ISAIAH 51 - Sumi Naga CL (Re-edited) Bible (BSI)

Ampeu no Zion Lopiqitsü

¹ “I tsa inilo, nongu achipiu-mikucho phuche keqo, eno Ampeu phuche keqo: atuqu eno atu kuchhuki khileno nongu chitha phelu keno, tipaqo kümsü julo.

² Nongu pasü Abraham eno nongu punu keu Sarah kümsü julo; kughou I no pa kulu keno, pa ye thili ke, tishikeu lono I no pa kümgha tsüno kughuko tsüniye ke.

³ Kughengu Ampeu no Zion lopiqitsü cheni; Pa no tile ixapinyi ke-aqo lopiqitsü cheni eno liw yenguyi ke-a pesü Eden toi kughulho tsü cheni, li sayeqha pesü Ampeu ghutu toi shitsü cheni; alokivi ngo alokiqipu eno shikimthikütsü ngo ale kungo sütsa ye li lolo anani.

⁴ “Iw timiqo, tsaqüi I tsa inilo, Iw shiyeqo, akini kugho puwolo; kughengu azah lakhi I launo ipe nani, eno I no achipiu pesü timiqo ghenguno aküvü shitsü nani.

⁵ Iw achipiu-mikucho ye kupunu ighi nani, eno I launo xakulupu ipevae, Ni ampi no timiqo shou xathabe nani; azüghimkü lo akeqo no Ni ighini keu khe ani; eno panoqo xalu penike panongu ye lajuqhiyi I khe ani.

⁶ Atsütsü küdau jupukulo, eno ayeghi qhou jupiqilo; kughengu atsütsü no amchhi toi hailove; ayeghi no aphimini toi ixüthave nani, eno tile küghüna akemi no tipaphi lono thive nani; ikemu Iw xakulupu ye alholo ache nani, eno Iw achipiu-mikucho ye khilemu hauvemo nani.

⁷ “Nongu achipiu-mikucho kiu keno ithi akeqo, nongu mlo lo I yezah ache kemi timiqo, I tsa inilo; timi no nongu sakiyini keu msa kevilo, momu panongu no nongu thaigha keu aghüthisü kevilo.

⁸ Kughengu apila no aphimini toi panongu tsave nani, eno aninga no asüpha chukeshi panongu chuve nani, ikemu Iw achipiu-mikucho ye alholo ache nani, eno Iw xakulupu ye tiqheli kupuju lo ache nani.”

⁹ Ithulo, ithulo, ni shikumto tsülo, O Ampeu küka; khaghilo toi eno wovekeu tiqheli lo toi ithulo. Rahab aleqhishi ghithave keu eno dragon jipilive keu ye Noke kumo keshea?

¹⁰ Azüghi kutho chethove pekeu, tishikeu lono Nono xachile luve kemi pelo katha ikulu pekeu ye Noke kumo keshea?

¹¹ Ampeu no xachilelu kemi ye ideighive nani eno Zion lo ale phesü ighi nani; Panongu ye pülhapuju alokivi shiche nani; panongu ye alokiqi eno alokivi ithuluve nani, eno amloküsa ngo amlo ghime ye pano launo wuve nani.

¹² “O lopiqitsü chekeu ye Ni ampi noke; nongu ye kushiye thiveni keu timi msa ani kea? Timi nu ye atsüni hutoi mla püani,

¹³ eno pa ye pa lhokeu Ampeu kümsümave ake, atsütsü sükhope qhikeu eno ayeghi boqha qhakeu ye Pa ke, kushiye nongu ye aküxü kupuju msa acheni, nongu ghimeqhi kemi no axuide keu eno kütsale nike kuto akeu msa cheni kea? Nongu ghimeqhi chekemi xukighide khilehi ani kea?

¹⁴ Aqhokighemi ye kighitheno khaqhi pheve nani; pa ye thive no aqo lo ilovemo nani, pa ye khilemu achuqupu mikheve monani.

¹⁵ Ni ye nongu Lhou Ampeu ke, I no azüghi xukutho no fukukucho no iqhaighu chenipe, aqokitikhi Mpeu no Pa je ke.

¹⁶ I no atsütsü xakhope qhi, eno ayeghi boqha qhake, o kichi lo I tsa sütsü eno I u pesü o khonha eno Zion vilo pi, ‘Nongu ye Iw timiqo ke.’”

¹⁷ O küdaputhulo, o küdalo, O Zion, puthugho lo, nongu khunoqo Ampeu loghu jukhu lono shojuve akeno, nongu no tipau yekhave eno tipau no o pelo izüvuive peke.

¹⁸ Li no punu keu nuli gholo, li sapheni kemi lakhimu kühae; li no saputhu keu nuli gholo, li u sünheluni kemi khumu kühae.

¹⁹ Thime hi küma no o shou ikughivae— khuu no o lopiqi tsüni kea?— amhekiqi ngo kütsakungo, püqümiye ngo azütakikihi; khuu no o lopiqi tsüni kea?

²⁰ O nuli ye qeive no ikiqivae; ashe no alichhe lo mepe akeshi, panongu ye alaghila kümtsü lo ihozü ngo ani; panongu lolo Ampeu loghu eno Pa no sakiyi keu no chhitoivae.

²¹ Tighenguno, nongu khunoqo ghimeqhi ani keno, khunono shomzü ani ikemu atsaiji no kumo keno hi inilo:

²² Ampeu o Lhou, Paw timi ghenguno qhüiniju chekeu no ishi piani, “Julo, I no o u lono Pa no izüvuive chekeu jukhu ikhiluvae; no ye I loghu chithakhu lo shokithe moae;

²³ Nongu nedaqoda chekemi eno Nongu vilo, ‘Ihozü lo, ningu no chesü wuni’ ipi chekeqo; eno nongu mqa no ayeghi ghüza momu alaghi toi shino panongu no chewu chekeqo lau I no izüvuive chekeu jukhu eno I loghu chithakhu tsüve nani.”