ISAIAH 5 - Sumi Naga CL (Re-edited) Bible (BSI)

Ampeu Tsailu Kütsave

¹ I no I qhuu ghenguno kikimiye le pesü pa tsailu shipili pheni: I qhuu no ighono aghüma kivi toghi lakhi lo atsailu ache.

² Pa no ti hokide no atu kicheve, eno atsaibo akiviu pesü shosü; tipau mta lo pa no aqoghe lakhi shiqhe no atu chhuthape atsaizü tughuko mla; pa no ghile khelho akelaye akiqhi tsaithi shiaghive.

³ O Jerusalem eno Judah lo küamiqo, I tsailu ngo nikujo dolo küghatha tsülo.

⁴ I tsailu ghenguno shikulupu hinguno alau I no shimove keu kiu ani kea? Kushiye I no atsaithi kivi huqhe akelaye akiqhiu xolu kepu shive kea?

⁵ Ikehu I tsailu pesü kiu shini keno I no pini. I no tipau ghutu eno akuptu hexave no ikhiveni, eno tüghashi no mzachuve no nedaqoda pinyive peni.

⁶ I no tipau pesü asüligha shiveni; ti ye kixiphemo momu hokide moae ikemu aghüsahu ngo alupi no itsüve peni; I no khüngküsü ghi azah tsüno tile ghuqhi pemoni.

⁷ Aqokitikhi MPEU tsailu ye Israel shiye, Judah lo küami no Pa lopushi chekeu sübo ke; Pa no panoqo launo kuchou xakütha laju kemu julo, ajikuqou ithulue; achipiu mikucho laju kemu julo, panongu no püqapunu chekemi küqau chilue!

Kixikilami Haküsapu

⁸ Khunono kütami yeghi kühave moke kutolo aki-alu koluve tsüno aqha kuchopu nongu likhi auve cheni keno ahasapue.

⁹ Aqokitikhi MPEU no tushoqhi keu I no chiluvae: “Mtsüqheino aki kuloghi eno jukivi ki kümtsü lo ngoni kemi kühano küghüve nani.

¹⁰ Atsai luche 10 lo atsaizü liter 24 likhi mlalu nani, axapiti ahu 100 lo ahu 10 likhi pithi nani.”

¹¹ Khunono aji kümka shoniye inaqhe itheno ithu, eno kijiliu aji no lüghüi pitipüza moke kutolo shocheni keno, pano hasapue!

¹² Panoqo no tiqhetini lo aheo ngo küghaküsü lebo, amqü ngo fulili eno atsaiji peitha cheni, ikemu Ampeu kümla ye kihi chemo, momu Pa u lo kümla ithulu chemoe.

¹³ Ikehu Iw timiqo no vethakulu kühave kehu panongu ye akughu lo wucheae; pano gholo ajuaje küami no akhüava shi ani, eno aqokitikhi no atüghü no qhai ani.

¹⁴ Hi ghenguno Kithigha no pa müzü-tüghü alau shiuve no pa kichi mkukithe ani, Jerusalem lo mbumghu alovi chekemi kijemi ngo aqokitikhi kümtsü tile ilove nani.

¹⁵ Timi kümtsü sünheqhipe kuchunivae, aqheküza nhethi xapu kemi kuchunivae.

¹⁶ Ikemu aqokitikhi MPEU ye Pa chipiu lono süqhe nani, eno amikucho no Akimthe Lhou ye akimthe kepi piye ani.

¹⁷ Tishino ambeqo no pano tsüni kümza-a lono chu nani, eno kupokichemi no kinimi kipighi-a lono chu nani.

¹⁸ Khunono akimki kighi pesü axine eno kixikila tshüluve cheni keno ahasapue,

¹⁹ khunono “Nino Ampeu kümla chhejuni ke Pa pelo mtazü mlaju pelo; nino ithini ke Israelmiw Akimtheu kimji süghiju lo!” ipi cheni keno ahasapue.

²⁰ Alhoksa pesü akivi, eno akivi pesü alhoksae pi kemi, aküzü pesü aküvü lo qhi no aküvü pesü aküzü lo qhi kemi, akukhu pesü akungo eno akungo pesü akukhu ipiche kemi hasapue!

²¹ Khunono alikhi aküghape alokütsü eno pano nhethe lo lotsü-loghü kepi cheni keno ahasapue!

²² Khunono aji kusho eno aji kümka kikite lo shitsami kepi cheni keno ahasapue,

²³ külügho ghenguno küqüve keu pheve no pimimo keu chipiu luvetsü kemi hasapue!

²⁴ Tighenguno, ami mili no aghijini eno atsaneghu kithi piti pühavetsü keshi, pano kuhu aghü ye tsümave ketoi nani eno pano kupu ye ayeghimkhu toi hauve nani; kughengu panongu no Aqokitikhi MPEU Yezah milive, eno Israelmiw Akimthe Lhou tsa jukünathave ke.

²⁵ Tighenguno Ampeu loghu no Paw timiqo shou ikughi, panoqo shou Pa u chho no ghimeqhi kelo naghutoqo no ithathuve; akithi kumo no alaghila lo tübatüzü toive. Ikeghi Ampeu mlokighide ye iqü mono ghime ae.

²⁶ Pa no aghacheu shiyeqo lau amchipu pesü kihi kunani, eno ayeghi shekhau no miji panoqo ku kelo julo, panoqo no paikhavi no ighive nani!

²⁷ Kulhokugho küha, milakhimu küpxamo, ingumo momu züuvemo, apokha xaqhimo, apukhuqho kighi küghüta moe;

²⁸ pano piji ye mtsüsüi eno asüzü ye piqevae, panow khurshi pukhumtsü no atu kümka toi, eno khurkulu pukhu no miyitsü toie.

²⁹ Panongu ghügha ye abongshuu toie, tipaqo no igha no lhoxü tsüqhipe wuve kelo khunomu hakho mlave cheni.

³⁰ Tipani ghi panoqo no azüghi ghügha toi Israel lo igha ighi nani. Julo, aghakhu lo aküzü ngo aveküsa likhi ithulu nani, eno khüngküsü no aküvü küzüluve nani.