ISAIAH 57 - Sumi Naga CL (Re-edited) Bible (BSI)

Israel no Adou lono Ajulho Mlla

¹ Amikuchomi no thive keghi khumu amlo lo kümsüpu moe; khunomu vethamla no akelono amlo kütsümi sawuve ke. Kughengu achipiu-mikuchomi ye amhekiqipu lono sawuve;

² pa ye aloino keu lo wuvae; achipiu laghi lo cheche kemi ye pano lüpa lo ihozü acheni.

³ Ikemu nongu tuumi eno kütüqhalimi nuliqo, hilau kupunu ighilo.

⁴ Nongu ye khuu junuqhi ani kea? Nongu ye khuu shou pipuku ani eno khuu shou nongu mili chhophe ani kea? Nongu ye ayezah hexave kemi eno kühaküghami tianulike kumo keshea?

⁵ Nonguw aphisübo ngo asübo jeli qholono ashiaji ghasümla no ghüghüshi chekeqo, nongu ye akhila eno atuxu lono nongu tianuli heqhipe aghakishi shi mllae.

⁶ Akhila lo atumloqo no nongu saje ke; tipaqo shou no nongu no asaqhi cheni; tipaqo lau nongu no shokepu kümllagho ngo athi kümllagho pesü tsüke. Ni ye hipaqo shou aloqini keshea?

⁷ Nongu no atoghi qhemghai keu lo nongu lüpa shipe qhike, eno tilau akümllagho tsünike iqhoe.

⁸ Nongu no no hukikha sholokuu aphikümqhüpu julho qhipüani; nongu ye I pheve keu lono, nongu lüpa xape kümsa qhivae, nongu no tilau iku, eno nongu no ti qhape qhi, panongu sasü puloshoqhi shike; nongu no pano lüpa kimiye, eno panongu sasü nongu shiaji ghapiqi cheni.

⁹ Nongu no akükau lau axokütsüngü ala nongu philo süluve, eno thazü pesü wuke; nongu no now züqhukishimi ala kushuo lo puwu ke, eno Kithigha kutolo piqike.

¹⁰ Nongu no alaghi kushu jupe qeive, ikemu nongu ye ishi pimoe, “Hi ye lajupu kühae”; nongu küka kumto tsü penike aküxü kithe phulu, eno tighenguno nongu ye qeinaive moke.

¹¹ Nongu ye khuu ju püzü msave keno, I lau miki, I kümsümave, eno amlo lo qhimove kea? I no ado kushuo inaqhoi kutuu pesü ngove keghi, nongu ye I msa mono anike kumo?

¹² I no nongu chipiu ngo nongu kümla lhevetsü nani, ikemu ti ye nongu la shimla nani.

¹³ Kughou nongu no ighamkuni keno, nongu no ajulho kütsüpe püakeqo pelo nongu xaphetsü pelo! Amülhü no tipaqo fupesü wuve nani, atuthu no tipaqo fupesü wuve nani. Ikemu khunono I pükhü cheni keno ayeghi lo xülu nani eno I kimthe naghuto ighilu nani.

Mloqa akemi Lopiqitsü

¹⁴ Hitoi piche nani, “Shiqhelo, shiqhelo, alaghi kutolo, Iw timiqo laghi lono vekhape akeu kümtsü ikhive lo.”

¹⁵ Kughengu akiqheu eno süqhepe püakeu, khuu shekhaha acheni eno Pa je Akimtheu keno, Pa no ishi piani: “Ni ye akiqheu eno akimthe-a lo acheni, ikemu Ni ye mloqa kemi ngo aqhokighemi gholo ghi ani, Ni ye aqhokighemi ghüthi püxü kithetsü, eno mloqa akemi mlo püxü kithe tsüniye ke.

¹⁶ Ni ye alhokupuju panoqo nguku auvemo nani, momu alhokuthu panoqo shou amloide monani; kughengu tishive aye, I no lhokeu tuthu ngo angulho no I nhethe lono qeinaive nani.

¹⁷ I no pa shou amlo idevekeu ye pa no aghükha shikeu xine ghenguno ke, tighenguno I no ghimeqhi eno I no amlo ideve no I gi küsüve, ikemu pa no pa mlo iqesü athiu idewove.

¹⁸ I no pa no kishi xü ani keno ithuluvae ikemu I no pa shipivi nani; I no pa saphe sawu nani eno pa eno pa gholo mloqa akemi lokughunotsü nani,

¹⁹ eno panongu kichi lo shekiqhe sütsü nani. Ampeu no piani, Kupunu akemi, eno aghache lo akemi, aloino peniu, aloino peniu,” “eno I no pa shipivi nani.

²⁰ Ikemu kixikilami ye azüghi fukukucho toike; kughengu ti ye iqünhei mlae, eno tino xine-xigha chhelephe cheni.

²¹ Alhou no piani, Kixikilami ghenguno aloino keu kühae.”