ISAIAH 50 - Sumi Naga CL (Re-edited) Bible (BSI)

Israel Xine eno Aqeu Ghokulu

¹ Ampeu no ishi piani: “O zaw aküghüxa shepe I no li u lo sütsü keu khile ani kea? Momu I pi kupumi dolo, khuu lau o jepuwuve keno pi julo. Julo, nongu xine ghenguno nongu jepuwuve; eno nongu kipimi ghenguno nongu paza hapuwuve ke.

² Kushiye I no ighi kelo timi lakhimu aghi move kea? Kushiye I no ku kelo milakhi nomu khochilemo kea? Nongu xachile lunike I u ye ikholo küghashi anio? Momu Ni ye xaphe lunike aküka küha keshea? Julo, I zakütsü lono I no azüghi qhaive tsü cheni, I no aghokiqo pesü asayeqha kughulhove cheni; tipaqo lo akha no azü kühave kehu münauve eno tüghüthi kelauno thive cheni.

³ I no aküzü pesü atsütsü nhave; eno yeqhiyephi pesü tipau künha shitsü cheni.”

⁴ Ampeu Alhou no tsaqüi khuno qoputhuve akeno tipano mili pesü I tsüvae, tishianguno I pelo akulho shive kemi shikumtolu peniye ke. Inaqhe atsütsü Pa no I pelo tsaqüi qoputhuve kemi toi chilu peniye I küda cheni.

⁵ Ampeu Alhou no I kini xükhove tsüae, eno ni ye hebide püamoe; Pa launo tsüghüve püamoe.

⁶ I heqhi akemi lau I no I mqa mighe tsüe, I kichimhi phitsü akemi lau I no I gimuchu mighe; I shikujo eno müsüte akemi launo ni ye I gi küsüve moe.

⁷ Ikemu Ampeu no I kuphu cheni, tigheno ni ye kujove moe; I no atuitu toi I gi teqhitelei ke, I no ithi anike I shikujo monani.

⁸ I chipiu shuphetsü chekeu ye I punukhoi ani, Khuu no I ngukubelu nani kea? Ningu küghakütha-a lo kümtsa puthughoni. Khuu no I ghümi kea? Pa pelo nguku kepu süghiju pelo.

⁹ Julo, Ampeu Alhou no I kuphu cheni, khuu no ni ye küqüvae ipilu nani kea? Julo, I nguku akemi kümtsü aphimini toi ixüve nani; Apila no chupühave nani.

¹⁰ Nongu dolo khuu no Ampeu sümsa cheni eno Pa qeu tsa lucheni kea? Khuu no aküzü lo püla cheni eno aküvü küha keno, pa pelo Ampeu je pükhübe eno pa Lhou pükhülu pelo.

¹¹ Julo, nongu khunono kütami kütsave niye kuchughu, eno kütami ghüza nike akuluqhe küiqü cheni keno, nongu no pechekeu mi küvü eno akulu küqükeu küvü lono chewulo! Nongu ye I u lono küsakusho hi sholu nani, eno aghime lono nongu pepüzüve nani.