ISAIAH 52 - Sumi Naga CL (Re-edited) Bible (BSI)

Ampeu w Xakulupu Chekeu

¹ Ithulo, Ithulo, O Zion, o küka kumto pepulo; O Jerusalem, akimthe phughi, jukighilepu phimini pepulo; kughengu mithekumomi ngo aphighüyiko ghamo kemi ye khilemu o hukikha lo iloghilu moae.

² Ayeghimkhu kuthove no ithughilo; tishino iqavelo, O Jerusalem, o kuo lo tsüghape akeu yikichhe lekho velo, o akughushi akeu Zion ngaqo.

³ Kughengu Ampeu no ishi piani: “Nongu ye kümsa no jepuwu püani eno nongu ye pisa sümono qhüchile nani.”

⁴ Kughengu Ampeu Alhou no ishi piani: “Inahuu Iw timiqo no küghüna nike Egypt lo iqi kelo, ikemu ame kiumu tsümono, Assyriami no anguka lono nongu ghimeqhi püani.

⁵ Tighenguno itehi Ni ye hilau kiu ani kea?” ipi Ampeu no sheshu ani. “Hi Iw timiqo ame tsümono sawuve kelaye panongu shou yepemi ye mloqa ani.” Eno “Tino ishokibe I je thaigha ani.

⁶ Tighenguno Iw timiqo ye I je ithipe nanie. Eno kihitha püatsü akeu tsala tolu kelo, I no pi ani kepi, panongu no ithi nani ke; Ni ye hile ani.”

⁷ Naghutoqo kathasü asütsa kivi pesü ighikeu pukhu ye kiutoi juvi kelae, pa no alakishi peighi ke, eno alokivi sütsa peighi ke, pa no Zion vilo ishi pi, “O Lhou no ayepe ani.”

⁸ O phughi ghukhemi sütsa—panongu no ighamku ani, panongu no alokivi le phe ani; panongu nhethi ampi noAmpeu no Zion lo idewoche keu ju anie.

⁹ Alokivi lono igha ale phelo, nongu Zion lo ixapinyi akeqo, kughengu Ampeu no Paw timiqo lopiqi tsüke; Pa no Zion xachile luvae.

¹⁰ Ampeu no shiyeqo zülono Pa u kimthe xachhovae, eno ayeghi shekha kümtsü lono Alhouw xakulupu ithulu nani.

¹¹ Nongu Ampeuw akimthe bohu xapuche keqo, wuvelo, wuvelo, tilehi no ipevelo, mithekumo nhemgha bu kevilo, tipa-a mta lono ipeve lo eno nongu ampi shikimthevelo.

¹² Kughengu nongu ye mighimghai ipemo nani, eno nongu ye posü womo nani, kughengu Ampeu no nongu züu shino wunani, eno Israel Lhou no nongu thiuno khesasü wunani.

Ni xine Ghenguno Pa Qhuqhi

¹³ Julo, I qeu ye alokütsü lono mlaitha nani; pa ye akiqheu lono pa süqhe nani, eno pa sheqhe nani.

¹⁴ Kutomo no nongu jupe akichiqhi ketoi, pa ju shishe shipüsave tsü kehu, pa ye timi ju kumo toive, eno pa ju ye timi nu toi moveke,

¹⁵ ikemu itehi ye Pa no shiye kutomo süküthü nani. Pa jupe kükami no pano kichi kujukha luve nani; kughengu panongu vilo khilemu piphemo keu ithulu ani, eno khikhi panongu no chimla aphi keno ti vethalu ani.