, panongu no mqümgha shi cheni eno tileno shikipimi iqiphe cheni.

⁵ Panongu ye tüghü kupu pighi yikhu ikhuqhi cheni; panongu ye thalaxüta gho cheni; ayikhu tipau chukemi ye thive cheni, eno ayikhu hephoju aye athicho pighi ipeghi cheni.

⁶ Thalaxüta tipaqo ye aphimini shimlae; eno timiqo no ti ghopüani kemu ti ye panongu küzü mlae. Pano kümlaqo ye axine kümla ke, eno ngukangugha kümla ye pano u lo anike.

⁷ Panongu pukhu no alhoksa lau powu cheni, eno mighimghai pimihami pithive cheni; panongu kükümsü ye kixikila kükümsü; hexapinyi keu ngo kütsakungoni keu no pano laghi ke.

⁸ Panongu ye külakishi laghi mtha, eno achipiu xakütha ye pano laghi lo kühae; panongu laghi ye küsakügha; eno tipa laghi zü kemi khunomu külakishi mthae.

⁹ Tighenguno achipiu xakütha ye ni launo putosüvae, eno achipiu-mikucho ye ni heche mlavae; ningu no aküvü lajuke ikemu aküzü ighi; vüqalei keu laju ke ikemu khümüi keu no küzüluve.

¹⁰ Ningu ye anhethi kighichemi toi kükaju pühae; eno anhethi küha kemi toi kükaju pühake; putho lo toi puchou ghi ningu no küpxalue, timi ighono akumtomi gholo ningu ye kithimi toivae.

¹¹ Ningu kümtsü ava toi mqhu ani; eno amiqhi toi igha auvae; ningu no achipiu xakütha laju kemu kühavae; ningu no xakulupu laju kemu ti ye ni launo putosüvae.

¹² Hi ye niw hekibide no O zülo kümzapu shive akehue, eno ni xine no ni shou thopi shi ani; kughengu niw hekibide no ni gholo ani, eno ningu no ni xineqo ithi ani:

¹³ ningu no Ampeu hebide eno Pa milive ke, eno Alhou launo tsüghüsü wuve, kütami qodani keu ngo kumghoni keu tsa piuve, eno akimki kükümsü ngo akimki tsa pini ke amlo lono xathave ke.

Küghakütha eno Xachilekulu

¹⁴ Achipiu xakütha ye hapupovae, eno achipiu-mikucho ye putosüvae; kughengu kuchou ye alaghila lono küpxavae, eno amikucho ye tilehi iloghi mlavae.

¹⁵ Amikucho ye kühavae, timi khuu no alhoksa lono tsüghü wuveni keno, pa ye pa ampi pesü tsükuchupu lhoxü toi shivae. Ampeu no ti ithulu, eno achipiu xakütha kühakeu ithulu no Pa mlo qimove.

¹⁶ Pa no ju kelaye milakhi mu alakishi shitsüni keu ithumlae; tileno Pa u no xaphelue, eno Pa chipiu-mikucho no Pa süqheke.

¹⁷ Pa ye achipiu-mikucho no pa mlaküxa shike, eno tino paw xakulupu yikütsükuqho shike; eno pa no amkhükulu no pa phimini shike, eno minemighei keu no aphi toi pa küzüpu ke.

¹⁸ Pa no panoqo kümla kiqi lono, lochile nani, axukighide pesü pa mjochile akemi ngo pa ghümi lochile nani; azüghi küdau akemi lau Pa no lochile nani.

¹⁹ Tishikeu lono kulolaumi no Ampeu je sümsa nani; eno khetsünhe kipelaumi no Pa juküvü sümsa nani; kughengu Ampeu mülhü no fukucho kelo, aghoki no iqhaighu qoiqi aketoi Pa ye ighi nani.

²⁰ Ampeu no piani, “Xachilekuluu ye Zion lo, Jacob limi khunoqo axine lono ideighive akeno, tipaqo lau ighi nani.”

²¹ Ampeu no highi piani, “I ghengu ye, panongu sasü Iw puloshoqhi ye hike: I Ghungu khikhi nongu lolo ani keno, eno I kükütsütsa khikhi I no nongu kichi lo süvetsü akeno, tipaqo ye khilemu nongu eno no tianuli ngo atilimi launo wuvemo nani; eno ti ye ishi tsala lono alhokupuju kutolo ke.”