ISAIAH 54 - Sumi Naga CL (Re-edited) Bible (BSI)

Lhokta lo Alakishi Puloshoqhi

¹ “O, anga punumo keu, anuhau, ale phelo, no khuu apunu küsü süju mphi keno, alokivishi ighamku ale phelo! Kughengu anuhau totimi tianuli no külauve keu totimi tianuli nguno alau shive nani,” Ampeu no piani.

² O phiki pekho kithelo, eno o chebo lo nhaqhiphi ta süchholo; süchile kevilo; o kighi kushuo shikithelo eno o küptasü shikumto kithelo.

³ Kughengu no ye o u piyiu eno ajeu küdau ikowove nani; eno o polokiqi no shiyeqo qhasüve nani eno mishighüna kümsa akeqo shepichhive nani.

⁴ “Msa kevilo, kughengu no ye kujove monani; avehu izü kevilo, kughengu o juaje shipüsamo nani; no ye o lhothe lo akukujo shikeu kümsümave nani, eno nono chimemi shiche kelo o thaigha keu kümsümave nani.

⁵ Kughengu o lhokeu huno o kimi shivae, Pa je ye aqokitikhi Mpeu ke, Israel Lhou akimtheu no o xakuluu ke, Pa ye ayeghiqha Lhou kepi Pa kucheni.

⁶ Kughengu no ye akimi no pheve keu totimi lakhi no ighono mloqa akeu toike, momu alhothe lo nipu pheve keu hutoi keu lono o kulu ke, ipi o Lhou no piani.

⁷ Atüqhüdo hami I no o qhiveke; ikemu shishe kimiyekini lono I no o sachilelu nani.

⁸ Atüqhüdo hami I no amlo kighide lono I gi o launo tsüghüsü wuve, ikemu lhokta kikimiye lono, I no o shou küpükini betsü nani. Ampeu o xakuluu no piani.

⁹ “I ghengu ye, hi ye Noah ghuloki lo toi anie: I no Noah züqo toikeu pelo khilemu ayeghi yimi keu shipe moae ipi ashoqhi shive ke, tihutoi ni ye nongu shou amlo idemo eno nongu lomipimo kepi tushoqhi ani.

¹⁰ Naghutoqo no ikauve namu eno atoghiqo no ipa ikiqive namu, Iw iqemokeu kikimiye ye o launo wuvemo nani, eno Iw külakishi puloshoqhi ye ikhivemo nani,” ipi Ampeu o shou kimiyekini achekeu no piani.

¹¹ O aghimeshi akeu, no ye pasapagha no fukuchoqhi ke, ikemu o lopiqi tsümoe, Julo, I no o ghenguno aboqha tuqo pesü ayi kümka shou qhitsüni, eno sapphire tuqo pesü o boqha ghotsü nanie.

¹² O ki kütsüqa ye ruby tu pesü shitsü nani, ow khagho ye carbuncle pesü shitsü nani, eno o liwo ye kümtsü akughupu tu pesü mlatsü nani.

¹³ O tianuli kümtsü Ampeu no shika nani, eno o tianuli lau alakishi shishe kije tsü nani.

¹⁴ Achipiu pesü no ye mtotoi lupe nani; No ye qhaküsü lono putosü nani kughengu no ye msamo nani.

¹⁵ Khuana no nongu leighi aye, pa ye I launo kumoe; khukhumu o sasü kumjo keu ye o vecheo ikiqive nani.

¹⁶ Julo I no ayikiyiqimi lhopheve ake, panoqo no ami shipüzü, avehupu ghenguno aghünanu iqiphe nani. I no kütsakungove chekeu hu ghi lhopheve ake.

¹⁷ Kiu ghünanu mu o ghüzamla nani; eno atsa kükügha lo o nguku kemi kümtsü shou nono ghechilelu nani. Hi ye Ampeu qemi mheghi ke, eno I launo ighi keu xaphekulupu küka ke, ipi Ampeu no piani.