ISAIAH 53 - Sumi Naga CL (Re-edited) Bible (BSI)

¹ Ni launo chilu keu khuu no pülü kea? Eno Alhou u khuu piye kea?

² Kughengu pa ye Alhou zülo asübo khuni lakhi toi thuwu, eno qhaike yeghi lo akuhu qüsüpe aketoi keu ke; Pa ye kogheküghü momu akükanguagha kiumu kühake, kiu lonomu Pa jukepu kühae; momu jukivipu kiumu kühake, pa mine akepu kiumu kühae.

³ Pa ye timiqo no jukünatha eno miliveke; Pa ye ghichheghime shi eno amloghime no chhitoi, eno milakhi khuu lau, timiqo no pano gi küsüve cheni keno, pa thaigha eno ningu no Pa phimoke.

⁴ Mtsüqheino pa no niw ghichheghime puluve tsü eno ni mlo ghime puluve tsüke; ikeghi ningu no pa ye Alhou no ghimeqhi anie pi kümsüve.

⁵ Ikemu ni xineqo ghenguno Pa ghüzaveke, niw shikipimi ghenguno Pa ye heqhive; pa shou aghime puku keu huno ni lau aloino keu süghi, eno Pa shou hepuku keu zaku no ni lau shikipivi süghie.

⁶ Ningu kümtsü no ambe toi ala kumo lo wuveke; kümtsü pütüta lalo wukhave; ikemu Ampeu no pa shou ni ghime pukuve tsüe.

⁷ Pa nedaqoda eno ghimeqhi ke, ikeghi pa ye atsa lakhimu piqhimoe; ambeti lakhi hekiqhiki lo sawu cheke toi, eno ambe no pa mhi ghoche kemi zülo inaqhoi ngo ketoi Pa ye atsa lakhimu piqhimoe.

⁸ Nedaqoda eno küghakütha vecheo Pa sasü wuve; eno paw tiqhelimi dolo khuu no pa ye timiqo xine ghenguno küxümi yeghi lono pithive kepi kümsü kea?

⁹ Pa no ngukangugha shimomu eno pishikiqhi tsa pimomu, panongu no küsaküghami eno kinimi gholo Pa kumo kutotsüe.

¹⁰ Ikeghi Pa no aghime shikeu ye Ampeu pulou lono ke; Pa no pa pelo ichheime peke; kughou Pa ngulho no shipimive keu ghenguno akümllagho shini keno, Pa ye pa polokiqi ithulu nani; Pa ye axüshu nani; Ampeu pulou no Pa lolo kupukuno shi nani.

¹¹ Pa ngulho no ghichheghime shi akeu dolono Pa no juno aghapiqilu nani; I qeu, achipiu huno Pa lokütsü vecheo, timi kutomo pelo achipiu shilupe nani, eno Pa no tipaqo kipimi puluve tsünani.

¹² Ikehu I no kiqhe-kighemi gholo asaje kothape Pa tsü nani, eno pa ye akumtomi gholo asaje anani, ti ye pa no pa ngulho ikhiphe pesü akithi lo tsüve kehu eno axine shive kemi gholo Pa kihisüve kehue; pa no timi kutomo xine puluve tsüke, eno panoqo xine pevetsü penike inikhu ke.