ISAIAH 58 - Sumi Naga CL (Re-edited) Bible (BSI)

Kuchou eno Kichileu Kümvü

¹ “Ighamku lo, Süchile kevilo; afuko toi o ghügha süqhelo; Iw timiqo lau panongu xine shuphe tsülo, Jacob lagha lau panongu xine shuphe tsülo.

² Panongu ye achipiu-mikucho papeche keu shiye shi aghi kepu toi, momu Alhouw küghakütha milivemo kemi toi, Ghulo atsütsü I mlla acheni, eno I laghi ithini keu lo azüvü acheni, panongu no I vilo achipiu xakütha iniju ke; eno azüküvü shi Alhou lau kupunu wuke.

³ ‘Kushiye nino kümvü akeghi, No ye jutsümo kea? Kushiye nino aqhokigheu shikeu ithi tsümo kea?’ Julepi, nongu no kümvü akelo ghi, nongu ye nongu pulou shi cheni, eno nongu kümla kishimi qodaqhi cheni.

⁴ Julo, nongu ye kümvü apülaghi kighe eno kichighi cheni, eno axeküsü lono kihekile cheni. Hipa ghuloki loye, kümvü keu hikithipu pesü Akiqheu-a lo nongu sütsa initsü nani kepi kümsü ani keshea?

⁵ Timi lakhi no kümvü keu lono aqhokigheu shilu aye, Ni ye titoi kümvü keu ikhilutsü cheni ke kumo keshea? Ikemu nonguw kümvü keu ye ayeghübo no ihoiqi keshi, momu yeqhiyephi ngo ayevu shou ihozü keu no keshea? Nongu ye hitoi keu pesü kümvü keu momu Ampeu no ikhilutsü keu tsala kepi kümsü ani keshea?

⁶ “Ikemu kümvü keu lono kixikila küxü kütsügha lono kuqhophe luve aye, eno kütami shou kuokhasü kuqhovetsü aye, eno nedaqodave kemi khaqhi pheve aye, eno ayikichhe jeli kümtsü ikhivetsü aye, hitoi kümvü keu no I pulou ke kumo keshea?

⁷ Kümvü keu ye müzüthi aghi kemi sasü nongu chuqupu küsajeni keu, eno aki küha kemi nongu ki lo sasüni keu, aphimini küha kemi aphimini tsüni keu, eno alimi launo itshü wuve moni keu noke kumo keshea?

⁸ Tishiaye, nongu küvü ye tsükutho küvü toi ipeghi nani, eno nongu shou shikipivi ye itheno ighive nani; nongu chipiu no nongu züu shino wu nani; eno Ampeu juküvü no nongu thiu nongu khe nani.

⁹ Tileno nongu no ighamku nani eno Ampeu no khochiletsü nani, nongu no ku nani eno Ampeu no pinani, “Ni hile ani.” Tsala nongu no kuokhasü nongu dolono ikhi süwuve aye, eno kütami nguku keu ngo kixikila tsa pikeu ikhive aye,

¹⁰ tsala nongu no müzüthi kemi achuqupu tsü aye eno ichheime akemi mlo vepiqitsü aye, nongu küvü ye aküzü shou yepüvüve nani, eno nongu küzü ye puchomghü toive nani.

¹¹ Eno Ampeu no tamono nongu mijetsü nani, eno küsakusho lo ghi nongu pulou shitsü nani, nongu saghi shikumtotsü nani; eno nongu ye azü no pütsüve keu ghutu toi nani, eno azü hauvemo keu ghoki toi nani.

¹² Mulho lono now kütsapinyive keu phughiqo ye shiqhe kithe nani; eno wovekeu tiqheli boqha ye itaghi shiqhe kitheve nani; nongu ye aliwo shikithe kemi, alaghila shikithe kemi kepi ku nani.

¹³ “Tsala nongu no Sabbath tsala lo nongu pukhu süchile aye, eno I kimthe tsala lo nongu shi pulou shinikeu lono süchile eno Sabbath tsala ye azüküvüpu tsala kepi aye, eno Ampeuw akimthe tsala ye gihuküzüpu kepi aye; tsala nongu no pulou laghi zümono, momu akümla shimo eno adou tsa küghamo no atsala tipau ikhilu aye,

¹⁴ nongu ye Ampeu lau azüküvü shi nani, eno I no nongu pelo ayeghi lo akiqheu shou ikulupe nani, eno Jacob kinikülü mheghi pesü, I no nongu loji nani, kughengu hi ye Ampeu no piqhive keu tsake.