ISAIAH 56 - Sumi Naga CL (Re-edited) Bible (BSI)

Inaghami Xakulupu

¹ Ampeu no ishi piani: “Achipiu eno amikucho shilo, kughengu I launo xakulu ighini keu kushuo kumovae, eno Iw xaphekulu pephe piye nani.

² Timi nu khuu no Sabbath ikhilu cheni eno ti shipütha chemo, alhoksa kiumu shimoni eno mtotoi ti pape cheni keno pa kümghapue.”

³ Inaghami Ampeu gholo xükime luvekeu pelo ishi pipe kevilo, “Ampeu no Paw timiqo gholono ni kilepheve nani”; eno shokomi pelo ishi pipe kevilo, “Julo, ni ye qhaikeu süboke.”

⁴ Kughengu Ampeu no ishi piani: “Shokomi khuu no Iw Sabbath ikhilu cheni, I pulou kümla shi cheni eno Iw puloshoqhi mtotoi pecheni keno,

⁵ I no I kilo eno I kupuwu nguno alou, o je lono athigho qhitsü nani eno apu-anga akeqo nguno ajekipi shitsü nani; I no shekhaha je pesü panongu tsü nani ti ye khilemu kühave monani.

⁶ “Inaghami khunono Ampeu gholo xükime luve akeno, Pa huthu eno kimiye, eno Pa qemi shi acheni keno, khunono Sabbath ikhilu cheni, ti shipütha chemo eno Iw puloshoqhi mtotoi pecheni keno,

⁷ tipaqo ye I no I kimthe toghi lo saighi nani, eno I kighini ki lono alokivi nongu tsü nani eno nongu no akümlla-khache lo, akipti kümllagho ngo aghakishi kümllagho tsükeu ikhilutsü nani; Kughengu I ki ye ashiaye kümtsü ghenguno akighini ki ipi ku nani.”

⁸ Ampeu Alhou Khuu no Israelmi hapiyepighive keu hekütsü keno, Pa no pi ani, “Ti hekütsüpe qhive keqo nguno alau, itaghi I no kütami ghi panongu gholo hekütsü nani.”

Israel Sakiphemi Shikipimi

⁹ Aghasü lo tüghashi akeqo eno aluza lo tüghashiqo, hilau ighi no tsüchuve lo.

¹⁰ Pa ghukhemi ye anhethi ichevae; panongu kümtsü akighithi kühavae; panongu kümtsü atsü ighamo keu toike; panongu ye atsü toi ihozü no asamo pumo keu no apulou kethono kütami ghemlavae.

¹¹ Atsüqo ye khije khijemu chuluve nani; eno khilemu lukümkha shi chemoe. Ikemu sakiphemi ye ambe khemi vethakulu küha keqo ke; panongu kümtsü pütüta pulou küdau wu khavae, eno kümtsü pütüta no ala shiluni keu phucheni.

¹² Panongu no pi, “I no atsaiji peighini, ningu aji kümka shoni nolo, eno thoghiu ye ishi tsala nguno kimghi mla kepushi alo nani.”